കൊച്ചി: കേരളത്തിലെ ആദ്യ മലയാളി വനിതാ ഹൈക്കോടതി ചീഫ് ജസ്റ്റിസ് കെ കെ ഉഷ (81) അന്തരിച്ചു. അഭിഭാഷക വൃത്തിയിൽ സ്ത്രീകൾ കുറവായിരുന്ന കാലയളവിലാണ് കെ കെ ഉഷ സ്ത്രീകൾക്ക് വേണ്ടി നിലകൊണ്ട് തന്റെ വ്യക്തിമുദ്ര പതിപ്പിച്ചത്.
1961 -ലാണ് കെ. കെ. ഉഷ അഭിഭാഷക വൃത്തി ആരംഭിക്കുന്നത് . 1979 ൽ കേരള ഹൈക്കോടതിയിൽ സർക്കാർ വാദിയായി നിയമിതയായി. 1991 ഫെബ്രുവരി 25 മുതൽ 2001 ജൂലൈ 3 വരെ ഹൈക്കോടതിയിൽ ജഡ്ജിയും പിന്നീട് ചീഫ് ജസ്റ്റിസുമായി. 2000 മുതൽ 2001 വരെ ചീഫ് ജസ്റ്റിസായിരുന്നു. ബാറിൽ നിന്ന് ഹൈക്കോടതിയിൽ ചേരുകയും ചീഫ് ജസ്റ്റിസാകുകയും ചെയ്ത ആദ്യ വനിതയായിരുന്നു കെ. കെ. ഉഷ. ഹൈക്കോടതിയിൽ നിന്ന് വിരമിച്ച ശേഷം 2001 മുതൽ 2004 വരെ ദില്ലി ആസ്ഥാനമായുള്ള കസ്റ്റംസ്, എക്സൈസ്, സർവീസ് ടാക്സ് അപ്പലേറ്റ് ട്രൈബ്യൂണലിന്റെ പ്രസിഡന്റായിരുന്നു.
1975 ൽ ജർമ്മനിയിലെ ഹാംബർഗിൽ നടന്ന ഇന്റർനാഷണൽ ഫെഡറേഷൻ ഓഫ് വിമൻ ലോയേഴ്‌സിന്റെ ഇന്റർനാഷണൽ കൺവെൻഷനിൽ ഉഷ ഇന്ത്യയെ പ്രതിനിധീകരിച്ചു. ഇന്റർനാഷണൽ ഫെഡറേഷൻ ഓഫ് വുമൺ ലോയേഴ്‌സും ഇന്റർനാഷണൽ ഫെഡറേഷൻ ഓഫ് വിമൻ ഓഫ് ലീഗൽ കരിയറും സംഘടിപ്പിച്ച “സ്ത്രീകളെ സംബന്ധിച്ച് എല്ലാത്തരം വിവേചനങ്ങളും ഇല്ലാതാക്കുന്നതിനുള്ള കൺവെൻഷൻ” എന്ന ഐക്യരാഷ്ട്രസഭയുടെ സംയുക്ത സെമിനാറിൽ അവർ ഇന്ത്യയുടെ പ്രതിനിധിയായിരുന്നു. തിരുവനന്തപുരത്തെ നിരാലംബരായ സ്ത്രീകളുടെ അനാഥാലയമായ "ശ്രീ നാരായണ സേവിക സമാജം" നടത്തിപ്പിൽ അവർ പങ്കാളിയായിരുന്നു. 2005 ജനുവരി മുതൽ 2006 ഒക്ടോബർ വരെ കെ. കെ. ഉഷ ഇന്ത്യൻ പീപ്പിൾസ് ട്രിബ്യൂണൽ (ഐപിടി) ഒറീസയിലെ സാമുദായിക സാഹചര്യത്തെക്കുറിച്ച് അന്വേഷിക്കാൻ നേതൃത്വം നൽകി.
സൗമ്യമായ പെരുമാറ്റവും സമഭാവനയോടെയുള്ള ഇടപെടലും കെ കെ ഉഷയുടെ സവിശേഷതയായിരുന്നു. നീതിന്യായ മേഖലയ്ക്ക് വലിയ സംഭാവന നൽകിയ ജഡ്ജിയും അഭിഭാഷകയുമായിരുന്നു ജസ്റ്റിസ് കെ.കെ.ഉഷ എന്ന് മുഖ്യമന്ത്രി അനുശോചന സന്ദേശത്തിൽ പറഞ്ഞു.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.