മുംബൈ: ബാങ്കിങ് ചരിത്രത്തിലെ അപൂര്‍വ സംഭവങ്ങള്‍ക്ക് സാക്ഷ്യം വഹിച്ച് സെപ്റ്റംബര്‍ 27 ഞായറാഴ്ച രാജ്യത്തെ ബാങ്കുകള്‍ തുറന്ന് പ്രവര്‍ത്തിച്ചു. തിങ്കളാഴ്ച മുതല്‍ ബാങ്ക് ജീവനക്കാരുടെ യൂണിയനുകള്‍ മൂന്നു ദിവസത്തെ പണിമുടക്ക് പ്രഖ്യാപിച്ച സാഹചര്യത്തില്‍, പൊതുജനങ്ങളുടെയും വ്യാപാരികളുടെയും ഇടപാടുകള്‍ തടസപ്പെടാതിരിക്കാനാണ് കേന്ദ്ര ധനമന്ത്രാലയം ഞായറാഴ്ച പ്രവൃത്തിദിനമാക്കി പ്രത്യേക ഉത്തരവിറക്കിയത്. സാമ്പത്തിക വര്‍ഷത്തിന്റെ ആദ്യ പകുതി പൂര്‍ത്തിയാകുന്ന വേളയില്‍ അക്കൗണ്ടുകളും കണക്കുകളും അവസാനിപ്പിക്കേണ്ടത് കൂടി കണക്കിലെടുത്താണ് ഈ അപൂര്‍വ തീരുമാനം കൈക്കൊണ്ടത്.
യൂണിയനുകളുടെ പണിമുടക്ക് കാരണം ബാങ്ക് ശാഖകളുടെ പ്രവര്‍ത്തനം തടസപ്പെടുമെങ്കിലും എ.ടി.എം, ഡിജിറ്റല്‍ ബാങ്കിങ് സേവനങ്ങള്‍ തടസമില്ലാതെ ലഭ്യമാക്കാന്‍ ബാങ്കുകള്‍ വിപുലമായ സജ്ജീകരണങ്ങള്‍ ഒരുക്കിയിട്ടുണ്ട്. തിങ്കള്‍, ചൊവ്വ, ബുധന്‍ ദിവസങ്ങളില്‍ ഉപയോക്താക്കള്‍ക്ക് മാസം തോറുമുള്ള നിശ്ചിത പരിധി ബാധകമാകാതെ ഏത് ബാങ്കിന്റെ എ.ടി.എമ്മില്‍ നിന്നും എത്ര തവണ വേണമെങ്കിലും സൗജന്യമായി പണം പിന്‍വലിക്കാം. കൂടാതെ ഓണ്‍ലൈന്‍ ബാങ്കിങ്, യു.പി.ഐ, ഇ.എം.ഐ ഉള്‍പ്പെടെയുള്ള ഓട്ടമേറ്റഡ് ഇടപാടുകള്‍ എന്നിവ മുടക്കമില്ലാതെ നടക്കും. എ.ടി.എമ്മുകളില്‍ പണലഭ്യത ഉറപ്പാക്കാന്‍ പ്രത്യേക ക്രമീകരണങ്ങള്‍ നടത്തിയതായും ബാങ്ക് അധികൃതര്‍ അറിയിച്ചു.
യുണൈറ്റഡ് ഫോറം ഓഫ് ബാങ്ക് യൂണിയന്‍സിന്റെ (യു.എഫ്.ബി.യു) നേതൃത്വത്തിലാണ് രാജ്യ വ്യാപകമായി പണിമുടക്ക് ആഹ്വാനം ചെയ്തിരിക്കുന്നത്. തൊണ്ണൂറ് ശതമാനത്തോളം ജീവനക്കാര്‍ സമരത്തിന് അനുകൂലമായതിനാല്‍ അടുത്ത മൂന്ന് ദിവസങ്ങളില്‍ ബാങ്കിങ് സേവനങ്ങള്‍ സ്തംഭിച്ചേക്കും. പണിമുടക്കിന് ശേഷം ഒക്ടോബര്‍ ഒന്നിന് ബാങ്കുകള്‍ സാധാരണ നിലയില്‍ പ്രവര്‍ത്തിക്കുമെങ്കിലും രണ്ടിന് ഗാന്ധി ജയന്തി പ്രമാണിച്ച് പൊതു അവധിയാണ്. തുടര്‍ന്ന് മാസത്തിലെ ആദ്യ ശനിയാഴ്ചയായ ഒക്ടോബര്‍ മൂന്നിന് വീണ്ടും ബാങ്കുകള്‍ പ്രവര്‍ത്തിക്കും.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.