'യുദ്ധം വേദനയല്ലാതെ മറ്റൊന്നും നൽകില്ല': എത്യോപ്യയിലെ സമാധാനത്തിനായി ക്രൈസ്തവ സഭ രം​ഗത്ത്

അഡിസ് അബാബ: ആഭ്യന്തര കലാപവും അക്രമങ്ങളും കൊണ്ട് പൊറുതിമുട്ടുന്ന എത്യോപ്യയിൽ ശാന്തിയുടെയും അനുരഞ്ജനത്തിന്റെയും സന്ദേശവുമായി കത്തോലിക്ക മെത്രാൻ സമിതി. ആയുധമെടുക്കുന്നതും പരസ്പരം പോരടിക്കുന്നതും രാജ്യത്തെ പ്രതിസന്ധികൾ കൂടുതൽ വഷളാക്കുകയേ ഉള്ളൂവെന്നും ഇതിന്റെ ഇരകളാകുന്നത് കുറ്റവുമില്ലാത്ത സാധാരണക്കാരാണെന്നും സഭാ പിതാക്കന്മാർ ഓർമ്മിപ്പിച്ചു.

ക്രിസ്തീയ സ്നേഹത്തിന്റെയും സാഹോദര്യത്തിന്റെയും പാതയിലേക്ക് മടങ്ങാനും, ക്ഷമയോടെയും വിട്ടുവീഴ്ചയോടെയും അനുരഞ്ജനത്തിന്റെ വഴികൾ തേടാനും സംഘർഷത്തിൽ പങ്കാളികളായ എല്ലാ വിഭാഗങ്ങളോടും സമിതി ആഹ്വാനം ചെയ്തു.

ടൈഗ്രെ, അഫാർ, അംഹാറ, ഒറോമിയ തുടങ്ങിയ മേഖലകളിൽ തുടരുന്ന രൂക്ഷമായ സായുധ പോരാട്ടങ്ങളിൽ സഭാനേതൃത്വം അഗാധമായ മനോവേദന രേഖപ്പെടുത്തി. യുദ്ധങ്ങൾ ഒരിക്കലും മനുഷ്യന്റെ ഭിന്നതകൾ പരിഹരിക്കില്ലെന്നും മറിച്ച് അവയെ കൂടുതൽ ആഴത്തിലാക്കുക മാത്രമാണ് ചെയ്യുന്നതെന്നും സഭാ പിതാക്കന്മാർ വ്യക്തമാക്കുന്നു.

ഈ ക്രൂരതകളിൽ ഏറെയും കണ്ണീരിലാഴ്ത്തപ്പെടുന്നത് സ്ത്രീകളും കുഞ്ഞുങ്ങളും പ്രായമായവരുമാണ്. തലമുറകളോളം നീളുന്ന വിദ്വേഷവും പകയും വിതയ്ക്കുന്ന ഈ അക്രമങ്ങൾക്കെതിരെ മാനവികതയുടെ ശബ്ദമുയർത്താൻ സഭ ആഹ്വാനം ചെയ്യുന്നു.

സംഘർഷങ്ങൾ അവസാനിപ്പിച്ച് സംഭാഷണങ്ങളിലൂടെയും സമാധാനത്തിലൂടെയും പ്രശ്നങ്ങൾക്ക് പരിഹാരം കാണണമെന്ന ലെയോ പാപ്പയുടെ ആഹ്വാനത്തിന് എത്യോപ്യൻ മെത്രാൻ സമിതി പൂർണ പിന്തുണ പ്രഖ്യാപിച്ചു. പരസ്പരം വേദനയറിഞ്ഞ് ജീവിക്കുക എന്നത് ഓരോ പൗരന്റെയും ക്രൈസ്തവന്റെയും കടമയാണെന്ന് സമിതി ഓർമ്മിപ്പിച്ചു.

അതേസമയം, എത്യോപ്യയുടെ വടക്കൻ മേഖലകളിലുണ്ടായ നടുക്കുന്ന ആക്രമണങ്ങളിൽ നിരവധി കുഞ്ഞുങ്ങൾ കൊല്ലപ്പെടുകയും അനേകർക്ക് പരിക്കേൽക്കുകയും ചെയ്തതായി യൂണിസെഫ് പുറത്തുവിട്ട കണക്കുകൾ സ്ഥിരീകരിക്കുന്നു. ടൈഗ്രെ, അഫാർ, അംഹാറ തുടങ്ങിയ പ്രദേശങ്ങളിലെ ഈ അശാന്തി മാറുന്നതിനായി വിശ്വാസികൾ ഒപ്പമുണ്ടെന്നും, എത്യോപ്യയിലെ പ്രിയപ്പെട്ട ജനങ്ങൾക്കായുള്ള പ്രത്യേക പ്രാർത്ഥനകൾ തുടരുമെന്നും സഭ വ്യക്തമാക്കി.