നേപ്പാള്‍ വഴിയുള്ള വിദേശ യാത്രക്ക് വിലക്ക്; പ്രവാസികള്‍ ദുരിതത്തിൽ

കാഠ്മണ്ഡു: കോവിഡ് വ്യാപനം രൂക്ഷമായ പശ്ചാത്തലത്തിൽ നേപ്പാൾ വഴി മറ്റ്​ രാജ്യങ്ങളിലേക്കുള്ള വിമാന യാത്രക്ക് ബുധനാഴ്​ച അർധരാത്രി​ മുതൽ​ വിലക്ക്​. നേപ്പാൾ ആഭ്യന്തര മന്ത്രാലയത്തിന്​ കീഴിലുള്ള എമിഗ്രേഷൻ വിഭാഗമാണ്​ ഇത്​ സംബന്ധിച്ച സർക്കുലർ പുറത്തിറക്കിയത്​. ഇതോടെ സൗദി യാത്രക്കായി നേപ്പാളിൽ എത്തിയ ആയിരക്കണക്കിന്​ പ്രവാസികൾ കുടുങ്ങി. നിലവിൽ നേപ്പാളിലുള്ളവരെ സൗദിയിൽ എത്തിക്കുന്ന കാര്യം അധികൃതരുമായി ചർച്ച ചെയ്യുന്നുണ്ടെന്ന്​ നേപ്പാളിലെ ഇന്ത്യൻ എംബസി അറിയിച്ചു.

അതേസമയം, നേപ്പാളിലേക്ക്​ വരുന്നതിനും തിരികെ സ്വന്തം രാജ്യത്തേക്ക്​ പോകുന്നതിനും വിലക്കില്ല. ഇന്ത്യയിൽ നിന്ന്​ സൗദിയിലേക്ക്​ നേരിട്ട്​ യാത്രാവിലക്കുള്ളതിനാൽ പ്രവാസികൾ നേപ്പാൾ, ബഹ്​റൈൻ, മാലിദ്വീപ്​ വഴികളാണ്​ തെരഞ്ഞെടുത്തിരുന്നത്​. മാലിദ്വീപ് വിലക്കേർപെടുത്തുകയും ബഹ്​റൈൻ നിയന്ത്രണങ്ങൾ കടുപ്പിക്കുകയും ചെയ്​തതോടെ ഭൂരിപക്ഷം യാ​ത്രക്കാരും നേപ്പാളാണ്​ തെരഞ്ഞെടുത്തത്​.

അതുപോലെ തന്നെ വിസയും എൻ.ഒ.സിയും ആവശ്യമില്ല എന്നതും നേപ്പാൾ യാത്രികരുടെ എണ്ണം കൂടാൻ കാരണമായി. പതിനായിരത്തോളം സൗദി യാത്രികർ നേപ്പാളിലുണ്ടെന്നാണ്​ കണക്ക്​. 14 ദിവസത്തെ ക്വാറന്റീന്​ ശേഷം ബുധനാഴ്​ച രാത്രി 12 മണിക്ക്​ മുൻപ്​ യാത്രചെയ്യാൻ കഴിയാത്തവർ നേപ്പാളിൽ കുടുങ്ങുന്ന അവസ്ഥയാണ് നിലവിൽ.
അതേസമയം നേപ്പാൾ അധികൃതരുമായി നടത്തുന്ന ചർച്ച വിജയി​ച്ചില്ലെങ്കിൽ ഇവർ നാട്ടിലേക്ക്​ മടങ്ങേണ്ടി വരും. 70,000 മുതൽ ലക്ഷം രൂപ വരെ നൽകി എത്തിയവരാണ്​ കൂടുതലും. നേപ്പാൾ വഴി മറ്റ്​ രാജ്യങ്ങളിലേക്കുള്ള യാത്ര ഒഴിവാക്കണമെന്ന് നേപ്പാളിലെ​ ഇന്ത്യൻ എംബസി അറിയിച്ചു.

നേപ്പാളിൽ തങ്ങുന്ന ഇന്ത്യക്കാർക്ക്​ കോവിഡ്​ ടെസ്​റ്റ്​ നടത്തില്ല എന്ന്​ കഴിഞ്ഞ ദിവസം നേപ്പാൾ ആരോഗ്യ മന്ത്രാലയം അറിയിച്ചിരുന്നു. എന്നാൽ, കേന്ദ്രസർക്കാരിന്റെ ഇടപെടലിനെ തുടർന്ന്​ കോവിഡ്​ ടെസ്​റ്റ്​ നടത്താൻ അനുമതി നൽകുകയായിരുന്നു. ഇത്​ പ്രവാസികൾക്ക്​ ആശ്വാസമേകിയതിന്​ പിന്നാലെയാണ്​ യാത്രാവിലക്ക്​.