കഴിഞ്ഞ മൂന്ന് സീസണുകളില്‍ തുടര്‍ച്ചയായി ടീമിനെ പ്ലേ ഓഫിലെത്തിച്ച മുന്‍ പരിശീലകന്‍ സെര്‍ബിയന്‍ കോച്ച് ഇവാന്‍ വുക്കോമനോവിച്ചിനെ തിരിച്ചു വിളിക്കണമെന്ന മുറവിളി ആരാധകരില്‍ നിന്നുയരുന്നുണ്ട്.
കൊച്ചി: ഇന്ത്യന്‍ സൂപ്പര്‍ ലീഗ് ക്ലബ്ബ് കേരള ബ്ലാസ്റ്റേഴ്സ് മുഖ്യ പരിശീലക സ്ഥാനത്ത് നിന്ന് മികായേല്‍ സ്റ്റാറെയെ പുറത്താക്കി. സീസണിലെ ടീമിന്റെ ദയനീയ പ്രകടനങ്ങളുടെയും തുടര്‍ തോല്‍വിയുടെയും പശ്ചാത്തലത്തിലാണ് നടപടി. സഹ പരിശീലകരെയും പുറത്താക്കിയിട്ടുണ്ട്. സാമൂഹിക മാധ്യമങ്ങളിലൂടെയാണ് ക്ലബ്ബ് ഇക്കാര്യം അറിയിച്ചത്.
സീസണില്‍ പ്രതീക്ഷക്കൊത്ത പ്രകടനം പുറത്തെടുക്കാന്‍ ടീമിന് സാധിച്ചിരുന്നില്ല. നിലവില്‍ 12 മത്സരങ്ങളില്‍ നിന്ന് 11 പോയന്റുമായി പട്ടികയില്‍ 10-ാം സ്ഥാനത്താണ് ബ്ലാസ്റ്റേഴ്സ്. മൂന്ന് മത്സരങ്ങളില്‍ മാത്രമാണ് ലീഗില്‍ ടീമിന് വിജയിക്കാന്‍ കഴിഞ്ഞത്.
രണ്ട് മത്സരങ്ങള്‍ സമനിലയില്‍ കലാശിച്ചപ്പോള്‍ ഏഴ് മത്സരങ്ങള്‍ പരാജയപ്പെട്ടു. തുടര്‍ തോല്‍വികളുടെ പശ്ചാത്തലത്തില്‍ ബ്ലാസ്റ്റേഴ്സ് ആരാധക കൂട്ടായ്മയായ മഞ്ഞപ്പടയടക്കം നേരത്തേ പ്രതിഷേധവുമായി രംഗത്തെത്തിയിരുന്നു. കഴിഞ്ഞ മത്സരത്തില്‍ മോഹന്‍ ബഗാനെതിരേ രണ്ടിനെതിരേ മൂന്ന് ഗോളുകള്‍ക്കാണ് പരാജയപ്പെട്ടത്.
ഇവാന്‍ വുക്കുമാനോവിച്ചിന്റെ പകരക്കാരനായി സീസന്റെ തുടക്കത്തിലാണ് സ്റ്റാറെ ബ്ലാസ്റ്റേഴ്സിന്റെ പരിശീലകനായെത്തിയത്. 48 കാരനായ സ്റ്റാറെയ്ക്ക് 2026 വരെയാണ് ബ്ലാസ്റ്റേഴ്‌സുമായി കരാറുണ്ടായിരുന്നത്.
സ്വീഡന്‍, ഗ്രീസ്, ചൈന, യു.എസ്, തായ്‌ലാന്‍ഡ് തുടങ്ങിയിടങ്ങളിലായി എഐകെ, പാനിയോണിയോസ്, ഐഎഫ്‌കെ ഗോട്ടെന്‍ബെര്‍ഗ്, ഡാലിയാന്‍ യിഫാങ്, ബികെ ഹാക്കെന്‍, സാന്‍ ജോസ് എര്‍ത്ത്ക്വാക്‌സ്, സാര്‍പ്‌സ് ബോര്‍ഗ് 08, തുടങ്ങിയ ടീമുകളെ പരിശീലിപ്പിച്ചിട്ടുണ്ട്.
ഇരുപത് വര്‍ഷം നീണ്ട പരിശീലന പരിചയ സമ്പത്തുള്ള സ്റ്റാറെ വിവിധ ക്ലബ്ബുകളിലായി നാനൂറോളം മത്സരങ്ങള്‍ കൈകാര്യം ചെയ്തിട്ടുണ്ട്. സ്വീഡിഷ് ക്ലബായ വാസ്ബി യുണൈറ്റിലൂടെയാണ് പരിശീലക കുപ്പായം അണിയുന്നത്. 2009 ല്‍ സ്വീഡിഷ് ക്ലബായ എഐകെയുടെ മുഖ്യ പരിശീലകനായി.
എഐകെയ്‌ക്കൊപ്പം സ്വീഡിഷ് ലീഗ് ആയ ഓള്‍സ്വെന്‍സ്‌കാന്‍, സൂപ്പര്‍കുപെന്‍ നേടിയതും ഐഎഫ്‌കെ ഗോട്ടെന്‍ബെര്‍ഗിനൊപ്പം സ്വെന്‍സ്‌ക കുപെന്‍ നേടിയതും അദേഹത്തിന്റെ കരിയറിലെ സുപ്രധാന നേട്ടങ്ങളാണ്. എന്നാല്‍ ആ മികവ് ബ്ലാസ്റ്റേഴ്‌സിനായി പുറത്തെടുക്കാന്‍ സ്റ്റാറെയ്ക്ക് സാധിച്ചില്ല.
സ്റ്റാറെയെ പുറത്താക്കിയ സാഹചര്യത്തില്‍ കഴിഞ്ഞ മൂന്ന് സീസണുകളില്‍ തുടര്‍ച്ചയായി ടീമിനെ പ്ലേ ഓഫിലെത്തിച്ച മുന്‍ പരിശീലകന്‍ സെര്‍ബിയന്‍ കോച്ച് ഇവാന്‍ വുക്കോമനോവിച്ചിനെ തിരിച്ചു വിളിക്കണമെന്ന മുറവിളി ആരാധകരില്‍ നിന്നുയരുന്നുണ്ട്. എന്നാല്‍ ക്ലബ് മാനേജ്‌മെന്റ് ഇക്കാര്യത്തില്‍ തീരുമാനമൊന്നും എടുത്തിട്ടില്ല എന്നാണറിയുന്നത്.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.