തിരുവനന്തപുരം: ട്രഷറികളില്‍ പണമില്ലാതെ വരുമ്പോള്‍ സംസ്ഥാന സര്‍ക്കാരുകള്‍ റിസര്‍വ് ബാങ്കിന്റെ ഓവര്‍ ഡ്രാഫ്റ്റ് സൗകര്യത്തെ അമിതമായി ആശ്രയിക്കുന്നതിന് നിയന്ത്രണങ്ങളേര്‍പ്പെടുത്താന്‍ നീക്കം. നിലവില്‍ തുടര്‍ച്ചയായി 14 ദിവസം വരെ ലഭിക്കുന്ന ഒ.ഡി സൗകര്യം 10 ദിവസമായി വെട്ടിച്ചുരുക്കാന്‍ ആര്‍.ബി.ഐ ഉപദേശകസമിതി ശുപാര്‍ശ ചെയ്തു. സാമ്പത്തിക വര്‍ഷത്തിലെ ഒരു പാദത്തില്‍ പരമാവധി ഉപയോഗിക്കാവുന്ന ഒ.ഡി ദിവസങ്ങളുടെ എണ്ണം 36 ല്‍ നിന്ന് 30 ആക്കി കുറയ്ക്കാനും സമിതി നിര്‍ദേശിച്ചിട്ടുണ്ട്. കര്‍ണാടക മുന്‍ അഡീഷണല്‍ ചീഫ് സെക്രട്ടറി എസ്.എന്‍ പ്രസാദ് അധ്യക്ഷനായ സമിതി സമര്‍പ്പിച്ച ഈ റിപ്പോര്‍ട്ട്, കനത്ത പണഞെരുക്കം നേരിടുന്ന കേരളത്തിന് ഭാവിയില്‍ വലിയ പ്രതിസന്ധിയുണ്ടാക്കും.
മതിയായ മുന്നൊരുക്കങ്ങളില്ലാതെ സംസ്ഥാനങ്ങള്‍ വായ്പാ സൗകര്യങ്ങളെ ആശ്രയിക്കുന്ന പ്രവണത തടയുകയാണ് ലക്ഷ്യമെന്ന് കേരള ധനവകുപ്പ് അഡീഷണല്‍ ചീഫ് സെക്രട്ടറി കെ.ആര്‍ ജ്യോതിലാല്‍ കൂടി അംഗമായ സമിതി വ്യക്തമാക്കി. റിസര്‍വ് ബാങ്കുമായുള്ള കരാര്‍ പ്രകാരം ദിവസേന 1.66 കോടി രൂപയുടെ മിനിമം ബാലന്‍സ് സര്‍ക്കാരുകള്‍ നിലനിര്‍ത്തണം. ഇതില്‍ വീഴ്ച വരുമ്പോള്‍ കണ്‍സോളിഡേറ്റഡ് സിങ്കിങ് ഫണ്ട്, ഗ്യാരന്റി റിഡംപ്ഷന്‍ ഫണ്ട് എന്നിവയുടെ അടിസ്ഥാനത്തില്‍ സ്പെഷ്യല് ഡ്രായിങ് ഫെസിലിറ്റി വഴി 3362.9 കോടി രൂപ വരെയും, വേയ്സ് ആന്‍ഡ് മീന്‍സ് വഴി 2308 കോടി രൂപ വരെയും എടുക്കാം. ഇവ കൊണ്ട് താല്‍ക്കാലിക സാമ്പത്തിക പ്രതിസന്ധി പരിഹരിക്കാനാകാതെ വരുമ്പോഴാണ് ഉയര്‍ന്ന പലിശനിരക്കില്‍ സംസ്ഥാനങ്ങള്‍ ഒ.ഡി സൗകര്യം പ്രയോജനപ്പെടുത്തുന്നത്.
ഇതിനുപുറമേ വേയ്സ് ആന്‍ഡ് മീന്‍സ് പരിധി നിര്‍ണയിക്കുന്നതിനുള്ള മാനദണ്ഡങ്ങളിലും മാറ്റം വരുത്താന്‍ നിര്‍ദേശമുണ്ട്. ഇനി മുതല്‍ ലോട്ടറി വരുമാനം ഒഴിവാക്കിയുള്ള മൊത്തം റവന്യൂ വരുമാനത്തെ അടിസ്ഥാനമാക്കിയാകും ഇത് നിശ്ചയിക്കുക. ഈ പുതിയ മാനദണ്ഡം പ്രാബല്യത്തില്‍ വരുമ്പോള്‍ കേരളത്തിന്റെ വേയ്സ് ആന്‍ഡ് മീന്‍സ് പരിധി 2308 കോടി രൂപയില്‍ നിന്ന് 2503 കോടിയായി മാത്രമേ ഉയരൂ. വെറും 8.5 ശതമാനത്തിന്റെ വര്‍ധന മാത്രമാണ് ഇതിലൂടെ ലഭിക്കുന്നത്. സിങ്കിങ് ഫണ്ടിന്റെ അടിസ്ഥാനത്തില്‍ ലഭിക്കുന്ന സ്പെഷ്യല് ഡ്രായിങ് പരിധി 50 ശതമാനത്തില്‍ നിന്ന് 75 ശതമാനമാക്കി ഉയര്‍ത്താന്‍ ശുപാര്‍ശയുണ്ടെങ്കിലും, സംസ്ഥാനത്ത് ആവശ്യത്തിന് സിങ് കിങ് ഫണ്ടില്ലാത്തതിനാല്‍ കേരളത്തിന് ഇതിന്റെ ആനുകൂല്യവും പൂര്‍ണമായി പ്രയോജനപ്പെടുത്താനാകില്ല.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.