പ്രവാസി തണൽ പദ്ധതി നിലവിൽ വന്നു; നാളെ മുതൽ അപേക്ഷിക്കാമെന്ന് നോർക്ക സി ഇ ഒ

തിരുവനന്തപുരം: കോവിഡ് ബാധിച്ച് മരിച്ചവർക്കുള്ള സാമ്പത്തിക സഹായം നൽകുന്ന പ്രവാസി തണൽ പദ്ധതി നിലവിൽ വന്നു. വിദേശത്തോ സ്വദേശത്തോ മരണമടഞ്ഞ പ്രവാസി മലയാളികളുടെയും മടങ്ങിയെത്തിയ വിദേശ മലയാളികളുടെയും അവിവാഹിതരായ പെൺമക്കൾക്കാണ് ഈ സാമ്പത്തിക സഹായം ലഭിക്കുക. 25000 രൂപയാണ് ഒറ്റത്തവണ സഹായധനമായി അനുവദിക്കുന്നത്.

പ്രമുഖ വ്യവസായിയും നോർക്ക റൂട്ട്സ് ഡയറക്ടർ ബോർഡ് അംഗവുമായ രവി പിള്ളയുടെ നേതൃത്വത്തിലുള്ള ആർ.പി ഫൗണ്ടേഷൻ വഴിയാണ് ധനസഹായം ലഭ്യമാക്കുന്നത്.

http://www.norkaroots.org/ എന്ന വെബ് സൈറ്റിൽ പ്രവാസി തണൽ എന്ന ലിങ്കിൽ ന്യൂ രജിസ്ട്രേഷൻ ഓപ്ഷനിൽ നാളെ മുതൽ അപേക്ഷിക്കാമെന്ന് നോർക്ക സി ഇ ഒ അറിയിച്ചു. വിശദവിവരങ്ങൾ http://norkaroots.org/ യിൽ ലഭിക്കും.