ഫ്രാൻസിലേക്ക് അപ്പസ്തോലിക സന്ദർശനവുമായി ലിയോ പാപ്പ; യുനെസ്കോ ആസ്ഥാനവും സന്ദർശിക്കും

വത്തിക്കാൻ സിറ്റി: ബെനഡിക്ട് പതിനാറാമൻ മാർപാപ്പയുടെ ചരിത്രപ്രസിദ്ധമായ സന്ദർശനത്തിന് ശേഷം നീണ്ട 18 വർഷത്തെ കാത്തിരിപ്പ് അവസാനിപ്പിച്ച് ലിയോ പതിനാലാമൻ മാർപാപ്പ ഫ്രാൻസിലേക്ക് അപ്പസ്തോലിക യാത്ര നടത്തുന്നു. സെപ്റ്റംബർ 25 മുതൽ 28 വരെയാണ് മാർപാപ്പയുടെ ഫ്രാൻസ് സന്ദർശനം നിശ്ചയിച്ചിരിക്കുന്നത്. 2008 ൽ ബെനഡിക്ട് പതിനാറാമൻ പാപ്പയാണ് ഇതിനുമുമ്പ് ഫ്രാൻസ് സന്ദർശിച്ച അവസാനത്തെ മാർപാപ്പ.

നാല് ദിവസം നീണ്ടുനിൽക്കുന്ന ഈ ഔദ്യോഗിക സന്ദർശനത്തിനിടെ ആഗോള സാംസ്കാരിക സംഘടനയായ യുനെസ്കോയുടെ ആസ്ഥാന കാര്യാലയവും മാർപാപ്പ സന്ദർശിക്കുമെന്നത് ഈ യാത്രയുടെ പ്രധാന സവിശേഷതയാണ്. ഫ്രാൻസിലെ ഭരണനേതൃത്വം, അവിടുത്തെ പ്രാദേശിക കത്തോലിക്കാ സഭ, യുനെസ്കോ ഡയറക്ടർ ജനറൽ എന്നിവരുടെ പ്രത്യേക ക്ഷണങ്ങൾ സ്വീകരിച്ചാണ് മാർപാപ്പ ഈ അപ്പസ്തോലിക യാത്രയ്ക്ക് ഒരുങ്ങുന്നത്.

ലിയോ പതിനാലാമൻ മാർപാപ്പ കത്തോലിക്കാ സഭയുടെ തലവനായി തിരഞ്ഞെടുക്കപ്പെട്ടതിന് ശേഷം കഴിഞ്ഞ ഏപ്രിൽ 10 ന് ഫ്രഞ്ച് പ്രസിഡന്റ് ഇമ്മാനുവേൽ മാക്രോൺ വത്തിക്കാനിലെത്തി പാപ്പയുമായി കൂടിക്കാഴ്ച നടത്തിയിരുന്നു. ഈ കൂടിക്കാഴ്ചയിലാണ് സന്ദർശനത്തിന് അന്തിമ രൂപമായത്.

നേരത്തെ, 2018, 2021, 2022 വർഷങ്ങളിലും ഫ്രഞ്ച് പ്രസിഡന്റ് ഇമ്മാനുവേൽ മാക്രോൺ വത്തിക്കാൻ സന്ദർശിക്കുകയും അന്നത്തെ ആഗോള മാർപാപ്പയായിരുന്ന ഫ്രാൻസിസ് പാപ്പയുമായി കൂടിക്കാഴ്ചകൾ നടത്തുകയും ചെയ്തിരുന്നു. യൂറോപ്പിലെ കത്തോലിക്കാ സഭയ്ക്കും ഫ്രാൻസുമായുള്ള വത്തിക്കാന്റെ നയതന്ത്ര ബന്ധങ്ങൾക്കും പുതിയ ഊർജം പകരുന്നതായിരിക്കും ലിയോ പതിനാലാമൻ പാപ്പയുടെ ഈ സന്ദർശനം.