ഫ്‌ളോറിഡ: ഫ്‌ളോറിഡ സെന്റ് അഗസ്റ്റിന്‍ രൂപതയുടെ പുതിയ ബിഷപ്പായി അര്‍ക്കന്‍സാസ് വൈദികനായ എറിക് പോള്‍മിയറിനെ ഫ്രാന്‍സിസ് മാര്‍പാപ്പ നിയമിച്ചു. 76 കാരനായ ബിഷപ്പ് ഫിലിപ്പ് ജെ. എസ്റ്റെവസ വിരമിച്ചതിനെ തുടര്‍ന്നാണ് 50 വയസുകാരനായ പോള്‍മിയറുടെ നിയമനം. ജൂലൈ 22 ന് രൂപതാ കത്തീഡ്രലില്‍ നടക്കുന്ന ചടങ്ങില്‍ പോള്‍മിയര്‍ സ്ഥാനമേല്‍ക്കും.
''സഭയെ സേവിക്കാന്‍ വിളിക്കപ്പെട്ട അവസരത്തിന് എന്നും ഞാന്‍ നന്ദിയുള്ളവനാണ്. വൈദീകനായ ശേഷം ആദ്യമായി കുര്‍ബാന അര്‍പ്പിച്ച സ്ഥലത്ത് തന്നെ അവസരം ലഭിച്ചത് ഇരട്ടി സന്തോഷം നല്‍കുന്നു. രൂപതാ ബിഷപ് എന്ന നിലയിലുള്ള എല്ലാ പ്രവര്‍ത്തികളും ദൈവ സ്തുതിക്ക് ചേരുംവിധമാകാന്‍ വിശ്വാസികളുടെ പ്രാര്‍ത്ഥന എന്നും ഉണ്ടാകണം.'' നിയുക്ത ബിഷപ് എറിക് പോള്‍മിയര്‍ പറഞ്ഞു.
24 വര്‍ഷത്തെ പൗരോഹിത്യ ശുശ്രൂഷയിലൂടെ കത്തോലിക്കാ ജീവിതത്തിന്റെ പൂര്‍ണതയിലെത്തിയ വ്യക്തിയാണ് എറിക് പോള്‍മിയറെന്ന് ലിറ്റില്‍ റോക്കിലെ ബിഷപ്പ് ആന്റണി ബി. ടെയ്ലര്‍ പറഞ്ഞു. ലിറ്റില്‍ റോക്ക് രൂപതയിലെ ഏറ്റവും കഴിവുള്ള വൈദികരില്‍ ഒരാളാണ് പോള്‍മിയര്‍. അദ്ദേഹത്തിന്റെ അഭാവം രൂപതയ്ക്ക് വലിയ നഷ്ടമാണെങ്കിലും രാജ്യത്തെ പ്രധാനപ്പെട്ട അജപാലന സംഘത്തെ നയിക്കാനുള്ള ഭാഗ്യം അദ്ദേഹത്തിന് ലഭിച്ചതില്‍ സന്തുഷനാണ്. ''നമ്മളെല്ലാം ഒരു സഭയാണ്. പോള്‍മിയറെ ബിഷപ്പായി ലഭിച്ചതില്‍ സെന്റ് അഗസ്റ്റിന്‍ രൂപതയുടെ ഭാഗ്യത്തില്‍ ഞങ്ങള്‍ സന്തോഷിക്കുന്നു.'' അദ്ദേഹം പറഞ്ഞു.
1971 ജൂലൈ 20 ന് കൊളറാഡോ സ്പ്രിംഗ്‌സില്‍ ജനിച്ച അദ്ദേഹം മൂന്ന് സഹോദരന്മാര്‍ക്കും ഒരു സഹോദരിക്കുമൊപ്പം പാരീസിലെ അര്‍ക്കന്‍സസിലാണ് വളര്‍ന്നത്. 1991 ല്‍ അര്‍ക്കന്‍സാസ് യൂണിവേഴ്‌സിറ്റിയില്‍ നിന്ന് മെക്കാനിക്കല്‍ എന്‍ജിനീയറിംഗില്‍ ബിരുദം നേടി. 1992 ല്‍ അദ്ദേഹം സെമിനാരിയില്‍ ചേര്‍ന്നു. റോമിലെ ഗ്രിഗോറിയന്‍ സര്‍വകലാശാലയില്‍ നിന്ന് ദൈവശാസ്ത്ര പഠനത്തില്‍ ബിരുദവും റോമിലെ സെന്റ് തോമസ് അക്വിനാസ് സര്‍വകലാശാലയില്‍ നിന്ന് (ആഞ്ചെലിക്കം) ആത്മീയ ദൈവശാസ്ത്രത്തില്‍ ബിരുദാനന്തര ബിരുദവും നേടി. 1998 ല്‍ ലിറ്റില്‍ റോക്ക് രൂപതയുടെ വൈദികനായി അദ്ദേഹം നിയമിതനായി.
അര്‍ക്കന്‍സാസ് കത്തോലിക്കാ പത്രത്തിന്റെ ദൈവശാസ്ത്ര ഉപദേഷ്ടാവായിരുന്ന അദ്ദേഹം 2007 മുതല്‍ 2016 വരെ, ഫെര്‍ട്ടിലിറ്റി അവബോധത്തിലും സ്വാഭാവിക കുടുംബാസൂത്രണത്തിലും നിര്‍ദ്ദേശങ്ങള്‍ നല്‍കുന്ന കപ്പിള്‍ ടു കപ്പിള്‍ ലീഗിന്റെ ദേശീയ ഡയറക്ടര്‍ ബോര്‍ഡ് അംഗമായിരുന്നു. 2016 മുതല്‍ 2019 വരെ വിശ്വാസ രൂപീകരണ ഓഫീസിന്റെയും ഡീക്കന്‍ രൂപീകരണ ഓഫീസിന്റെയും ഡയറക്ടറായി സേവനമനുഷ്ഠിച്ചിട്ടുണ്ട്. 2019 മുതല്‍ വൈദികരുടെ തുടര്‍ വിദ്യാഭ്യാസ ഡയറക്ടറുമായി. ലിറ്റില്‍ റോക്കിലെ ഏറ്റവും വലിയ കത്തോലിക്കാ ഇടവകയായ ക്രൈസ്റ്റ് ദി കിംഗിന്റെ പാസ്റ്ററാണ് നിയമന ഉത്തരവ് വരുമ്പോള്‍ അദ്ദേഹം.
നോര്‍ത്ത് ഈസ്റ്റ്, നോര്‍ത്ത് സെന്‍ട്രല്‍ ഫ്‌ളോറിഡ എന്നിവിടങ്ങളിലെ 17 കൗണ്ടികള്‍ ഉള്‍ക്കൊള്ളുന്നതാണ് സെന്റ് അഗസ്റ്റിന്‍ രൂപത. ഒന്നരലക്ഷത്തിലധികം കത്തോലിക്കാ വിശ്വാസികള്‍ ഇവിടെയുണ്ട്.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.