ചിക്കാ​ഗോ സീറോ മലബാർ കൺവെൻഷൻ: ന്യൂയോർക്ക് ലോങ്ങ് ഐലൻഡ് ദേവാലയത്തിൽ കിക്കോഫ് നടന്നു

ചിക്കാഗോ: 2026 ജൂലൈ ഒമ്പത് മുതൽ 12 വരെ ചിക്കാഗോയിൽ നടക്കുന്ന സീറോ മലബാർ കൺവെൻഷന്റെ പ്രചാരണത്തിന് ന്യൂയോർക്കിലെ ലോങ്ങ് ഐലൻഡ് സെന്റ് മേരീസ് സീറോ മലബാർ ദേവാലയത്തിൽ തുടക്കം. കൺവെൻഷൻ ടീമിന് ഇടവക വികാരി ഫാദർ ജോൺസ്റ്റി തച്ചാറയുടെ നേതൃത്വത്തിൽ ഇടവകാംഗങ്ങൾ സ്വീകരണം നൽകി.

ജൂബിലി കൺവീനർ ഫാദർ ജോൺ മേലേപ്പുറം, ജൂബിലി ചെയർമാൻ ജോസ് ചാമക്കാല, ബിജി സി. മാണി എന്നിവരടങ്ങുന്ന കൺവെൻഷൻ ടീമിനെ ട്രസ്റ്റിമാർ, പാരിഷ് കൗൺസിൽ അംഗങ്ങൾ, ഇടവകജനം എന്നിവർ ചേർന്ന് സ്വാഗതം ചെയ്തു. ഫാദർ ജോൺ മേലേപ്പുറം രൂപതയുടെ രജത ജൂബിലി പരിപാടികളെക്കുറിച്ചും കൺവെൻഷന്റെ പ്രാധാന്യത്തെക്കുറിച്ചും വിശദീകരിച്ചു.

കൺവെൻഷന്റെ വിജയത്തിനായി ഇടവകയുടെ പരിപൂർണ പിന്തുണ ഉണ്ടാകുമെന്ന് ഫാദർ ജോൺസ്റ്റി തച്ചാറ ഉറപ്പുനൽകി. രൂപതാ അധ്യക്ഷൻ മാർ ജോയ് ആലപ്പാട്ട് എല്ലാ വിശ്വാസികളെയും ഈ മഹത്തായ ആത്മീയ, സാംസ്കാരിക സംഗമത്തിൽ പങ്കെടുക്കുവാൻ ക്ഷണിച്ചു. ഇടവകാംഗങ്ങളുടെ ആവേശകരമായ പങ്കാളിത്തത്തിന് കൺവെൻഷൻ ടീം നന്ദി അറിയിച്ചു.

ഡിസംബർ 31 ന് മുൻപ് രജിസ്ട്രേഷൻ നടത്തി ഏർലി ബേർഡ് നിരക്കുകൾ ഉപയോഗപ്രദമാക്കാൻ കൺവെൻഷൻ ടീം ആഹ്വാനം ചെയ്തു. ലോങ്ങ് ഐലൻഡ് ഇടവകയിൽ നിന്ന് തോമസ് മാത്യു, ഷെറി ജോർജ്, ജോസഫ് മാത്യു, മാത്യു കൊച്ചുപുരക്കൽ (ട്രസ്റ്റി) എന്നിവർ രജിസ്ട്രേഷൻ പ്രവർത്തനങ്ങൾക്ക് നേതൃത്വം നൽകി. ട്രസ്റ്റിമാരായ കുര്യാക്കോസ് സെബാസ്റ്റ്യൻ, ഷിനു എബ്രഹാം , സിബി ജോർജ് എന്നിവർ കൺവെൻഷൻ ടീമിനോട് ചേർന്ന് രജിസ്ട്രേഷൻ നടപടികളിൽ സഹകരിച്ചു.

കൺവെൻഷൻ ടീമിന്റെ സന്ദർശനത്തിനിടെ 30 ലധികം രജിസ്ട്രേഷനുകൾ ഇടവകാംഗങ്ങൾ പൂർത്തിയാക്കി. കൂടുതൽ വിവരങ്ങൾക്കും രജിസ്ട്രേഷനും www.syroConvention.org എന്ന വെബ്സൈറ്റ് സന്ദർശിക്കാവുന്നതാണ്.

2026 ജൂലൈ ഒമ്പത് മുതൽ 12 വരെ ചിക്കാഗോയിലെ പ്രശസ്തമായ മക്കോർമിക് പ്ലേസ് കൺവെൻഷൻ സെന്ററിലാണ് സീറോ മലബാർ യുഎസ്എ കൺവെൻഷൻ നടക്കുന്നത്. രൂപതയുടെ ആദ്യ ഇടയനായ മാർ ജേക്കബ് അങ്ങാടിയത്തിന്റെ മെത്രാഭിഷേക ജൂബിലിയും ഈ സംഗമത്തോടൊപ്പം കൊണ്ടാടുന്നുണ്ട്.

വിശ്വാസികളെ ഒന്നിച്ച് ചേർക്കുന്ന ഈ മഹാസംഗമം പ്രവാസി ലോകത്തെ സഭയുടെ ഭാവിയെക്കുറിച്ച് വിചിന്തനം ചെയ്യാനും ആശയങ്ങൾ പങ്കുവെക്കുവാനുമുള്ള വലിയ അവസരമാണ്. ദിവസേനയുള്ള വിശുദ്ധ കുർബാന, ആരാധന എന്നിവ കൂടാതെ വിദ​ഗ്ദർ നയിക്കുന്ന ക്ലാസുകൾ, ബിസിനസ് മീറ്റുകൾ, വിവിധ സംഘടനകളുടെ കൂട്ടായ്മകൾ, ആദരം, കലാപരിപാടികൾ, മത്സരങ്ങൾ എന്നിവ കൺവെൻഷന്റെ ഭാഗമായി ഒരുക്കിയിട്ടുണ്ട്. യുവജനങ്ങൾക്കും മുതിർന്നവർക്കും പ്രത്യേക ട്രാക്കുകളിലായാണ് പരിപാടികൾ ക്രമീകരിച്ചിരിക്കുന്നത്.