കൊച്ചി: സീറോമലബാര്‍ സഭയുടെ പബ്ലിക് അഫയേഴ്‌സ് കമ്മീഷന്‍ സെക്രട്ടറിയായി ചങ്ങനാശേരി അതിരൂപതാംഗമായ ഫാ. ജെയിംസ് കൊക്കാവയലില്‍ നിയമിതനായി. നിലവിലെ സെക്രട്ടറി ഫാ. എബ്രഹാം കാവില്‍പുരയിടത്തില്‍ അഞ്ച് വര്‍ഷം പൂര്‍ത്തിയാക്കിയതിനെ തുടര്‍ന്നാണ് പുതിയ നിയമനം.
കമ്മീഷന്‍ ചെയര്‍മാന്‍ ആര്‍ച്ചുബിഷപ് മാര്‍ ആന്‍ഡ്രൂസ് താഴത്താണ് പെര്‍മനന്റ് സിനഡിന്റെ അംഗീകാരത്തോടെ നിയമനം നടത്തിയത്. 2020 നവംബര്‍ മാസം മുതല്‍ കമ്മീഷന്റെ അസിസ്റ്റന്റ് സെക്രട്ടറിയായി ഫാ. ജെയിംസ് പ്രവര്‍ത്തിച്ചുവരികയായിരുന്നു.
2020 ജനുവരി മാസത്തില്‍ നടന്ന സിനഡിന്റെ തീരുമാനപ്രകാരമാണ് സഭയും സമൂഹവുമായി ബന്ധപ്പെട്ട പൊതുകാര്യങ്ങള്‍ പഠിക്കുന്നതിനും വിശകലനം ചെയ്യുന്നതിനും ആവശ്യമായ നടപടികള്‍ സ്വീകരിക്കുന്നതിനുമായി സീറോമലബാര്‍ സഭയില്‍ പബ്ലിക് അഫയേഴ്‌സ് കമ്മീഷന്‍ നിലവില്‍ വന്നത്.
2025 ജനുവരിയില്‍ നടന്ന സിനഡില്‍ കമ്മീഷന്‍ അംഗങ്ങളുടെ കാലാവധി അഞ്ച് വര്‍ഷത്തേയ്ക്ക് കൂടി നീട്ടിക്കൊണ്ട് മേജര്‍ ആര്‍ച്ചുബിഷപ് കല്‍പന പുറപ്പെടുവിച്ചിരുന്നു. തൃശൂര്‍ ആര്‍ച്ചുബിഷപ് മാര്‍ ആന്‍ഡ്രൂസ് താഴത്ത് ചെയര്‍മാനും ചങ്ങനാശേരി ആര്‍ച്ചുബിഷപ് മാര്‍ തോമസ് തറയില്‍ കണ്‍വീനറുമായ കമ്മീഷനില്‍ തലശേരി ആര്‍ച്ചുബിഷപ് മാര്‍ ജോസഫ് പാംപ്ലാനി, താമരശേരി ബിഷപ് റെമിജിയൂസ് ഇഞ്ചനാനിയില്‍, കാഞ്ഞിരപ്പള്ളി ബിഷപ് മാര്‍ ജോസ് പുളിക്കല്‍ എന്നിവര്‍ അംഗങ്ങളാണ്.
2010 ല്‍ പൗരോഹിത്യ പട്ടം സ്വീകരിച്ച ഫാ. ജെയിംസ് കൊക്കാവയലില്‍ ചങ്ങനാശേരി അതിരൂപതയിലെ ദൈവശാസ്ത്ര പഠനകേന്ദ്രമായ മാര്‍ത്തോമ വിദ്യാനികേതന്റെ ഡീന്‍ ഓഫ് സ്റ്റഡീസ്, സത്യദര്‍ശനം മാസികയുടെ ചീഫ് എഡിറ്റര്‍, പബ്ലിക് റിലേഷന്‍സ് ജാഗ്രതാ വേദിയുടെ ഡയറക്ടര്‍, എക്യുമെനിസം ആന്‍ഡ് ഇന്റര്‍ റിലീജിയസ് ഡയലോഗിന്റെ ഡയറക്ടര്‍, ഡിപ്പാര്‍ട്ട്‌മെന്റ് ഓഫ് കമ്മ്യൂണിറ്റി അവയര്‍നസ് ആന്‍ഡ് റൈസ് പ്രൊട്ടക്ഷന്‍ ഡിപ്പാര്‍ട്ട്‌മെന്റ് ഡയറക്ടര്‍ എന്നി തസ്തികകളില്‍ സേവനമനുഷ്ഠിച്ച് വരുന്നു.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.