അമേരിക്കയിൽ സേവനത്തിന്റെ 25 വർഷങ്ങൾ; എം.എസ്.എം.ഐ സന്യാസിനീ സമൂഹത്തിന്റെ രജതജൂബിലി ആഘോഷം ഭക്തിസാന്ദ്രമായി

ഹൂസ്റ്റൺ: കടൽ കടന്നെത്തിയ കാരുണ്യത്തിന്റെ കാൽനൂറ്റാണ്ട് പിന്നിട്ട് മിഷണറി സിസ്റ്റേഴ്സ് ഓഫ് മേരി ഇമ്മാക്കുലേറ്റ് സന്യാസിനീ സമൂഹം. അമേരിക്കയിലെ തങ്ങളുടെ സേവനയാത്രയുടെ രജതജൂബിലി ടെക്സസ് മിസൂറി സിറ്റിയിലെ സെന്റ് ജോസഫ് സിറോ-മലബാർ കത്തീഡ്രലിൽ വെച്ച് ഭക്തിസാന്ദ്രമായി ആഘോഷിച്ചു.

സന്യാസിനീ സമൂഹം സേവനത്തിന്റെ പാതയിൽ പിന്നിട്ട ഇരുപത്തിയഞ്ച് വർഷത്തെ ഓർമ്മകൾ പുതുക്കുന്നതിനും നന്ദി പറയുന്നതിനുമുള്ള വേദിയായി ഈ ആഘോഷം മാറി. കൃതജ്ഞതാ ബലിയും പൊതുസമ്മേളനവും ഉൾപ്പെട്ട ചടങ്ങുകളിൽ മലയാളികൾ ഉൾപ്പെടെയുള്ള വിശ്വാസീ സമൂഹം ആവേശത്തോടെ പങ്കുചേർന്നു.

ചിക്കാഗോ സെന്റ് തോമസ് സിറോ-മലബാർ രൂപതാധ്യക്ഷൻ മാർ ജോയ് ആലപ്പാട്ടിന്റെ മുഖ്യകാർമ്മികത്വത്തിൽ നടന്ന കൃതജ്ഞതാ ബലിയോടെയാണ് ആഘോഷങ്ങൾക്ക് തുടക്കമായത്. മുൻ രൂപതാധ്യക്ഷൻ മാർ ജേക്കബ് അങ്ങാടിയത്ത്, നിരവധി വൈദികർ എന്നിവർ സഹകാർമ്മികരായി. അമേരിക്കയിലെ സിറോ-മലബാർ സഭയുടെ വികാസത്തിൽ എം.എസ്.എം.ഐ സിസ്റ്റേഴ്സ് നൽകിയ സുപ്രധാന സംഭാവനകളെ മാർ ജോയ് ആലപ്പാട്ട് തന്റെ വചന സന്ദേശത്തിൽ അനുസ്മരിച്ചു.

മേജർ ആർച്ച് ബിഷപ്പ് മാർ റാഫേൽ തട്ടിൽ വീഡിയോ സന്ദേശത്തിലൂടെ സിസ്റ്റേഴ്സിന് ആശംസകൾ നേർന്നു. സന്യാസിനീ സമൂഹത്തിന്റെ സ്ഥാപകൻ വന്ദ്യ വർക്കി കുഴികുളത്തിന്റെ ദർശനവും മരിയൻ ചൈതന്യവും അമേരിക്കയിൽ വളർന്നതിനെ അദേഹം പ്രശംസിച്ചു.

സഭയ്ക്കുള്ള നൽകിയ നേതൃത്വത്തിന് മാർ ജേക്കബ് അങ്ങാടിയത്തിനുള്ള എപ്പിസ്കോപ്പൽ രജത ജൂബിലി ആദരം ചടങ്ങിൽ നടന്നു. മാർ ജോയ് ആലപ്പാട്ട് അദ്ദേഹത്തെ പൊന്നാടയണിയിച്ച് ആദരിച്ചു. കൂടാതെ സന്യാസിനീ സമൂഹത്തിന്റെ പ്രവർത്തനങ്ങൾക്ക് ദീർഘകാല പിന്തുണ നൽകുന്ന വത്സ മാത്യുവിനെയും ചടങ്ങിൽ പ്രത്യേകമായി ആദരിച്ചു.

വിശുദ്ധ കുർബാനയ്ക്ക് ശേഷം നടന്ന പൊതുസമ്മേളനത്തിൽ വിവിധ സഭാനേതാക്കളും വിശിഷ്ടാതിഥികളും ആശംസകൾ നേർന്നു. സിസ്റ്റർ സുബി എം.എസ്.എം.ഐ സ്വാഗതം ആശംസിച്ചു. ജൂബിലി ഗാനാലാപനം, പ്രാർത്ഥനാനൃത്തം, ലിയോൺ ഫ്ലെമിങ്-മെറിൽ സന്തോഷ് എന്നിവരുടെ സംഗീത പരിപാടി എന്നിവ ആഘോഷങ്ങൾക്ക് മാറ്റുകൂട്ടി. റവ. ഡോ. അൽഫോൻസ് മാത്യു കൃതജ്ഞത രേഖപ്പെടുത്തി.

വന്ദ്യ വർക്കി കുഴികുളം സ്ഥാപിച്ച ഈ സന്യാസിനീ സമൂഹം, മരിയൻ ആത്മീയതയും മിഷണറി ചൈതന്യവും മുഖമുദ്രയാക്കിയാണ് പ്രവർത്തിക്കുന്നത്. വിദ്യാഭ്യാസം, ആരോഗ്യം, ഇടവക ശുശ്രൂഷകൾ, കാരുണ്യപ്രവർത്തനങ്ങൾ എന്നിവയിലൂടെ ക്രിസ്തുവിന്റെ സ്നേഹം പകരുകയാണ് ഈ സന്യാസിനികൾ ലക്ഷ്യമിടുന്നത്. സ്‌നേഹവിരുന്നോടെയാണ് രജതജൂബിലി ആഘോഷങ്ങൾക്ക് തിരശീല വീണത്.