വാഷിങ്ടൺ: ജനനത്തിന് മുൻപേ ഇല്ലാതാക്കപ്പെടുന്ന ജീവന്റെ കണികകൾക്ക് വേണ്ടി പ്രാർത്ഥനയുടെ കവചമൊരുക്കി അമേരിക്കൻ ജനത. വാഷിങ്ടണിൽ നടക്കാനിരിക്കുന്ന ചരിത്രപ്രസിദ്ധമായ 'മാർച്ച് ഫോർ ലൈഫ്' റാലിയുടെ മുന്നോടിയായി നടന്ന ജാഗരണ പ്രാർത്ഥന ആയിരക്കണക്കിന് വിശ്വാസികളുടെ സംഗമവേദിയായി.
അമലോത്ഭവ മാതാവിന്റെ നാമധേയത്തിലുള്ള ബസിലിക്കയിൽ നടന്ന ഭക്തിനിർഭരമായ ചടങ്ങുകളിൽ സ്ത്രീകളും കുട്ടികളും യുവാക്കളുമടക്കം അയ്യായിരത്തോളം പേരാണ് പങ്കുചേർന്നത്. കൊടും തണുപ്പിനെ വകവെക്കാതെ ജീവന്റെ സംരക്ഷണത്തിനായി ഒത്തുചേർന്നവരിൽ ഏറിയപങ്കും യുവജനങ്ങളായിരുന്നു എന്നത് ഈ സംഗമത്തെ കൂടുതൽ ശ്രദ്ധേയമാക്കി.
ഭ്രൂണഹത്യ കേവലം നിയമവിരുദ്ധമാക്കുക എന്നതിലുപരി അത്തരമൊരു ക്രൂരതയെക്കുറിച്ച് ചിന്തിക്കാൻ പോലും കഴിയാത്ത വിധം സമൂഹ മനസാക്ഷിയെ മാറ്റിയെടുക്കുകയാണ് ലക്ഷ്യമെന്ന് ലിങ്കൺ രൂപതാ ബിഷപ്പ് ജെയിംസ് ഡി. കോൺലി ഓർമ്മിപ്പിച്ചു. ദയാവധം, അക്രമങ്ങൾ, വംശീയത, ദാരിദ്ര്യം തുടങ്ങിയ വെല്ലുവിളികൾക്കിടയിലും മനുഷ്യജീവന്റെ അന്തസ് കാത്തുസൂക്ഷിക്കാൻ വിശ്വാസികൾ പ്രതിജ്ഞാബദ്ധരാകണമെന്നും അദേഹം ആഹ്വാനം ചെയ്തു.
ദിവ്യബലിക്ക് ശേഷം നടന്ന ആരാധനയിലും ജപമാല സമർപ്പണത്തിലും ആയിരങ്ങൾ ഭക്തിപൂർവ്വം പങ്കുചേർന്നു. 1973 ലെ ഭ്രൂണഹത്യ അനുകൂല വിധിക്ക് ശേഷം ആരംഭിച്ച ഈ പ്രാർത്ഥനാ യജ്ഞം 47 വർഷങ്ങളായി മുടങ്ങാതെ തുടരുന്നത് ജീവന്റെ സംസ്കാരം വളർത്താനുള്ള അമേരിക്കൻ സഭയുടെ നിശ്ചയദാർഢ്യത്തെയാണ് വിളിച്ചോതുന്നത്.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള് സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്ളീല പദപ്രയോഗങ്ങളും ദയവായി ഒഴിവാക്കുക.