ലോകത്തിന് ചരിത്ര നിമിഷം; ജെയിംസ് വെബ് ദൂരദര്‍ശിനി വിജയകരമായി വിക്ഷേപിച്ചു

പാരീസ്: പ്രപഞ്ചോല്‍പത്തിയുടെ ചുരുളഴിക്കാന്‍ നാസയുടെ ബഹിരാകാശ ദൂരദര്‍ശിനി ജെയിംസ് വെബ് കുതിച്ചുയര്‍ന്നു. ഇന്ത്യന്‍ സമയം വൈകിട്ട് 5.50 നായിരുന്നു വിക്ഷേപണം. യൂറോപ്യന്‍ സ്പേസ് ഏജന്‍സിയുടെ ഏരിയന്‍ 5 റോക്കറ്റിലേറിയാണ് ഫ്രഞ്ച് ഗയാനയിലെ സ്‌പേസ് സെന്ററില്‍ നിന്ന് ദൂരദര്‍ശിനി വിക്ഷേിച്ചത്. മനുഷ്യന്‍ ഇതുവരെ നിര്‍മ്മിച്ചതില്‍ ഏറ്റവും ശേഷിയേറിയ ബഹിരാകാശ ടെലിസ്‌കോപ്പാണ് ജെയിംസ് വെബ്. ഭ്രമണപഥത്തിലെത്താന്‍ ഒരു മാസമെടുക്കും.

വിക്ഷേപണത്തിന്റെ ആദ്യ ഘട്ടങ്ങള്‍ വിജയകരമായി പൂര്‍ത്തിയാക്കിയാണ് ഏരിയന്‍ 5 റോക്കറ്റ് പറന്നുയര്‍ന്നത്. ആദ്യത്തെ ഇരുപതു മിനിറ്റില്‍ 7000 കിലോമീറ്റര്‍ യാത്ര പൂര്‍ത്തിയാക്കി. അരമണിക്കൂര്‍ പിന്നിട്ടപ്പോള്‍ ജെ.ഡബ്ല്യൂ.ടി വിക്ഷേപണ വാഹനത്തില്‍ നിന്ന് വേര്‍പെട്ടു. വിക്ഷേപണം കഴിഞ്ഞ് 12 മണിക്കൂര്‍ കഴിയുമ്പോഴായിരിക്കും ആദ്യ സഞ്ചാര പാതാ മാറ്റം. ഭൂമിയില്‍നിന്ന് 15 ലക്ഷം കിലോമീറ്റര്‍ അകലെയുള്ള എല്‍2 ഭ്രമണപഥത്തിലാകും ടെലിസ്‌കോപ് സ്ഥിതി ചെയ്യുക. 

ഇത്തരത്തില്‍ മൂന്നു തവണ പേടകത്തിലെ റോക്കറ്റുകള്‍ പ്രവര്‍ത്തിപ്പിച്ച് സഞ്ചാര പാത ക്രമീകരിക്കും. ഭൂമിയില്‍ നിന്ന് ചന്ദ്രനിലേക്കുള്ള ദൂരത്തിന്റെ ഏകദേശം നാലിരട്ടി അകലത്തില്‍ ലെഗ്രാഞ്ച് 2 പോയിന്റാണ് പേടകത്തിന്റെ ലക്ഷ്യം. ഇവിടെയെത്താന്‍ ഒരു മാസമെടുക്കും. സൂര്യന്റെ ശക്തമായ പ്രകാശത്തില്‍ നിന്ന് ഭൂമിയും സ്വന്തം സോളാര്‍ ഷീല്‍ഡും ദൂരദര്‍ശിനിയെ സംരക്ഷിക്കും. ആദ്യ ചിത്രങ്ങള്‍ കിട്ടി തുടങ്ങാന്‍ പിന്നെയും കാത്തിരിക്കണം. എല്‍2വില്‍ എത്തിയ ശേഷം കണ്ണാടി വിടരും. എല്ലാ സംവിധാനങ്ങളും പ്രവര്‍ത്തനക്ഷമമാണോയെന്ന് പരിശോധിച്ച ശേഷമായിരിക്കും ശാസ്ത്ര ദൗത്യം തുടങ്ങുക. അതുകൊണ്ട് എല്‍2വില്‍ എത്തി ആറു മാസം കഴിഞ്ഞ ശേഷമായിരിക്കും ദൂരദര്‍ശിനി കമ്മിഷന്‍ ചെയ്യുക.

കഴിഞ്ഞ വര്‍ഷം നിശ്ചയിച്ചിരുന്ന വിക്ഷേപണം മാറ്റിവയ്ക്കുകയായിരുന്നു. 75047.15 കോടി രൂപയാണു ദൂരദര്‍ശിനിയുടെ ചെലവ്.

നാസയും യൂറോപ്യന്‍ സ്‌പേസ് ഏജന്‍സിയും കനേഡിയന്‍ സ്‌പേസ് ഏജന്‍സിയും ചേര്‍ന്നാണ് പദ്ധതി യാഥാര്‍ത്ഥ്യമാക്കിയത്. 14 രാജ്യങ്ങളില്‍ നിന്നുള്ള ആയിരക്കണക്കിന് ശാസ്ത്രജ്ഞരുടെയും സാങ്കേതിക വിദഗ്ധരുടെയും മുപ്പത് വര്‍ഷത്തെ പരിശ്രമത്തിന്റെ ഫലമാണ് ജെയിംസ് വെബ് സ്‌പേസ് ടെലിസ്‌കോപ്പ്.

2007-ല്‍ തുടങ്ങിയ നാസയുടെ പദ്ധതിയാണ് ഇതോടെ യാഥാര്‍ഥ്യമാകുന്നത്. 2016 ലാണു ദൂരദര്‍ശനി നിര്‍മാണം പൂര്‍ത്തിയായത്. പിന്നീട് സാങ്കേതിക പ്രശ്നങ്ങളാണു തടസമായത്.

31 വര്‍ഷമായി ബഹിരാകാശത്തുള്ള ഹബ്ബിള്‍ ടെലിസ്‌കോപ്പിന്റെ 100 മടങ്ങു കരുത്താണു ജയിംസ് വെബിന്. ഹബ്ബിള്‍ പ്രകാശ, യുവി കിരണങ്ങള്‍ ഉപയോഗിച്ചാണ് ചിത്രങ്ങളെടുത്തതെങ്കില്‍ ജയിംസ് വെബ് ഇന്‍ഫ്രാ റെഡ് കിരണങ്ങള്‍ ഉപയോഗിച്ചാണു പ്രവര്‍ത്തിക്കുന്നത്.

ജെയിംസ് വെബ്ബില്‍നിന്നുള്ള ഡേറ്റയ്ക്കായി കാത്തിരിക്കുന്നത് ആയിരത്തിലേറെ ബഹിരാകാശ ഗവേഷകരാണ്. സൗരയൂഥത്തിനു പുറത്തുള്ള ഗ്രഹങ്ങളെക്കുറിച്ചു നിര്‍ണായക വിവരം ജെയിംസ് വെബ് ദൗത്യത്തിലൂടെ ലഭിക്കുമെന്നാണു സൂചന. ഭൂമിക്കു പുറത്ത് ജീവനുണ്ടോയെന്ന ചോദ്യത്തിനും ഈ ദൂരദര്‍ശിനി നല്‍കുന്ന വിവരം പ്രധാനമാണ്.