മുസ്ലീം ഭൂരിപക്ഷ രാഷ്ട്രമായ അസർബൈജാനുമായി സമാധാനം സ്ഥാപിക്കാനുള്ള ശ്രമങ്ങൾ അവസാനഘട്ടത്തലെന്ന് അർമേനിയൻ പ്രധാനമന്ത്രി

യെരേവാൻ: മുസ്ലീം ഭൂരിപക്ഷ രാഷ്ട്രമായ അസർബൈജാനുമായി സമാധാനം സ്ഥാപിക്കാനുള്ള ശ്രമം അവസാന വക്കിലെന്ന് അർമേനിയൻ പ്രധാനമന്ത്രി നിക്കോൾ പഷിനിയൻ. പതിറ്റാണ്ടുകളായി കടുത്ത ശത്രുക്കളായിരുന്ന ഇരു രാജ്യങ്ങളും ശത്രുത അവസാനിപ്പിച്ച് സമാധാന ഉടമ്പടിയിലെത്താൻ ഇനി മാസങ്ങൾ മാത്രമാണുള്ളതെന്ന് പഷിനിയൻ പറഞ്ഞു. വംശീയ ഉന്മൂലനം ഭയന്ന് നാഗോർണോ-കരാബാഖിലെ ഒരു ലക്ഷത്തിലധികം ക്രിസ്ത്യാനികൾ അടുത്തിടെ അർമേനിയയിലേക്ക് പലായനം ചെയ്തിരുന്നു.

ഇരു രാജ്യങ്ങളും തമ്മിലുള്ള സമാധാന ഉടമ്പടി രണ്ട് തത്വങ്ങളിൽ അധിഷ്ഠിതമായിരിക്കുമെന്ന് ജോർജിയയിലെ ടിബിലിസിയിൽ നടന്ന പൊതുപരിപാടിക്കിടെ പഷിനിയൻ വ്യക്തമാക്കി. അർമേനിയയും അസർബൈജാനും പ്രാദേശിക അഖണ്ഡതയെ പരസ്പരം അംഗീകരിക്കണം എന്നതാണ് ആദ്യത്തെ തത്വം. അർമേനിയയും അസർബൈജാനും 1991 ലെ അൽമാ-അറ്റ പ്രഖ്യാപനം പ്രകാരം രൂപീകരിച്ച കരാർ പാലിക്കുന്നു എന്നതാണ് രണ്ടാമത്തെ തത്വം. ഇത് പ്രകാരം ഓരോ രാഷ്ട്രവും പ്രാദേശിക സമഗ്രത, പരമാധികാരം എന്നിവ അംഗീകരിക്കുന്നു എന്നതാണ്.

കാസ്പിയൻ കടലിന് മുകളിലൂടെ തെക്കൻ കോക്കസസ് രാജ്യങ്ങളിലേക്കും മെഡിറ്ററേനിയനിലേക്കും ബന്ധിപ്പിക്കുന്ന ഒരു അന്തർദേശീയ റോഡും റെയിൽവേയും നിർമ്മിക്കാൻ പഷിനിയൻ നിർദേശിച്ചു. ഈ ഹൈവേ അർമേനിയ, അസർബൈജാൻ, തെക്കൻ കോക്കസസിലെ മറ്റ് നിരവധി രാജ്യങ്ങൾ എന്നിവയുടെ ഭാഗങ്ങൾ മുറിച്ചുകടക്കും. ഇത് മേഖലയ്ക്ക് കൂടുതൽ സാമ്പത്തിക അവസരങ്ങൾ കൊണ്ടുവരുമെന്നും പ്രധാനമന്ത്രി പറഞ്ഞു.

അത്തരമൊരു പദ്ധതി നമ്മുടെ മേഖലയിലെ എല്ലാ രാജ്യങ്ങൾക്കും വലിയ നേട്ടങ്ങൾ കൊണ്ടുവരും. എല്ലാ പ്രാദേശിക ആശയവിനിമയങ്ങളും ആരംഭിക്കാനും പുനർനിർമ്മിക്കാനും ഇത് ഉപകരിക്കും. അസർബൈജാൻ പ്രസിഡന്റ് ഇൽഹാം അലിയേവും തുർക്കി പ്രസിഡന്റ് റജബ് തയ്യിബ് എർദോഗനും അടുത്തിടെ ഒരു അന്തർദേശീയ ഹൈവേ നിർമ്മിക്കാൻ നിർദ്ദേശിച്ചിട്ടുണ്ട്. നിർദിഷ്ട ടർക്കിഷ്-അസെറി ഹൈവേ അർമേനിയൻ പ്രവിശ്യയായ സ്യൂനിക്കിന്റെ തെക്കൻ ഭാഗത്തിലൂടെ കടന്നുപോകും. ​​അത് കിഴക്കും പടിഞ്ഞാറും അസർബൈജാൻ അതിർത്തിയിലാണ്. ഈ റോഡ് അസർബൈജാനിലെ പ്രധാന ഭാഗത്തെ നഖ്‌ചിവൻ എന്നറിയപ്പെടുന്ന പടിഞ്ഞാറൻ എൻക്ലേവിലേക്കും തുർക്കിയിലേക്കും ബന്ധിപ്പിക്കും.

അർമേനിയയുമായുള്ള സമാധാന പ്രശ്‌നം അസർബൈജാൻ പ്രസിഡന്റ് ഇൽഹാം അലിയേവ് ഇതുവരെ അഭിസംബോധന ചെയ്തിട്ടില്ലെങ്കിലും, അർമേനിയ, അസർബൈജാൻ, തുർക്കി എന്നിവയുടെ വിദേശകാര്യ മന്ത്രിമാർ തിങ്കളാഴ്ച ഇറാനിൽ ഒരു ഉടമ്പടി ചർച്ച ചെയ്‌തതായി അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു. ഇറാന്റെയും റഷ്യയുടെയും വിദേശകാര്യ മന്ത്രിമാരും ചർച്ചയിൽ പങ്കെടുത്തു.