ന്യൂയോര്ക്ക്: നിര്മിത ബുദ്ധി നല്കിയ വ്യാജ സന്ദേശത്തിന് പിന്നാലെ വന് ശക്തികള് തമ്മില് നേരിട്ടുള്ള സൈനിക ഏറ്റുമുട്ടലിന്റെ വക്കോളമെത്തി. ഇറാന് സംഘര്ഷ മേഖലയില് സഞ്ചരിച്ചിരുന്ന ചൈനീസ് കപ്പല് പിടിച്ചെടുക്കാന് യു.എസ് സൈന്യം നീക്കം നടത്തിയത് രാജ്യാന്തര തലത്തില് വലിയ നടുക്കം ഉളവാക്കി. ചൈനീസ് കപ്പലില് ആണവായുധ നിര്മാണത്തിന് ആവശ്യമായ രാസവസ്തുക്കളും സാങ്കേതിക ഉപകരണങ്ങളും ഉണ്ടെന്ന തെറ്റായ ഇന്റലിജന്സ് സന്ദേശമാണ് യു.എസിനെ പ്രകോപിപ്പിച്ചത്.
നിമിഷങ്ങള്ക്കകം അത്യാധുനിക ആയുധങ്ങളേന്തിയ വന് യു.എസ് സൈനിക പടയും വ്യോമസേനയുടെ പോര് വിമാനങ്ങളും ചൈനീസ് കപ്പലിനെ വളയുകയായിരുന്നു. എന്നാല് തൊട്ടടുത്ത സെക്കന്ഡില് യു.എസ് സേന കപ്പലിലേക്ക് ഇരച്ചുകയറാന് ഒരുങ്ങവെയാണ് ആ ഞെട്ടിക്കുന്ന യാഥാര്ത്ഥ്യം പുറത്തുവന്നത്. സൈനിക ഉദ്യോഗസ്ഥര് വിവര ശേഖരണത്തിനായി ഉപയോഗിച്ച എഐ ചാറ്റ്ബോട്ടിന് സംഭവിച്ച ഗുരുതരമായ ഹാലൂസിനേഷന് ആണ് ഈ സന്ദേശത്തിന് പിന്നിലെന്ന് തിരിച്ചറിഞ്ഞു. സാധാരണ ചരക്കുകളുമായി പോവുകയായിരുന്ന കപ്പലിലെ വസ്തുക്കളെ ചാറ്റ്ബോട്ട് തെറ്റായി വ്യാഖ്യാനിക്കുകയായിരുന്നു. ദുരന്തം തൊട്ടരികിലെത്തിയ നിമിഷത്തില് അബദ്ധം തിരിച്ചറിഞ്ഞ യു.എസ് കമാന്ഡര്മാര്, അവസാന നിമിഷം സൈനിക നീക്കം അടിയന്തരമായി റദ്ദാക്കാന് ഉത്തരവിട്ടു.
ഒരു കൊച്ചു തെറ്റ് ലോക സമാധാനത്തെ തന്നെ തകിടം മറിക്കുമായിരുന്ന വലിയൊരു സൈനിക പ്രത്യാക്രമണത്തിലേക്കും യുദ്ധത്തിലേക്കും വഴി തുറക്കുമായിരുന്നുവെന്ന് രാജ്യാന്തര മാധ്യമങ്ങള് ചൂണ്ടിക്കാണിക്കുന്നു. രഹസ്യാന്വേഷണ വിശകലനം, ശത്രുക്കളുടെ ലക്ഷ്യസ്ഥാനങ്ങള് നിര്ണയിക്കല് എന്നിവയ്ക്കായി യു.എസ് സൈന്യം വ്യാപകമായി എഐയെ ആശ്രയിക്കുന്നത് ഇതോടെ വന് വിമര്ശനങ്ങള്ക്ക് വിധേയമായിരിക്കുകയാണ്.
വിനാശകാരിയായ ഇത്തരം സാങ്കേതിക വിദ്യകള് മനുഷ്യന്റെ പൂര്ണ നിയന്ത്രണത്തിലല്ലെങ്കില് അത് ഭൂമിയുടെ നിലനില്പ്പിന് തന്നെ ഭീഷണിയാകുമെന്ന് ഈ സംഭവം മുന്നറിയിപ്പ് നല്കുന്നു. എന്നാല് സംഭവത്തിന്റെ ഗൗരവം വ്യക്തമായിട്ടും പെന്റഗണോ അമേരിക്കന് ഭരണകൂടമോ ഔദ്യോഗികമായി പ്രതികരിക്കാന് ഇനിയും തയ്യാറായിട്ടില്ല.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള് സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്ളീല പദപ്രയോഗങ്ങളും ദയവായി ഒഴിവാക്കുക.