'ഗാഗ് പഴം' അങ്ങ് വിയറ്റ്നാമില്‍ മാത്രമല്ല ഇങ്ങ് കേരളത്തിലും വിളയുമെന്ന് തെളിയിച്ചിരിക്കുകയാണ് കോഴിക്കോടുകാരന്‍ കര്‍ഷകന്‍. കോഴിക്കോട് കോടഞ്ചേരി സ്വദേശി ആലക്കല്‍ ജോസഫിന്റെ പറമ്പിലാണ് വിയറ്റ്നാമിന്റെ 'സ്വര്‍ഗീയ പഴ'മെന്നറിയപ്പെടുന്ന ഗാഗ് കായ്ച്ചത്.
ജാതി മുതല്‍ ഡ്രാഗണ്‍ ഫ്രൂട്ട് വരെയുള്ള ജോസഫിന്റെ കൃഷിടത്തില്‍ ഈ പഴമാണ് ഏറെ ആകര്‍ഷകമായ ഇനം. വിയറ്റ്നാം, തായ്ലാന്‍ഡ്, മലേഷ്യ തുടങ്ങിയ രാജ്യങ്ങളിലാണ് ഈ പഴം സാധാരണയായി കണ്ടു വരുന്നത്. അങ്കമാലിയിലെ ഒരു സുഹൃത്തില്‍ നിന്നാണ് ജോസഫിന് ഗാഗിന്റെ വിത്തു ലഭിച്ചത്.
ആറുമാസം മുന്‍പ് നട്ടു. ചെടി കായ്ച്ചതിന്റെ സന്തോഷത്തിലാണ് ഇപ്പോള്‍ ഈ മലയോര കര്‍ഷകന്‍. ആണ്‍വിത്തും പെണ്‍വിത്തും അടുത്തടുത്ത് നട്ടാല്‍ മാത്രമേ ഗാഗ് കായ്ക്കുകയുള്ളൂ. ഏറെ ഔഷധ ഗുണമുള്ള ഈ പഴത്തിന് കിലോയ്ക്ക് ആയിരം രൂപവരെ വിലയുണ്ടെന്ന് ജോസഫ് പറയുന്നു.
ജ്യൂസുണ്ടാക്കി കഴിക്കുന്നതിന് പുറമെ പച്ച ഗാഗ് കറിവച്ചും, തോരന്‍ ഉണ്ടാക്കിയും കഴിക്കാം. തളിരിലകളും, പൂവും കറിയാക്കാം. ഈ പഴത്തിന്റെ ഉള്ളില്‍ കാണപ്പെടുന്ന ഒരു തരം ഓയിലും ഏറെ വിലപിടിപ്പുള്ളതാണ്. ജൈവ വളം മാത്രമാണ് ജോസഫ് കൃഷിയ്ക്കായി ഉപയോഗിക്കുന്നത്.
കേരളക്കരയിലും വിദേശ ഫലങ്ങള്‍ സുലഭമായി ഉണ്ടാകുമെന്ന് തെളിയിച്ച ജോസഫ് ഇപ്പോള്‍ കൃഷി വിപുലമാക്കാനുള്ള തയ്യാറെടുപ്പിലാണ്.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26