പാരീസ്: ഫ്രാന്‍സിലെ സര്‍ക്കാര്‍ വിദ്യാലയങ്ങളില്‍ മുസ്ലിം സ്ത്രീകള്‍ ധരിക്കുന്ന അബായ (പര്‍ദ) നിരോധിക്കും. പുതിയ അധ്യയന വര്‍ഷം ആരംഭിക്കുന്നതിന് മുന്നോടിയായി ഫ്രാന്‍സിലെ വിദ്യാഭ്യാസ മന്ത്രിയാണ് ഇക്കാര്യം വ്യക്തമാക്കിയതെന്നാണ് അന്തര്‍ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നത്. അബായക്ക് മാത്രമല്ല, മറ്റ് മതപരമായ ചിഹ്നങ്ങള്‍ക്കും വിദ്യാലയങ്ങളില്‍ നിരോധനമുണ്ട്. പബ്ലിക് സ്‌കൂളുകളില്‍ വലിയ കുരിശുകളോ ജൂത കിപ്പാകളോ (ജൂത തൊപ്പി) ഇസ്ലാമിക രീതിയിലുള്ള ശിരോ വസ്ത്രങ്ങളോ ധരിക്കുന്നതിന് വിലക്കുണ്ടെന്ന് റിപ്പോര്‍ട്ടുകള്‍ വ്യക്തമാക്കുന്നു.
'ഇനി സ്‌കൂളുകളില്‍ അബായ ധരിക്കാന്‍ അനുവദിക്കില്ല' എന്നാണ് ടിവി ചാനലായ ടിഎഫ് വണിന് നല്‍കിയ അഭിമുഖത്തില്‍ വിദ്യാഭ്യാസ മന്ത്രി ഗബ്രിയേല്‍ അത്താല്‍ പറയുന്നത്. ഒരു ക്ലാസ് മുറിയിലേക്ക് പോകുമ്പോള്‍ വിദ്യാര്‍ത്ഥികളുടെ വസ്ത്ര ധാരണം നോക്കി അവരുടെ മതം തിരിച്ചറിയാന്‍ ആളുകള്‍ക്ക് കഴിയില്ലെന്നും വിദ്യാഭ്യാസ മന്ത്രി പറഞ്ഞതായി റിപ്പോര്‍ട്ടുകള്‍ വ്യക്തമാക്കുന്നു.
സെപ്റ്റംബര്‍ നാലിന് സ്‌കൂള്‍ തുറക്കുന്നതിന് മുന്നോടിയായി ദേശീയ തലത്തില്‍ സ്‌കൂള്‍ മേധാവികള്‍ക്ക് ഇതുസംബന്ധിച്ച വ്യക്തമായ നിയമങ്ങള്‍ നല്‍കുമെന്നും അദ്ദേഹം പറഞ്ഞു. ഫ്രഞ്ച് സ്‌കൂളുകളില്‍, അബായ ധരിക്കുന്നത് സംബന്ധിച്ച് മാസങ്ങളായി ചര്‍ച്ചകള്‍ നടക്കുകയായിരുന്നു. വലതുപക്ഷം നിരോധനത്തിനായി പ്രേരിപ്പിച്ചപ്പോള്‍ ഇത് പൗരസ്വാതന്ത്ര്യത്തിന്മേലുളള കടന്നുകയറ്റമാണെന്ന് ഇടതുപക്ഷം വാദിച്ചു.
അധ്യാപകരും രക്ഷിതാക്കളും തമ്മിലുള്ള പ്രശ്‌നത്തെച്ചൊല്ലി സ്‌കൂളുകള്‍ക്കുള്ളില്‍ കൂടുതലായി അബായകള്‍ ധരിക്കുന്നതായി റിപ്പോര്‍ട്ടുകളുണ്ടായിരുന്നു. 'മതേതരത്വം എന്നാല്‍ സ്‌കൂളുകളിലൂടെ സ്വയം വിമോചനം നേടാനുള്ള സ്വാതന്ത്ര്യമാണ്' അട്ടല്‍ പറഞ്ഞു. നിങ്ങള്‍ ഒരു ക്ലാസ് മുറിയില്‍ പ്രവേശിക്കുമ്പോള്‍ വിദ്യാര്‍ത്ഥികളെ നോക്കി അവരുടെ മതം തിരിച്ചറിയാന്‍ കഴിയരുതെന്നും അദ്ദേഹം പറഞ്ഞു.
2004 മാര്‍ച്ചിലെ ഒരു നിയമത്തില്‍ സ്‌കൂളുകളില്‍ വിദ്യാര്‍ത്ഥികള്‍ മതപരമായ ബന്ധം പ്രകടിപ്പിക്കുന്ന അടയാളങ്ങളോ വസ്ത്രങ്ങളോ ധരിക്കുന്നത് നിരോധിച്ചിരുന്നു. വലിയ കുരിശുകള്‍, ഇസ്ലാമിക ശിരോവസ്ത്രങ്ങള്‍ എന്നിവ ഇതില്‍ ഉള്‍പ്പെടുന്നു.
ശിരോവസ്ത്രത്തില്‍ നിന്ന് വ്യത്യസ്തമായി, അബായകള്‍ ധരിക്കുന്നതിന് ഇതുവരെ നിരോധനം നേരിട്ടിരുന്നില്ല. എന്നാല്‍ കഴിഞ്ഞ വര്‍ഷം നവംബറില്‍ വിദ്യാഭ്യാസ മന്ത്രാലയം ഈ വിഷയത്തില്‍ സര്‍ക്കുലര്‍ പുറപ്പെടുവിച്ചു. മതപരമായ ബന്ധം പരസ്യമായി പ്രകടിപ്പിക്കുന്ന രീതിയില്‍ ധരിക്കുകയാണെങ്കില്‍ അതിനെയും നിരോധിക്കാവുന്ന വസ്ത്ര ഇനങ്ങളില്‍ ഉള്‍പ്പെടുത്തി.
ഫ്രാന്‍സില്‍ 2004-ലും 2010ലും പൊതു ഇടങ്ങളില്‍ അബായ നിരോധിച്ചത് രാജ്യത്തെ അഞ്ച് ദശലക്ഷം മുസ്ലീം ജനസംഖ്യയുടെ വലിയൊരു വിഭാഗത്തെ പ്രകോപിപ്പിച്ചിരുന്നു
പ്രതിപക്ഷ, വലതുപക്ഷ റിപ്പബ്ലിക്കന്‍ പാര്‍ട്ടിയുടെ തലവന്‍ എറിക് സിയോട്ടോയും വാര്‍ത്തയെ സ്വാഗതം ചെയ്തു. സ്‌കൂളുകളില്‍ അബായകള്‍ നിരോധിക്കണമെന്ന് ഞങ്ങള്‍ പലതവണ ആവശ്യപ്പെട്ടിട്ടുണ്ടെന്നും അദ്ദേഹം പറഞ്ഞു.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.