ലണ്ടന്‍: യമനിലെ ഹൂതികളില്‍ നിന്നുള്ള ആക്രമണം വര്‍ധിച്ച സാഹചര്യത്തില്‍ സൗദി അറേബ്യക്ക് പിന്തുണയുമായി ബ്രിട്ടന്‍. സൗദി അറേബ്യന്‍ യുദ്ധ വിമാനങ്ങള്‍ക്ക് ആകാശത്തു വെച്ച് ഇന്ധനം നിറച്ചു നല്‍കുമെന്ന് ബ്രിട്ടീഷ് പ്രധാനമന്ത്രി ആന്‍ഡി ബേണ്‍ഹാം വ്യക്തമാക്കി.
സൈപ്രസിലെ റോയല്‍ എയര്‍ഫോഴ്‌സ് (ആര്‍.എ.എഫ്) താവളത്തില്‍ നിന്നുള്ള 'വോയേജര്‍' എന്ന ബ്രിട്ടീഷ് വിമാനമായിരിക്കും ഈ ദൗത്യത്തില്‍ പങ്കാളിയാകുക. റോയല്‍ എയര്‍ഫോഴ്‌സിന്റെ പക്കലുള്ള ഒമ്പത് വോയേജര്‍ വിമാനങ്ങളുടെ കൂട്ടത്തില്‍ നിന്നുള്ള ഒന്നാണിത്. വരും ദിവസങ്ങളില്‍ തന്നെ ഈ പ്രവര്‍ത്തനം ആരംഭിക്കും.
സൗദി അറേബ്യ സൈനിക സഹായം അഭ്യര്‍ഥിച്ചതിന്റെ അടിസ്ഥാനത്തിലാണ് നടപടിയെന്ന് ബ്രിട്ടീഷ് പ്രധാനമന്ത്രി പറഞ്ഞു. 'സൈനിക സഹായത്തിനായി സൗദി അറേബ്യന്‍ ഭരണകൂടത്തിന്റെ അഭ്യര്‍ഥന ലഭിച്ചിരുന്നു.
പ്രതിരോധ സെക്രട്ടറിയുടെയും വിദേശകാര്യ സെക്രട്ടറിയുടെയും ഉപദേശത്തെ തുടര്‍ന്ന്, ആകാശത്തുവെച്ച് ഇന്ധനം നിറച്ചു നല്‍കുന്ന വ്യോമ പ്രതിരോധ സഹായം നല്‍കാന്‍ സമ്മതിക്കുകയായിരുന്നുവെന്ന് പ്രധാനമന്ത്രി പറഞ്ഞു.
ഇറാന്റെ പിന്തുണയുള്ള ഹൂതികള്‍ തൊടുത്തു വിടുന്ന മിസൈലുകളും ഡ്രോണുകളും പ്രതിരോധിക്കുന്ന സൗദി വ്യോമസേനയുടെ വിമാനങ്ങള്‍ക്ക് ഇന്ധനം നിറച്ചു നല്‍കുക മാത്രമായിരിക്കും ബ്രിട്ടീഷ് വിമാനം ചെയ്യുക.
എന്നാല്‍ ഹൂതികള്‍ക്കെതിരായ നേരിട്ടുള്ള ആക്രമണങ്ങളില്‍ ബ്രിട്ടന്‍ പങ്കാളിയാകില്ല. മാത്രമല്ല, ആദ്യ ഘട്ടത്തില്‍ ഏതാനും ആഴ്ചകള്‍ മാത്രമായിരിക്കും വ്യോമ പ്രതിരോധ സഹായം ലഭ്യമാക്കുകയെന്നും ബ്രിട്ടീഷ് അധികൃതര്‍ അറിയിച്ചു.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.