യുഎഇ സന്ദർശനം ഇനി എളുപ്പം; 90 രാജ്യങ്ങൾക്ക് വിസയില്ലാത്ത പ്രവേശനം; ഇന്ത്യക്കാർക്ക് ഓൺ-അറൈവൽ വിസ

ദുബായ്: വിനോദസഞ്ചാര മേഖലയ്ക്ക് കൂടുതൽ കരുത്തേകാൻ വിസ നടപടിക്രമങ്ങൾ ലളിതമാക്കി യുണൈറ്റഡ് അറബ് എമിറേറ്റ്സ്. ലോകത്തെ 90 രാജ്യങ്ങളിൽ നിന്നുള്ള പൗരന്മാർക്ക് നിലവിൽ വിസയില്ലാതെ യുഎഇയിൽ പ്രവേശിക്കാം. സന്ദർശകരുടെ പൗരത്വത്തിന് അനുസരിച്ച് 30 ദിവസമോ 90 ദിവസമോ നീണ്ടുനിൽക്കുന്ന വിസ ഓൺ അറൈവൽ ആനുകൂല്യമാണ് ലഭിക്കുക.

സാധാരണ പാസ്‌പോർട്ടുള്ള ഇന്ത്യൻ പൗരന്മാർക്ക് യുഎഇയിലെ എല്ലാ എൻട്രി പോയിന്റുകളിലും 14 ദിവസത്തെ സിംഗിൾ എൻട്രി ‘വിസ ഓൺ അറൈവൽ’ സൗകര്യം ലഭ്യമെന്ന് അധികൃതർ അറിയിച്ചു. എന്നാൽ ഈ സൗകര്യം ലഭിക്കാൻ നിർദ്ദിഷ്ട യോഗ്യതകൾ നിർബന്ധമാണെന്ന് വ്യക്തമാക്കുന്നു. അമേരിക്ക, ബ്രിട്ടൻ, അല്ലെങ്കിൽ യൂറോപ്യൻ യൂണിയൻ രാജ്യങ്ങളിൽ നിന്നുള്ള സാധുവായ ടൂറിസ്റ്റ് വിസയോ റെസിഡൻസ് പെർമിറ്റോ ഉള്ളവർക്ക് ഈ ആനുകൂല്യം ലഭിക്കും. യുഎസ് ഗ്രീൻ കാർഡ് ഉടമകളും ഇതിന് അർഹരാണ്.

ഇതിന് പുറമെ ഓസ്‌ട്രേലിയ, കാനഡ, ജപ്പാൻ, ന്യൂസിലൻഡ്, സിംഗപ്പൂർ, ദക്ഷിണ കൊറിയ എന്നീ രാജ്യങ്ങളിൽ നിന്നുള്ള സാധുവായ റെസിഡൻസ് പെർമിറ്റ് ഉള്ളവർക്കും വിസ ഓൺ അറൈവൽ അനുവദിക്കും. എല്ലാ സാഹചര്യങ്ങളിലും പാസ്‌പോർട്ടിനും അനുബന്ധ വിസകൾക്കും കുറഞ്ഞത് ആറു മാസത്തെ കാലാവധി ശേഷിക്കുന്നതായിരിക്കണം എന്നതാണ് പ്രധാന നിബന്ധന.

അടിക്കടി യുഎഇ സന്ദർശിക്കുന്നവർക്കായി അവതരിപ്പിച്ച അഞ്ച് വർഷത്തെ മൾട്ടിപ്പിൾ എൻട്രി വിസയ്ക്ക് ഇപ്പോൾ വലിയ പ്രചാരമാണ്. സ്പോൺസറുടെ ആവശ്യമില്ലാതെ തന്നെ ഈ വിസയ്ക്ക് അപേക്ഷിക്കാം. ഒരു വർഷത്തിൽ പരമാവധി 180 ദിവസം വരെ രാജ്യത്ത് താമസിക്കാം (ഒറ്റത്തവണത്തെ സന്ദർശനം 90 ദിവസം വരെ, ഇത് വീണ്ടും 90 ദിവസത്തേക്ക് കൂടി നീട്ടാം). കഴിഞ്ഞ ആറ് മാസത്തെ ബാങ്ക് സ്റ്റേറ്റ്‌മെന്റിൽ 4,000 ഡോളർ (ഏകദേശം 3.3 ലക്ഷം രൂപ) ബാലൻസ് കാണിച്ചിരിക്കണം.

ഭാവിയെ മുന്നിൽക്കണ്ട് യുഎഇ നാല് പുതിയ വിസ വിഭാഗങ്ങൾ കൂടി അവതരിപ്പിച്ചു. ആർട്ടിഫിഷ്യൽ ഇന്റലിജൻസ്, ഡാറ്റ സയൻസ് മേഖലകളിലെ വിദഗ്ധരെ ലക്ഷ്യമിട്ട് ആർട്ടിഫിഷ്യൽ ഇന്റലിജൻസ് സ്പെഷ്യലിസ്റ്റ് വിസ പ്രഖ്യാപിച്ചു. കലാകാരന്മാർക്കും അവതാരകർക്കുമായി എന്റർടൈൻമെന്റ് വിസയും കൊണ്ടുവന്നു. സമ്മേളനങ്ങളും പ്രദർശനങ്ങളും ലക്ഷ്യമിടുന്ന സന്ദർശകർക്കായി ഇവന്റ് വിസയും അവതരിപ്പിച്ചിട്ടുണ്ട്. കൂടാതെ ക്രൂയിസ് കപ്പലുകളിലെ ജീവനക്കാരെയും യാത്രക്കാരെയും ഉൾപ്പെടുത്തി മാരിടൈം ടൂറിസം വിസയും പ്രഖ്യാപിച്ചു.

രാജ്യത്ത് തുടർന്നുകൊണ്ട് തന്നെ വിസ നീട്ടാനുള്ള സൗകര്യം നിലവിലുണ്ട്. എന്നാൽ വിസ കാലാവധി കഴിഞ്ഞും രാജ്യത്ത് തുടരുന്നത് സിസ്റ്റം തന്നെ ഓട്ടോമാറ്റിക്കായി കണ്ടെത്തുകയും പ്രതിദിനം 50 ദിർഹം വീതം പിഴ ചുമത്തുകയും ചെയ്യും. അതിനാൽ വിസ കാലാവധി അവസാനിക്കുന്നതിന് 7-10 ദിവസം മുമ്പ് തന്നെ പുതുക്കാനുള്ള നടപടികൾ ആരംഭിക്കണമെന്ന് അധികൃതർ നിർദേശിക്കുന്നു.

വിസ നടപടികൾ ഡിജിറ്റലായെങ്കിലും വിമാനത്താവളങ്ങളിൽ പരിശോധന കർശനമാക്കിയിട്ടുണ്ട്. മടക്കയാത്രയ്ക്കുള്ള ടിക്കറ്റ്, താമസസ്ഥലത്തിന്റെ വിവരങ്ങൾ, രാജ്യത്ത് കഴിയാനാവശ്യമായ പണം എന്നിവ ഇമിഗ്രേഷൻ ഉദ്യോഗസ്ഥർ ചോദിച്ചാൽ ഹാജരാക്കേണ്ടി വരും.

കൂടുതൽ വിവരങ്ങൾക്കും അപേക്ഷകൾക്കുമായി smartservices.icp.gov.ae എന്ന ഔദ്യോഗിക പോർട്ടലോ യുഎഇ വിമാനക്കമ്പനികളുടെ വെബ്സൈറ്റുകളോ സന്ദർശിക്കാവുന്നതാണ്.