പാലാ അൽഫോൻസ കോളജിലെ പൂർവ വിദ്യാർത്ഥിനി സംഗമം 'അൽസ്റ്റാജിയ' വര്‍ണാഭമായി

പാലാ: പാലാ അൽഫോൻസ കോളജിന്റെ വജ്ര ജൂബിലി സമാപനത്തോടനുബന്ധിച്ചുള്ള പൂർവ വിദ്യാർത്ഥിനീ സംഗമം 'അൽസ്റ്റാജിയ' വര്‍ണാഭമായി. തങ്ങളുടെ മാതൃ കലാലയത്തിൽ പൂർവ വിദ്യാർത്ഥിനികൾ ഒരിക്കൽ കൂടി ഒത്തുചേർന്നു.

സംഗമത്തോടനുബന്ധിച്ച് വർണാഭമായ ഇൻ്റർകോളേജിയറ്റ് ഡാൻസ് മത്സരം കോഡാക്സ് 2 കെ നടന്നു. വിവിധ ടീമുകൾ പങ്കെടുത്ത വാശിയേറിയ മത്സരത്തിൽ സെന്റ് ജോസഫ്സ് എൻജിനീയറിങ് കോളജ് ചൂണ്ടച്ചേരി ഒന്നാം സ്ഥാനവും മാർ ആഗസ്തീനോസ് കോളജ് രാമപുരം രണ്ടാം സ്ഥാനവും ദേവമാതാ കോളജ് കുറവിലങ്ങാട് മൂന്നാം സ്ഥാനവും കരസ്ഥമാക്കി. വിജയികൾക്ക് യഥാക്രമം 15000 രൂപ, 10000 രൂപ, 7000 രൂപ വീതം കാഷ് അവാർഡുകളും എവർ റോളിങ് ട്രോഫിയും സർട്ടിഫിക്കറ്റുകളും സമ്മാനമായി നല്‍കി.

പൂർവ വി​ദ്യാർത്ഥി സംഘമത്തിന്റെ ഔദ്യോഗിക സമ്മേളനം 25ന് രാവിലെ 11.30 ന് ആരംഭിച്ചു. കോളജ് പ്രിൻസിപ്പൽ റവ ഡോ. ഷാജി ജോൺ ചടങ്ങിലേക്ക് ഏവരേയും സ്വാഗതം ചെയ്തു. കോളേജ് അലുമ്നി അസോസിയേഷൻ പ്രസിഡന്റ് ഡോ. ആൻസി ജോസഫ് അധ്യക്ഷത വഹിച്ച സമ്മേളനത്തിൽ മാർ സ്ലീവാ മെഡിസിറ്റി ചീഫ് ഓഫ് മെഡിക്കൽ സർവ്വീസസ് എയർ കൊമേഡ് ഡോ. പൗളിൻ ബാബു മുഖ്യാതിഥി ആയിരുന്നു.

ആർമിയിലെ പരിശീലനം സ്വന്തം ജീവിതത്തെ എപ്രകാരം ചിട്ടപ്പെടുത്തിയെന്ന് വിവരിച്ച ഡോ. പൗളിൻ ബാബു ഓരോ വിദ്യാർത്ഥിനിയും തന്റെ ഉള്ളിലെ പ്രതിഭാശാലിയെ ഉണർത്തി ഉരച്ചു മിനുക്കി കരുത്തുള്ളവളായി കഴമ്പുള്ള ജീവിതം നയിക്കണമെന്ന് ഉദ്ബോധിപ്പിച്ചു. 'സ്വർഗം' സിനിമയുടെ സംവിധാനം, അഭിനയം, നിർമ്മാണം ഇവയിലൂടെ പ്രശസ്തയായ പൂർവ വിദ്യാർത്ഥിനി ഡോ. ലിസി കെ ഫെർണാണ്ടസിനെ സമ്മേളനത്തിൽ ആദരിച്ചു.

ഈ അധ്യയന വർഷം വിരമിക്കുന്ന റവ ഡോ. ഷാജി ജോൺ (പ്രിൻസിപ്പൽ), ഡോ ജസ്റ്റി ഇമ്മാനുവൽ (ഹിന്ദി വിഭാഗം), ബിജിമോൾ ജോസഫ് (ലൈബ്രേറിയൻ), ബോസ്കോച്ചൻ തോമസ് (ഓഫീസ് സ്റ്റാഫ്) എന്നിവരെയും സുവർണ്ണ ജൂബിലി ആഘോഷിക്കുന്ന 15 പൂർവ വിദ്യാർത്ഥിനികളെയും മുൻ അധ്യാപകരെയും ചടങ്ങിൽ ആദരിച്ചു.

ഇംഗ്ലീഷ് ഡിപ്പാർട്ട്മെന്റ് മുൻ അധ്യാപിക റെബേക്കാ സൂസൻ മാർഗരറ്റ് രചിച്ച കവിതാ സമാഹാരം പ്രസ്തുത സമ്മേളനത്തിൽ പ്രകാശനം ചെയ്തു. മാഗി ജോസഫ്, ഡോ ഷൈനി ജോസ്, പെണ്ണമ്മ ജോസഫ് എന്നിവർ ആശംസകളർപ്പിച്ചു സംസാരിച്ചു. സംഗമത്തോടനുബന്ധിച്ച് വിവിധ കലാപരിപാടികളും മത്സരങ്ങളും നടന്നു.

പൂർവ വിദ്യാർത്ഥിനി സംഗമത്തോടനുബന്ധിച്ച് വസ്ത്രാഭരണങ്ങളുടെയും കരകൗശല വസ്തുക്കളുടെയും പ്രദർശനവും വിപണനവും ഉണ്ടായിരുന്നു. ആഘോഷ പരിപാടികൾക്ക് കോളേജ് ബർസാർ റവ ഫാ. കുര്യാക്കോസ് വെള്ളച്ചാലിൽ, വൈസ് പ്രിൻസിപ്പൽമാരായ ഡോ സിസ്റ്റർ മിനിമോൾ മാത്യു, ഡോ സിസ്റ്റർ മഞ്ജു എലിസബത്ത് കുരുവിള, റൂബി മോൾ ഫിലിപ്പ്, ജൂലി പറമുണ്ടയിൽ, ജെസി കെ ജോസ്, പ്രൊഫ. റോസിലിൻ ജോർജ്ജ് എന്നിവർ നേതൃത്വം നല്കി.