അടുക്കളയില്‍ നിന്നും സ്ത്രീകള്‍ അരങ്ങത്തേക്കിറങ്ങി തുടങ്ങിയിട്ട് കാലങ്ങള്‍ ഏറെയായി. രാഷ്ട്രീയത്തിലും വിദ്യാഭ്യാസത്തിലും എന്നുവേണ്ട എല്ലാ മേഖലകളിലും സ്ത്രീകള്‍ കൈയ്യൊപ്പ് ചാര്‍ത്തിത്തുടങ്ങി. പൂര്‍ണ്ണമായും സ്ത്രീകളാല്‍ ഭരണം നടത്തപ്പെടുന്ന ഒരു ഗ്രാമത്തെക്കുറിച്ച് കേട്ടിട്ടുണ്ടോ...
ചൈനയുടെ തിബത്തന്‍ അതിര്‍ത്തിയോട് ചേര്‍ന്നുള്ള പ്രദേശത്ത് ജീവിക്കുന്ന മോസുവോ വിഭാഗക്കാര്‍ക്കിടയിലാണ് ഇത്തരത്തില്‍ സ്ത്രീഭരണം. മാട്രിയാര്‍ക്കി അഥവാ മാതൃദായകക്രമമാണ് ഇവിടെ ഇപ്പോഴും. മോസുവോ വിഭാഗത്തെ നാഷി ന്യൂനപക്ഷങ്ങളുടെ കൂടെയാണ് ചൈനീസ് സര്‍ക്കാര്‍ ഉള്‍പ്പെടുത്തിയിരിക്കുന്നത്.
ഇന്നും മാതൃദായകക്രമം നിലനില്‍ക്കുന്ന അപൂര്‍വ്വ ഇടങ്ങളിലൊന്നാണ് ഇവിടം. ഇന്നാട്ടില്‍ പുരുഷന്മാര്‍ക്ക് വല്യ പ്രാധാന്യം ഇല്ലെന്ന് പറയാം. വീടിനകത്തേയും പുറത്തേയും കാര്യങ്ങളെല്ലാം തീരുമാനിക്കുന്നതും നിയന്ത്രിക്കുന്നതുമെല്ലാം സ്ത്രീകള്‍ തന്നെയാണ്.
ഒരു പെണ്‍കുട്ടി സ്ത്രീയായി മാറുന്ന സമയം മുതല്‍ക്കേ വീടുകളില്‍ അവള്‍ക്ക് സ്വന്തമായി ഒരു മുറി ലഭിക്കുന്നു. അവരുടെ വസ്ത്രധാരണത്തിലും മാറ്റം വരും. എന്നാല്‍ പുരുഷന്മാര്‍ വീട്ടില്‍ സ്വന്തമായി ഒരു മുറി പോലും ലഭിക്കുന്നത് അപൂര്‍വ്വമായാണ്. ഇനി വിവാഹപ്രായമെത്തുമ്പോള്‍ യുവതിക്ക് ഇഷ്ടപ്പെട്ടയാളെ തിരഞ്ഞെടുക്കാം. വിവാഹത്തിന് വലിയ പ്രാധാന്യം ഇല്ലാത്തതിനാല്‍ ഇവിടെ ചിലര്‍ മാത്രമാണ് വിവാഹിതരാകുന്നതും. ഇനി വിവാഹം വേണ്ടെന്നു വയ്ക്കാനുള്ള സ്വാതന്ത്ര്യവും സ്ത്രീകള്‍ക്കുണ്ട്. ഇഷ്ടപ്പെട്ട പങ്കാളിയെ തെരഞ്ഞെടുത്തു കഴിഞ്ഞാല്‍ സ്ത്രീകളുടെ സമ്മതത്തോടെ മാത്രമേ പുരുഷന്മാര്‍ക്ക് അവരെ സന്ദര്‍ശിക്കാന്‍ സാധിക്കൂ.
കുട്ടികളായാല്‍ അവരുടെ ഉത്തരവാദിത്വവും സംരക്ഷണവും എല്ലാം സ്ത്രീകള്‍ക്കാണ്. കുട്ടിയുടെ കാര്യങ്ങളെല്ലാം തീരുമാനിക്കുന്നതും അമ്മയും അമ്മയുടെ വീട്ടുകാരുമാണ്. കുട്ടികളുടെ മേല്‍പോലും വലിയ പ്രാധാന്യം പുരുഷന്മാര്‍ക്കില്ല.
കൃഷിയാണ് മോസുവോ വിഭാഗത്തിന്റെ പ്രധാന തൊഴില്‍. അതില്‍തന്നെ ജൈവകൃഷിക്കും കന്നുകാലി വളര്‍ത്തലിനുമൊക്കെയാണ് ഇവര്‍ പ്രാധാന്യം നല്‍കുന്നത്. പലപ്പോഴും മാംസം ഇവര്‍ ഉണക്കി സൂക്ഷിക്കാറുമുണ്ട്. ധാന്യങ്ങളില്‍ നിന്നും സുലിമ എന്നൊരു പ്രത്യേകതരം വൈനും ഇവര്‍ തായാറാക്കാറുണ്ട്. വളര്‍ത്തുമൃഗങ്ങളോട് അടുപ്പം പുലര്‍ത്തുന്ന മോസുവോ വിഭാഗം വീടിന്റെ താഴത്തെ നില പോലും അവര്‍ക്കായി മാറ്റിവെച്ചിരക്കുന്നു.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26