ലാസ: ടിബറ്റില്‍ വ്യാഴാഴ്ച രാത്രിയുണ്ടായ ശക്തമായ ഭൂചലനത്തില്‍ വന്‍ നാശനഷ്ടം. റിക്ടര്‍ സ്‌കെയിലില്‍ 7.0 തീവ്രത രേഖപ്പെടുത്തിയ ഭൂകമ്പത്തില്‍ 16 പേര്‍ മരണമടയുകയും 32 പേര്‍ക്ക് പരിക്കേല്‍ക്കുകയും ചെയ്തതായി ഔദ്യോഗിക വാര്‍ത്താ ഏജന്‍സിയായ സിന്‍ഹുവ സ്ഥിരീകരിച്ചു. ദുരന്തബാധിത മേഖലകളില്‍ രക്ഷാപ്രവര്‍ത്തനം അതിവേഗം പുരോഗമിക്കുകയാണ്.
വ്യാഴാഴ്ച രാത്രി 10:33 നാണ് ടിബറ്റിനെ നടുക്കിയ ഭൂചലനമുണ്ടായത്. നാഗ്ചുവിന് 190 കിലോമീറ്റര്‍ കിഴക്ക്-വടക്കുകിഴക്കായും തലസ്ഥാനമായ ലാസയ്ക്ക് 390 കിലോമീറ്റര്‍ വടക്കുകിഴക്കായും പര്‍വത മേഖലയിലാണ് പ്രഭവകേന്ദ്രമെന്ന് യു.എസ് ജിയോളജിക്കല്‍ സര്‍വേ വ്യക്തമാക്കി. ഭൂകമ്പത്തിന്റെ പ്രകമ്പനം ശക്തമായിരുന്നതിനാല്‍ ജനങ്ങള്‍ പരിഭ്രാന്തരായി വീടുകളില്‍ നിന്ന് പുറത്തേക്ക് ഓടിയിറങ്ങി.
ഭൂചലനത്തിന്റെ ആഘാതത്തില്‍ മുന്നൂറിലധികം വീടുകളും നിരവധി കെട്ടിടങ്ങളും പൂര്‍ണമായോ ഭാഗികമായോ തകര്‍ന്നു വീണു. പല ഗ്രാമങ്ങളിലേയും റോഡ് ഗതാഗതവും ആശയവിനിമയ സംവിധാനങ്ങളും പൂര്‍ണമായി സ്തംഭിച്ചിരിക്കുകയാണ്. ഉപരിതലത്തോട് വളരെ അടുത്ത് അതായത് 10 കിലോമീറ്റര്‍ മാത്രം ആഴത്തിലാണ് ഭൂചലനം ഉണ്ടായതെന്നത് നാശനഷ്ടങ്ങളുടെ വ്യാപ്തി വര്‍ധിപ്പിച്ചു.
രക്ഷാപ്രവര്‍ത്തനം ഏകോപിപ്പിക്കുന്നതിനായി പ്രാദേശിക ഭരണകൂടവും ദുരന്തനിവാരണ സേനയും അടിയന്തര യോഗം ചേര്‍ന്ന് നടപടികള്‍ സ്വീകരിച്ചിട്ടുണ്ട്. തകര്‍ന്നടിഞ്ഞ വീടുകള്‍ക്കും അവശിഷ്ടങ്ങള്‍ക്കും ഇടയില്‍ ആരെങ്കിലും കുടുങ്ങിക്കിടക്കുന്നുണ്ടോ എന്ന് പരിശോധിക്കാന്‍ പ്രത്യേക സംഘത്തെ നിയോഗിച്ചിട്ടുണ്ട്. ദുരന്തബാധിതര്‍ക്ക് ആവശ്യമായ ഭക്ഷണവും മരുന്നുകളും എത്തിക്കുന്നതിനുള്ള പ്രവര്‍ത്തനങ്ങള്‍ നടന്നു വരുന്നു.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.