എം.സി.വൈ.എം-ബി.ഡികെ സംയുക്തമായി ജോസഫ് ക്രിസ്റ്റോ മെമ്മോറിയൽ രക്തദാന ക്യാമ്പ് സംഘടിപ്പിച്ചു

കുവൈറ്റ് സിറ്റി: കോവിഡ് മഹാമാരിക്കാലത്ത് അകാലത്തിൽ മരണമടഞ്ഞ കുവൈറ്റ് മലങ്കര സഭയുടെ സജീവ പ്രവർത്തകൻ ജോസഫ് ക്രിസ്റ്റോയുടെ സ്മരണാർത്ഥം കുവൈറ്റ് മലങ്കര റൈറ്റ് മൂവ്മെന്റിന്റെ യുവജന വിഭാഗമായ മലങ്കര കാത്തലിക് യൂത്ത് മൂവ്മെന്റ് (എം.സി.വൈ.എം.), ബ്ലഡ് ഡോണേഴ്സ് കേരള, കുവൈറ്റ് ചാപ്റ്ററും സംയുക്തമായി കേരളപ്പിറവിയോടനുബന്ധിച്ച് രക്തദാന ക്യാമ്പ് സംഘടിപ്പിച്ചു.

ഇന്ത്യാ-കുവൈറ്റ്‌ നയതന്ത്ര ബന്ധത്തിന്റെ അറുപതാം വാർഷികത്തിന്റെയും ഇന്ത്യൻ സ്വാതന്ത്ര്യത്തിന്റെ 75 മത് വാർഷികാഘോഷങ്ങളുടേയും ഭാഗമായിക്കൂടിയാണ് ക്യാമ്പ് സംഘടിപ്പിച്ചത്. അദാൻ ബ്ലഡ് ബാങ്കിൽ വച്ച് വെള്ളിയാഴ്‌ച ഉച്ചക്ക് ഒന്ന് മുതൽ വൈകുന്നേരം ആറ് വരെ സംഘടിപ്പിച്ച ക്യാമ്പിൽ 75 ൽ പരം കെഎംആർഎം- എംസിവൈഎം പ്രവർത്തകർ രക്തദാനം നിർവ്വഹിച്ചു.

ക്യാമ്പിന്റെ ഔപചാരികമായ ഉദ്ഘാടനകർമ്മം എം.സി.വൈ.എം ഡയറക്ടർ റവ.ഫാ.ജോൺ തുണ്ടിയത്ത് നിർവ്വഹിച്ചു.
ജോസഫ് ക്രിസ്റ്റോ സഭയിലെ എല്ലാ അംഗങ്ങൾക്കും സഹോദര തുല്ല്യൻ ആയിരുന്നു എന്നും അദ്ദേഹത്തിന്റെ അകാലത്തിലുള്ള വേർപാട് സഭക്ക് നികത്താനാവാത്ത നഷ്ടവുമാണെന്ന് അദ്ദേഹം അനുസ്മരിച്ചു. കോവിഡ് മഹാമാരിയുടെ കാലഘട്ടത്തിലും എം.സി.വൈ.എം നടത്തിവരുന്ന സാമൂഹ്യജീവകാരുണ്യ പ്രവർത്തനങ്ങളെ അദ്ദേഹം അഭിനന്ദിച്ചു.

എം.സി.വൈ.എം. പ്രസിഡണ്ട് അനിൽ ജോർജ്ജ് രാജന്റെ അദ്ധ്യക്ഷതയിൽ ചേർന്ന യോഗത്തിൽ കെ. എം. ആർ. എം. ജനറൽ സെക്രട്ടറി ലിബു ജോൺ, എം.സി.വൈ.എം. ആനിമേറ്റർ ആൽഫ്രഡ് ചാണ്ടി തുടങ്ങിയവർ ആശംസകൾ നേർന്നു. ക്യാമ്പ് വിജയകരമായി സംഘടിപ്പിച്ചതിന് എം.സി.വൈ.എംനുള്ള പ്രശംസാ ഫലകം ബിഡികെ അഡ്വൈസറി ബോർഡ് മെമ്പർ രാജൻ തോട്ടത്തിൽ നിന്നും റവ.ഫാ. ജോൺ തുണ്ടിയത്ത് ഏറ്റുവാങ്ങി.

എം.സി.വൈ.എം സെക്രട്ടറി ഫിനോ മാത്യു സ്വാഗതവും തോമസ് ജോൺ ബിഡികെ നന്ദിയും രേഖപ്പെടുത്തി.
ബിഡികെ കോ ഓർഡിനേറ്റർ ജിതിൻ ജോസ് പരിപാടികൾ ഏകോപിപ്പിച്ചു. കുവൈറ്റ് ആരോഗ്യ മന്ത്രാലയത്തിന്റെ കർശന നിബന്ധനകൾക്ക് വിധേയമാണ് ക്യാമ്പ് സംഘടിപ്പിച്ചത്. ക്യാമ്പിൽ പങ്കെടുത്ത എല്ലാവർക്കും സർട്ടിഫിക്കറ്റുകൾ വിതരണം ചെയ്തു.

എം. സി. വൈ. എം പ്രവർത്തകരായ ജയിംസ്, നോബിൻ ഫിലിപ്പ്, ബിൻസു റിജോ, റിങ്കി ഏലിയാസ്, റജി അച്ചൻകുഞ്ഞ് ബിഡികെ പ്രവർത്തകരായ നളിനാക്ഷൻ, വിനോത് കുമാർ, സോഫിരാജൻ, ലിനി ജയൻ, ശ്രീകുമാർ, വേണുഗോപാൽ, മാർട്ടിൻ എന്നിവർ ക്യാമ്പിന് നേതൃത്വം നൽകി.

കുവൈറ്റിൽ രക്തദാനക്യാമ്പുകളും ബോധവൽക്കരണ പരിപാടികളും സംഘടിപ്പിക്കുവാൻ താല്പര്യമുള്ള സംഘടനകളും സ്ഥാപനങ്ങളും കൂടാതെ രക്തം ആവശ്യമായി വരുന്ന അടിയന്തിര സാഹചര്യങ്ങളിലും 69997588 / 5151 0076 എന്നീ നമ്പറുകളിൽ ബന്ധപ്പെടാവുന്നതാണ്.