'ഇന്ത്യയുമായുള്ള ബന്ധം പ്രധാനം; അത് തുടരാനാണ് ആഗ്രഹം': കനേഡിയന്‍ പ്രതിരോധ മന്ത്രി

ഓട്ടവ: ഇന്ത്യയുമായുള്ള ബന്ധം സുപ്രധാനമാണെന്ന് കാനഡ പ്രതിരോധ മന്ത്രി ബിൽ ബ്ലെയർ. ഖാലിസ്ഥാനി നേതാവിന്റെ കൊലപാതകവുമായി ബന്ധപ്പെട്ട അന്വേഷണം നടക്കുമ്പോള്‍ തന്നെ ഇന്തോ – പസഫിക് സഹകരണം ഉള്‍പ്പെടെയുള്ള മേഖലകളില്‍ ബന്ധം കൂടുതല്‍ ഊഷ്മളമായി തുടരാനാണ് കാനഡ ആഗ്രഹിക്കുന്നതെന്ന് ബിൽ ബ്ലെയർ പറഞ്ഞു. ദി വെസ്റ്റ് ബ്ലോക്കിൽ നൽകിയ അഭിമുഖത്തിലാണ് ഇന്ത്യയുമായുള്ള ബന്ധം പ്രധാനം ആണെന്ന് അദ്ദേഹം വ്യക്തമാക്കിയത്.

ഇന്ത്യയുമായുള്ള ബന്ധത്തെ സംബന്ധിച്ചിടത്തോളം ഇത് ഒരു വെല്ലുവിളി നിറഞ്ഞ പ്രശ്നമാണെന്ന് ഞങ്ങൾ മനസ്സിലാക്കുന്നു. എന്നാൽ നിയമം സംരക്ഷിക്കാനും പൗരന്മാരെ സംരക്ഷിക്കാനും സമഗ്രമായ അന്വേഷണം നടത്തി നിജസ്ഥിതി കണ്ടെത്താനും തങ്ങൾക്ക് ഉത്തരവാദിത്തമുണ്ടെന്ന് ബ്ലെയർ വ്യക്തമാക്കി. ഇൻഡോ-പസഫിക് നയതന്ത്രബന്ധം ഇപ്പോഴും കാനഡയെ സംബന്ധിച്ചിടത്തോളം നിർണായകമാണെന്നും മേഖലയിൽ സൈനിക സാന്നിധ്യം വർധിപ്പിക്കുന്നതിനും ഇത് കാരണമായെന്നും ബ്ലെയർ പറഞ്ഞു.

ജൂൺ 18 ന് ബ്രിട്ടീഷ് കൊളംബിയയിൽ ഖാലിസ്ഥാനി തീവ്രവാദി ഹർദീപ് സിങ് നിജ്ജാറിനെ (45) തന്റെ രാജ്യത്തിന്റെ മണ്ണിൽ വച്ച് കൊലപ്പെടുത്തിയതിൽ ഇന്ത്യൻ ഏജന്റുമാരുടെ സാധ്യത ഉണ്ടെന്ന കനേഡിയൻ പ്രധാനമന്ത്രി ജസ്റ്റിൻ ട്രൂഡോയുടെ സ്ഫോടനാത്മക ആരോപണത്തെത്തുടർന്ന് ഇന്ത്യയും കാനഡയും തമ്മിൽ രൂക്ഷമായ ഭിന്നത ഉടലെടുത്തു. 2020ൽ ഇന്ത്യ നിജ്ജാറിനെ ഭീകരനായി പ്രഖ്യാപിച്ചിരുന്നു.

വ്യാഴാഴ്ച കാനഡയുടെ മണ്ണിൽ നിന്ന് പ്രവർത്തിക്കുന്ന തീവ്രവാദികൾക്കും ഇന്ത്യാ വിരുദ്ധ ഘടകങ്ങൾക്കും എതിരെ ശക്തമായി ഇറങ്ങാൻ ഇന്ത്യ ആവശ്യപ്പെടുകയും കനേഡിയൻമാർക്കുള്ള വിസ സേവനങ്ങൾ താൽക്കാലികമായി നിർത്തിവയ്ക്കുകയും ചെയ്തു. നിജ്ജാറിനെ കൊന്നതിനെത്തുടർന്ന് ഇരു രാജ്യങ്ങളും തമ്മിലുള്ള ഭിന്നത അവരുടെ ബന്ധത്തെ എക്കാലത്തെയും മോശം നിലയിലേക്ക് തള്ളിവിട്ടു.