വാഷിംഗ്ടൺ: അമേരിക്കയുടെ സ്ട്രാറ്റജിക് സ്റ്റെൽത്ത് ബോംബർ വിമാനങ്ങളും യുദ്ധവിമാനങ്ങളും ഉൾപ്പെടെ ഓസ്‌ട്രേലിയയിൽ വ്യോമ, കര, കടൽ സേനകളുടെ സാന്നിധ്യം വർദ്ധിപ്പിക്കുമെന്ന് അമേരിക്കൻ പ്രതിരോധ സെക്രട്ടറി ലോയ്ഡ് ഓസ്റ്റിൻ. പസഫിക്കിൽ ചൈനയുടെ സാന്നിധ്യം വർധിക്കുന്ന സാഹചര്യത്തിലാണ് നിർണായക പ്രസ്താവന. മാത്രമല്ല ചൈനയുടെ ആണവായുധ ശേഖരം 2035 ഓടെ മൂന്നിരട്ടിയായി വര്‍ധിക്കുമെന്ന് പെന്റഗണ്‍ പുറത്തിറക്കിയ റിപ്പോര്‍ട്ടില്‍ കഴിഞ്ഞ ദിവസം വ്യക്തമാക്കിയിരുന്നു.
ഓസ്‌ട്രേലിയ-അമേരിക്ക മന്ത്രിതല (ഓസ്‌മിൻ) ചർച്ചകൾക്കായി വിദേശകാര്യ മന്ത്രി പെന്നി വോംഗും പ്രതിരോധ മന്ത്രി റിച്ചാർഡ് മാർലസും വാഷിംഗ്ടൺ ഡിസിയിൽ നടത്തിയ കൂടിക്കാഴ്ചയിലാണ് പുതിയ പ്രഖ്യാപനം. തീരുമാനം രാജ്യങ്ങളുടെ പരസ്പര പ്രവർത്തനക്ഷമത വർദ്ധിപ്പിക്കുകയും കൂടുതൽ ചടുലവും പ്രതിരോധശേഷിയുള്ളതുമായ കഴിവുകൾ സൃഷ്ടിക്കുകയും ചെയ്യും. പ്രതിരോധ വ്യാവസായിക താവളങ്ങളെ കൂടുതൽ സമന്വയിപ്പിക്കുന്നതിനുള്ള തീരുമാനങ്ങൾ വരും വർഷങ്ങളിലും തുടരുമെന്നും ഓസ്റ്റിൻ വ്യക്തമാക്കി.
ഓസ്‌ട്രേലിയയും അമേരിക്കയും ജപ്പാനുമായുള്ള സൈനിക സഹകരണം വർദ്ധിപ്പിക്കാൻ ശ്രമിക്കുന്നതായും അദ്ദേഹം സൂചന നൽകി. ത്രികക്ഷി പ്രതിരോധ സഹകരണം വർദ്ധിപ്പിക്കാനും ഓസ്‌ട്രേലിയയിൽ ഇരു രാജ്യങ്ങളും സംയുക്തമായി ഉണ്ടാക്കുന്ന സൈനിക ശക്തി വർധിപ്പിക്കാനുള്ള സംരംഭങ്ങളുമായി സംയോജിപ്പിക്കാൻ ജപ്പാനെ ക്ഷണിക്കാൻ തീരുമാനിച്ചതായും ഓസ്റ്റിൻ പറഞ്ഞു. മാർലെസും വോങ്ങും അടുത്ത ആഴ്ച ചർച്ചകൾക്കായി ജപ്പാനിലേക്ക് പോകും.
അതേസമയം സേനയുടെ ശക്തി വർധിപ്പിക്കുമ്പോൾ അതിൽ എത്ര സൈനികരെയും കപ്പലുകളെയും വിമാനങ്ങളെയും ഉൾപ്പെടുത്തുമെന്ന് ഓസ്റ്റിൻ വ്യക്തമാക്കിയില്ല. കൂടാതെ ഒരു വർഷം മുമ്പ് സമാനമായ പ്രസ്താവന അമേരിക്ക നടത്തിയിരുന്നു. അതിനോട് ബന്ധപ്പെട്ടാണോ പുതിയ പ്രസ്താവനയെന്നും അദ്ദേഹം വിശദമാക്കിയിട്ടില്ല.
ചൈനയുടെ ആണവ-വ്യോമസേനാ മേഖലയിലെ വളര്‍ച്ച അമേരിക്ക ഏറെ ആശങ്കയോടെയാണ് കാണുന്നത്. ഈ സാഹചര്യത്തിലാണ് പുതിയ നടപടികളും. ഏഷ്യ-പസഫിക് മേഖലയില്‍ കൂടുതല്‍ നിര്‍ബന്ധിതവും ആക്രമണാത്മകവുമായ നടപടികള്‍ സ്വീകരിക്കാന്‍ ചൈനയെ സഹായിക്കുന്നതാണ് ആണവായുധ ശേഖരത്തിലെ വര്‍ധനവെന്ന് റിപോർട്ടുണ്ട്.
തായ്‌വാൻ ഉൾപ്പെടെ ഇന്തോ-പസഫിക്കിലുടനീളം പസഫിക് ദ്വീപ് രാജ്യങ്ങളിലേക്കും കിഴക്ക് ദക്ഷിണ ചൈനാ കടലുകളിലേക്കും ചൈന നടത്തുന്ന അപകടകരവും നിർബന്ധിതവുമായ നടപടികൾ പ്രാദേശിക സമാധാനത്തിനും സ്ഥിരതയ്ക്കും ഭീഷണിയാണെന്ന് ഓസ്റ്റിൻ പറഞ്ഞു.
തടസ്സങ്ങളില്ലാത്ത പ്രതിരോധ വ്യവസായ അടിത്തറ സൃഷ്ടിക്കാൻ അമേരിക്കയും ഓസ്‌ട്രേലിയയും കൂടുതൽ നടപടികൾ സ്വീകരിച്ചിട്ടുണ്ടെന്നും രാജ്യത്തിന്റെ സൈനിക ശേഷി വർദ്ധിപ്പിക്കുന്നതിനും പുതിയ സാങ്കേതികവിദ്യകൾ വികസിപ്പിക്കുന്നതിനും അമേരിക്കയുമായി കൂടുതൽ അടുത്ത് പ്രവർത്തിക്കേണ്ടതുണ്ടെന്നും ഓസ്‌ട്രേലിയയുടെ പ്രതിരോധ മന്ത്രി റിച്ചാർഡ് മാർലെസ് പറഞ്ഞു.
ഇൻഡോ-പസഫിക്കിൽ ചൈനയ്‌ക്കെതിരെ പൊരുതാനുള്ള ശ്രമങ്ങളിൽ ഓസ്‌ട്രേലിയയെ അമേരിക്ക ഒരു സുപ്രധാന പങ്കാളിയായിട്ടാണ് കാണുന്നത്. കൂടാതെ ചൈനയുടെ തന്ത്രപരമായ ഏത് നീക്കത്തിനെതിരെയും തായ്‌വാനെ പ്രതിരോധിക്കുന്നതിൽ ഓസ്‌ട്രേലിയയ്ക്ക് നിർണായക പങ്ക് വഹിക്കാനാകുമെന്ന് വിദഗ്ധർ വാദിക്കുന്നുണ്ട്.
ഓസ്‌ട്രേലിയയുടെ നോർത്തേൺ ടെറിട്ടറി ഇതിനകം അമേരിക്കയുമായുള്ള സൈനിക സഹകരണത്തിന് പങ്ക് ചേർന്നിട്ടുണ്ട്. മുൻ പ്രസിഡന്റ് ബരാക് ഒബാമയുടെ കീഴിൽ ആരംഭിച്ച പരിശീലനത്തിനും സംയുക്ത അഭ്യാസത്തിനുമായി ആയിരക്കണക്കിന് അമേരിക്കൻ നാവികർ വർഷം തോറും ഈ പ്രദേശത്തുകൂടി റോന്ത് ചുറ്റുന്നു.
വടക്കൻ ഓസ്‌ട്രേലിയയിലെ ഒരു എയർ ബേസിൽ ആണവ ശേഷിയുള്ള ആറ് ബി 52 ബോംബറുകൾ വരെ വിന്യസിക്കാൻ അമേരിക്ക പദ്ധതിയിടുന്നതായി ഒക്ടോബറിൽ റിപ്പോർട്ടുകളുണ്ടായിരുന്നു. മാത്രമല്ല കഴിഞ്ഞ വർഷത്തെ ഓസ്‌മിൻ ചർച്ചകൾക്ക് തൊട്ടുമുമ്പ്, അമേരിക്കയും ബ്രിട്ടനും ഓസ്‌ട്രേലിയയും ചേർന്ന് ഓക്‌സ്‌ (AUKUS) എന്നറിയപ്പെടുന്ന ഒരു സുരക്ഷാ കരാർ ഉണ്ടാക്കിയിരുന്നു.
ഈ കരാറിന്റെ അടിസ്ഥാനത്തിൽ ആണവ അന്തർവാഹിനികളെ വിന്യസിക്കുന്നതിനുള്ള സാങ്കേതികവിദ്യ ഓസ്‌ട്രേലിയയ്ക്ക് ലഭിക്കും. ഇത് സംബന്ധിച്ച കൂടുതൽ ചർച്ചകൾ നടന്നുകൊണ്ടിരിക്കുകയാണ്. ഈ അന്തർവാഹിനി ബ്രിട്ടന്റെയാണോ അമേരിക്കയുടേതാണോ എന്നകാര്യത്തിൽ മാർച്ചിൽ അന്തിമ തീരുമാനമാകും.
ഓസ്‌ട്രേലിയയുടെ ഏറ്റവും വലിയ വ്യാപാര പങ്കാളിയും കയറ്റുമതി ചെയ്യുന്ന ഇരുമ്പയിരിന്റെ മികച്ച വിപണിയുമാണ് ചൈന. എന്നാൽ ഇൻഡോ-പസഫിക് മേഖലയിലെ ബീജിംഗിന്റെ സൈനിക കടന്നുകയറ്റത്തെക്കുറിച്ച് ഓസ്‌ട്രേലിയയ്ക്ക് ആശങ്കയുണ്ട്. പ്രത്യേകിച്ചും ഈ വർഷം ഓസ്‌ട്രേലിയയുടെ അയൽരാജ്യമായ സോളമൻ ദ്വീപുകളുമായി പുതിയ സുരക്ഷാ ഉടമ്പടി ഉണ്ടാക്കിയതിന് ശേഷം.
കഴിഞ്ഞ മാസം ജി 20 യിൽ ഓസ്‌ട്രേലിയൻ പ്രധാനമന്ത്രി ആന്റണി ആൽബാനീസിയും ചൈനീസ് നേതാവ് ഷി ജിൻപിംഗും തമ്മിലുള്ള കൂടിക്കാഴ്ച ഇരുരാജ്യങ്ങളുടെയും ബന്ധം സാധാരണ നിലയിലാക്കുന്നതിനുള്ള ഒരു ചുവടുവയ്പ്പായിരുന്നു, എന്നാൽ ഇത് ഓസ്‌ട്രേലിയയുടെ പ്രതിരോധ നയത്തിൽ മാറ്റം വരുത്തില്ലെന്ന് ഓസ്‌ട്രേലിയൻ നയതന്ത്രജ്ഞർ പറയുന്നു.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26