ന്യൂഡല്ഹി: ഒളിമ്പ്യന് പിടി ഉഷ രാജ്യസഭാംഗമായി സത്യപ്രതിജ്ഞ ചെയ്തു. ഹിന്ദിയിലായിരുന്നു സത്യപ്രതിജ്ഞ. രാവിലെ പതിനൊന്നിന് രാജ്യസഭ ചേര്ന്നയുടനെയായിരുന്നു ഉഷയുടെ സത്യപ്രതിജ്ഞ. സത്യപ്രതിജ്ഞക്ക് ശേഷം പി.ടി ഉഷ പ്രധാനമന്ത്രി നരേന്ദ്ര മോഡിയെ കണ്ടു.
ഹിന്ദിയില് പ്രതിജ്ഞ ചൊല്ലിയതിനെ മോഡി അഭിനന്ദിച്ചെന്ന് ഉഷ പറഞ്ഞു. കൂടുതല് പേര് സംസാരിക്കുന്ന ഭാഷയായതിനാലാണ് ഹിന്ദിയില് സത്യപ്രതിജ്ഞ ചെയ്തതെന്ന് ഉഷ വിശദീകരിച്ചു. കേരളത്തിന് എയിംസ് അനുവദിക്കണമെന്ന് പ്രധാനമന്ത്രിയോട് അഭ്യര്ത്ഥിച്ചെന്നും, സംസ്ഥാന വികസനത്തിനും, സ്പോര്ട്സിന്റെ വളര്ച്ചയ്ക്കും എല്ലാ എംപിമാരോടും ഒപ്പം ചേര്ന്ന് പ്രവര്ത്തിക്കുമെന്നും അവര് വ്യക്തമാക്കി.
വിവിധ മേഖലകളില് പ്രശസ്തരായ പി.ടി ഉഷ ഉള്പ്പെടെ നാലു പേരെയാണ് ദക്ഷിണേന്ത്യയില് നിന്ന് കഴിഞ്ഞയാഴ്ച രാജ്യസഭയിലേക്ക് നാമനിര്ദേശം ചെയ്തത്. സുരേഷ് ഗോപിക്ക് പിന്നാലെ കേരളത്തില്നിന്ന് രാജ്യസഭയിലേക്ക് നാമനിര്ദേശം ചെയ്യപ്പെട്ട എംപിയാണ് പി.ടി ഉഷ. കഴിഞ്ഞ ദിവസം ഡല്ഹിയിലെത്തിയ പി.ടി ഉഷ ബിജെപി ദേശീയ അധ്യക്ഷന് ജെപി നഡ്ഡയുമായി കൂടിക്കാഴ്ച നടത്തിയിരുന്നു.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26