ഓസ്ട്രേലിയയിൽ ആദ്യമായി മനുഷ്യനിൽ പക്ഷിപ്പനി; ​രോ​ഗബാധ സ്ഥിരീകരിച്ചത് ഇന്ത്യയിൽ നിന്ന് മടങ്ങിയ കുട്ടിയിൽ‌

കാൻബെറ: ഓസ്ട്രേലിയയിൽ ആശങ്ക പരത്തി മനുഷ്യനിൽ പ​ക്ഷിപ്പനി സ്ഥിതീകരിച്ചു. ഓസ്ട്രേലിയയിൽ നിന്ന് ഏതാനും ആഴ്ചകൾ മുൻപ് ഇന്ത്യയിലെത്തിയ കുട്ടിയെ ഇന്ത്യയിൽ പരിശോധിച്ചപ്പോഴാണ് രോ​ഗബാധ സ്ഥിരീകരിച്ചത്. വിക്ടോറിയ ന​ഗരത്തിലാണ് ഏവിയൻ ഇൻഫ്ലുവൻസ എ (H5N1) അണുബാധ സ്ഥിരീകരിച്ചത്. ഓസ്ട്രേലിയയിലെ ആദ്യത്തെ കേസാണിത്.

പക്ഷിപ്പനി മനുഷ്യരിലേക്ക് പകർന്നതായി ഇതുവരെ റിപ്പോർട്ടുകൾ ഇല്ലെന്നും ആശങ്കപ്പെടേണ്ട സാഹചര്യമില്ലെന്നും വിക്ടോറിയൻ ഡിപ്പാർട്ട്മെന്റ് ഓഫ് ഹെൽത്ത് അറിയിച്ചു. മനുഷ്യരിൽ നിന്ന് മനുഷ്യരിലേക്ക് രോ​ഗം പടരാനുള്ള സാധ്യത വളരെ കുറാവണെന്നും പ്രസ്താവനയിൽ പറയുന്നു.

മാർച്ചിലാണ് രോ​ഗം റിപ്പോർട്ട് ചെയ്ത കുട്ടി ഇന്ത്യയിലെത്തിയത്. പിന്നാലെ ​ഗുരുതരമായ അണുബാധ ഉണ്ടായെന്നും ഏറെ നാളത്തെ ചികിത്സയ്‌ക്കൊടുവിൽ ഭേദമായെന്നും വൃത്തങ്ങൾ‌ അറിയിച്ചു. വിക്ടോറിയ ഫാമിൽ പക്ഷിപ്പനി സ്ഥിരീകരിച്ചതിന് പിന്നാലെയാണ് മനുഷ്യനിലും പക്ഷിപ്പനി സ്ഥിരീകരിച്ച വിവരം ആരോ​ഗ്യ വകുപ്പ് പുറത്തുവിടുന്നത്.

മുട്ട ഫാമിൽ കോഴികൾ ഒന്നടങ്കം ചത്തൊടുങ്ങിയതോടെ നടത്തിയ പഠനത്തിലാണ് ഫാമിൽ ഏവിയൻ ഇൻഫ്ലുവൻസ വൈറസിന്റെ സാന്നിധ്യം കണ്ടെത്തിയത്. H7N7 വകഭേദമാണ് ഇതിന് പിന്നിലെന്ന് റിപ്പോർട്ടിൽ പറയുന്നു. മനുഷ്യരിൽ റിപ്പോർട്ട് ചെയ്യപ്പെട്ട H5N1 വകഭേദത്തിൽ നിന്ന് വ്യത്യസ്തമാണിത്. ആ​ഗോളതലത്തിൽ ആശങ്ക പരത്തുന്ന H5N1 മനുഷ്യരിൽ നിന്ന് മനുഷ്യരിലേക്ക് പകരുന്നതിന് തെളിവൊന്നുമില്ലെന്നും വൃത്തങ്ങൾ അറിയിച്ചു.