ന്യൂയോർക്ക്: മൂന്നാം ലോക കേരളസഭയുടെ അമേരിക്കന്‍ മേഖലാ സമ്മേളനം ജൂണ്‍ 9,10,11 തിയതികളില്‍ ന്യൂയോര്‍ക്ക് നഗരത്തില്‍ ടൈംസ് സ്ക്വയറിലെ മാരിയേറ്റ് മാർക്യുസ് ഹോട്ടലിൽ അരങ്ങേറുമ്പോൾ അതിന് ഫൊക്കാനയുടെ ആശംസകൾ നേരുന്നു. അമേരിക്കയിൽ ആദ്യമായാണ് ലോക കേരളസഭയുടെ മേഖലാ സമ്മേളനം നടത്തുന്നത്. കേരളത്തിന് പുറത്തു ജീവിക്കുന്ന മലയാളികളുടെ പ്രതിനിധികള്‍ ജനപ്രതിനിധികള്‍ക്കൊപ്പം ചേര്‍ന്ന് ലോക മലയാളി സമൂഹത്തെ സംബന്ധിച്ച വിഷയങ്ങള്‍ ചര്‍ച്ച ചെയ്യാന്‍ ഒത്തുകൂടുന്ന വേദിയെ ഫൊക്കാന സന്തോഷപൂർവ്വം സ്വാഗതം ചെയ്യുകയാണ്. പ്രവാസലോകത്തിന്റെ പ്രശ്നങ്ങൾ ഭരണകൂടത്തിന്റെ മുന്നിൽ എത്തിക്കാൻ കിട്ടുന്ന ഒരു വേദിയെ ഫൊക്കാന ഒരിക്കലും തള്ളിപ്പറയില്ല. പ്രവാസികളുടെ ഉന്നമനമാണ് ഫൊക്കാനയുടെ ലക്ഷ്യം.
അടഞ്ഞു കിടക്കുന്ന വീടുകൾക്ക് നികുതി ഏർപ്പെടുത്തും എന്ന നിർദ്ദേശം വന്നോപ്പോൾ തന്നെ ഫൊക്കാന പ്രസിഡന്റ് ഡോ. ബാബു സ്റ്റീഫൻ കേരളാ മന്ത്രിസഭയുമായി സംസാരിച്ചു ആ നിർദ്ദേശം പിൻവലിപ്പിക്കാൻ സാധിച്ചു. അങ്ങനെ പ്രവാസികളുടെ പ്രശ്നങ്ങൾ ഭരണകൂടത്തിന്റെ ശ്രദ്ധയിൽ പെടുത്തുവാൻ ഫൊക്കാന എപ്പോഴും ശ്രമിക്കാറുണ്ട്. അതുപോലെ കേരളവികസനത്തിന് ക്രിയാത്മക നിര്‍ദ്ദേശങ്ങളും സംഭാവനകളും നല്‍കുന്നതിനും ഫൊക്കാന എന്നും ശ്രദ്ധിക്കാറുണ്ട്.
പ്രതിനിധി സമ്മേളനത്തിൽ പങ്കെടുക്കാൻ ആരും പണം നൽകേണ്ടതില്ല. രജിസ്ട്രേഷൻ പൂർണ്ണമായും സൗജന്യമാണെന്ന് നോര്‍ക്ക ഡയറക്ടര്‍ ഡോ.അനിരുദ്ധനും ഓര്‍ഗനൈസിങ്ങ് കമ്മിറ്റിയുടെ പ്രസിഡന്റ് കെ.ജി.മന്മഥന്‍ നായരും അറിയിച്ചു. സമ്മേളനത്തിന്റെ സുഗമമായ നടത്തിപ്പിനായി തിരഞ്ഞെടുത്ത വിവിധ കമ്മിറ്റികളുടെ പ്രവര്‍ത്തനം ഇതിനകം പുരോഗമിച്ചുകൊണ്ടിരിക്കുന്നതായും അവർ അറിയിച്ചു. കേരളാ ഗവൺമെന്റിനു ധനചെലവില്ലാതെ സ്പോൺസർമാരിൽ നിന്നും ധനം സമാഹരിച്ചാണ് ഇതിന്റെ ചെലവുകൾ നടത്തുന്നത്. അതുകൊണ്ട് തന്നെ ഫൊക്കാന പ്രസിഡന്റ് ഡോ. ബാബു സ്റ്റീഫൻ ഇതിന്റെ മുഖ്യ സ്പോൺസർ ആയി വരുകയും മേഖലാ സമ്മേളനത്തിന് എല്ലാ സഹകരണവും ഉറപ്പു നൽകുകയും ചെയ്തിട്ടുണ്ട്.
2018 ല്‍ രൂപീകരിച്ച ലോക കേരള സഭയുടെ സമ്മേളനങ്ങള്‍ 2018, 2020, 2022 വര്‍ഷങ്ങളില്‍ കേരള നിയമസഭാ സമുച്ചയത്തില്‍ നടന്നിരുന്നു. ഇത് കൂടാതെ ആദ്യ റീജിയണല്‍ സമ്മേളനം ദുബായിലും യൂറോപ്യന്‍ രാജ്യങ്ങളുടെ റീജിയണല്‍ സമ്മേളനം ലണ്ടനിലും നടന്നിരുന്നു. യു.എസ്.എ., കാനഡ, തെക്കനമേരിക്കന്‍ - കരീബിയന്‍ മേഖലകള്‍ എന്നിവ ഉള്‍പ്പെടുന്ന അമേരിക്കന്‍ രാജ്യങ്ങളുടെ മേഖലാ സമ്മേളനമാണ് ന്യൂയോർക്കിൽ നടക്കുന്നത്.
മുഖ്യമന്ത്രി പിണറായി വിജയന്‍, നിയമസഭാ സ്പീക്കര്‍ എ.എന്‍. ഷംസിര്‍, ധനകാര്യ മന്ത്രി കെ.എൻ. ബാലഗോപാൽ, നോര്‍ക്കാ റസിഡന്റ് വൈസ് ചെയര്‍മാന്‍ ശ്രീരാമകൃഷ്ണന്‍, ചീഫ് സെക്രട്ടറി വി.പി.ജോയി തുടങ്ങി പ്രമുഖർ സമ്മേളനത്തില്‍ പങ്കെടുക്കും.
ലോക കേരള സഭയുടെ അമേരിക്കന്‍ മേഖലാ സമ്മേളനത്തിന് ഫൊക്കാനയുടെ എല്ലാവിധ ആശംസകളും നേരുന്നതായി ഫൊക്കാന പ്രസിഡന്റ് ഡോ. ബാബു സ്റ്റീഫൻ, സെക്രട്ടറി ഡോ. കല ഷഹി, ട്രഷർ ബിജു ജോൺ, എക്സ്. വൈസ് പ്രസിഡന്റ് ഷാജി വർഗീസ്, ട്രസ്ററി ബോർഡ് ചെയർമാൻ സജി പോത്തൻ, വൈസ് പ്രസിഡന്റ് ചക്കോ കുര്യൻ, ജോയിന്റ് സെക്രട്ടറി ജോയി ചക്കപ്പാൻ, അഡിഷണൽ ജോയിന്റ് സെക്രട്ടറി സോണി അമ്പൂക്കൻ, ജോയിന്റ് ട്രഷർ ഡോ. മാത്യു വർഗീസ്, ജോയിന്റ് അഡീഷണൽ ട്രഷർ ജോർജ് പണിക്കർ, വിമെൻസ് ഫോറം ചെയർ ഡോ. ബ്രിജിറ്റ് ജോർജ്, കൺവെൻഷൻ ചെയർമാൻ വിപിൻ രാജ് എന്നിവർ അറിയിച്ചു.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26