വത്തിക്കാന്‍ സിറ്റി: ദൈവസ്‌നേഹത്തിന്റെ ആഴവും ക്രൈസ്തവ വിശ്വാസത്തിന്റെ തീക്ഷണതയും വിശ്വാസികളിലേക്കു പകര്‍ന്ന ബെനഡിക്ട് പതിനാറാമന്‍ മാര്‍പാപ്പയുടെ രണ്ടാം ചരമ വാര്‍ഷിക ദിനത്തില്‍ പരിശുദ്ധ പിതാവിന്റെ സ്‌നേഹ സാന്നിധ്യം ഓര്‍ത്തെടുക്കുകയാണ്
മൂന്ന് സഹയാത്രികര്‍. കര്‍ദിനാള്‍ കുര്‍ട്ട് കോച്ച്, പ്രൊഫ. റാല്‍ഫ് വെയ്മാന്‍, ആര്‍ച്ച് ബിഷപ്പ് ജോര്‍ഗ് ഗാന്‍സ്വീന്‍ എന്നിവരാണ് വത്തിക്കാന്‍ ന്യൂസിനോട് ബെനഡിക്ട് മാര്‍പാപ്പയെക്കുറിച്ചുള്ള ഓര്‍മകള്‍ പങ്കുവെച്ചത്.
2022 ഡിസംബര്‍ 31-നാണ് പാപ്പ നിത്യതയിലേക്ക് യാത്രയായത്. വിയോഗത്തിന്റെ രണ്ട് ആണ്ടുകള്‍ പിന്നിടുമ്പോഴും പാപ്പയുടെ അദൃശ്യ സാന്നിധ്യം ആഗോള കത്തോലിക്ക സഭയ്ക്ക് കരുത്തുപകരുന്നു. ബെനഡിക്ട് മാര്‍പാപ്പയുടെ ചരമവാര്‍ഷികത്തോടനുബന്ധിച്ച് നടത്തിയ വിശുദ്ധ കുര്‍ബാനയ്ക്ക് ശേഷം കര്‍ദിനാള്‍ കുര്‍ട്ട് കോച്ച് വത്തിക്കാന്‍ ന്യൂസിനോട് സംസാരിച്ചു.
ചുറ്റുമുള്ളവരുടെ അടുത്തേക്ക് എത്തി അവര്‍ പറയുന്നത് ക്ഷമയോടെ കേള്‍ക്കുന്ന എളിമയുള്ള വ്യക്തിയായിരുന്നു ബെനഡിക്ട് മാര്‍പാപ്പയെന്ന്, ക്രിസ്ത്യന്‍ ഐക്യം പ്രോത്സാഹിപ്പിക്കുന്നതിനുള്ള ഡിക്കാസ്റ്ററിയുടെ പ്രിഫെക്റ്റായ കര്‍ദിനാള്‍ കുര്‍ട്ട് കോച്ച് അനുസ്മരിച്ചു.
'പരിശുദ്ധ പിതാവ് വളരെ ദയയുള്ള വ്യക്തിയായിരുന്നു. അവിടുത്തെ കണ്ണുകളിലേക്ക് നോക്കിയാല്‍, അവിടെ ധാരാളം ആന്തരിക വെളിച്ചം ഉണ്ടെന്ന് നമുക്ക് കാണാന്‍ കഴിയും. ഒരു ക്രിസ്ത്യാനിയാകുക എന്നതിനര്‍ത്ഥം മനുഷ്യനാകുക എന്നായിരുന്നു പാപ്പ ഉദ്‌ബോധിപ്പിച്ചിരുന്നത്'.
താന്‍ ദീര്‍ഘനാള്‍ മാര്‍പാപ്പയായി ഉണ്ടാകില്ലെന്നും അതിനാല്‍ വലിയ പദ്ധതികളൊന്നും ആരംഭിക്കാന്‍ തനിക്ക് കഴിയില്ലെന്നും ബെനഡിക്റ്റ് മാര്‍പാപ്പ ഒരിക്കല്‍ പറഞ്ഞിരുന്നു; വിശ്വാസത്തെ തിരികെ കൊണ്ടുവരിക എന്നതായിരുന്നു അദ്ദേഹത്തിന്റെ ഉത്കണ്ഠയും ദൗത്യവും.
ക്രിസ്മസ് രാവില്‍ ആരംഭിച്ച 2025-ലെ ജൂബിലി വര്‍ഷത്തിന്റെ പ്രാധാന്യം കണക്കിലെടുത്ത്, ബെനഡിക്റ്റ് പാപ്പ എഴുതിയ ചാക്രിക ലേഖനമായ സ്പെ സാല്‍വിയും കര്‍ദിനാള്‍ കോച്ച് പരാമര്‍ശിച്ചു.
'ഇത് ബെനഡിക്റ്റ് പാപ്പയുടെ അത്ഭുതകരമായ ചിന്തയാണ്' - കര്‍ദിനാള്‍ തുടര്‍ന്നു. 'സ്വയം ഗൗരവമായി കാണാത്ത ഒരു വ്യക്തിക്ക് മാത്രമേ പ്രത്യാശയുണ്ടാകൂ. നാം നമ്മെ കുറച്ചുകൂടി ലാഘവത്തോടെ വിട്ടാൽ, നമുക്ക് മാലാഖമാരെയും പക്ഷികളെയും പോലെ പറക്കാന്‍ കഴിയും. എന്നാല്‍ പലപ്പോഴും നാം നമ്മെത്തന്നെ വളരെ ഗൗരവത്തോടെ എടുക്കുന്നു, അങ്ങനെ ഭൂമിയില്‍ തന്നെ കുടുങ്ങിപ്പോകുന്നു. നമ്മുടെ ജീവിതത്തെ ദൈവത്തിലേക്ക് നയിക്കുകയാണെങ്കില്‍ മാത്രമേ നമുക്ക് പ്രത്യാശ ഉണ്ടാകൂ'.
വിശുദ്ധ വര്‍ഷത്തിന്റെ ആന്തരിക അര്‍ത്ഥമാണ് ബെനഡിക്റ്റ് പാപ്പ നമുക്ക് കാണിച്ചുതന്നത്.
യേശുക്രിസ്തുവിലൂടെ മാത്രമേ നമുക്ക് വിശുദ്ധിയിലെത്താന്‍ കഴിയൂ, മാമ്മോദീസയാല്‍ അവിടുന്ന് വാഗ്ദാനം ചെയ്ത വിശുദ്ധി കണ്ടെത്താന്‍ ഈ വിശുദ്ധ വര്‍ഷം വിശ്വാസികളെ പ്രാപ്തരാക്കുമെന്ന് ഞാന്‍ പ്രതീക്ഷിക്കുന്നു' - കര്‍ദിനാള്‍ കോച്ച് കൂട്ടിച്ചേര്‍ത്തു.
ഒരു ക്രിസ്ത്യാനിയും പിതാവും വ്യക്തിയെന്ന നിലയിലും വൈദികനെന്ന നിലയിലും ബെനഡിക്ട് പാപ്പ തന്നെ എത്രമാത്രം സ്വാധീനിച്ചുവെന്ന് പ്രൊഫ. റാല്‍ഫ് വെയ്മാന്‍ പറയുന്നത് ഇങ്ങനെയാണ്:
'എന്നെ സംബന്ധിച്ചിടത്തോളം, ബെനഡിക്ട് മാര്‍പാപ്പ യഥാർത്ഥ ക്രിസ്ത്യാനിയായിരുന്നു. യേശുക്രിസ്തുവിനെ ധരിച്ച ഒരാളാണ് ക്രിസ്ത്യാനി. ബെനഡിക്റ്റ് മാര്‍പാപ്പ അങ്ങനെയാണ് നിലകൊണ്ടത്. പാപ്പ തന്റെ സത്യവുമായി ക്രിസ്തുവിനെ അനുഗമിക്കുകയും അതിന് സാക്ഷ്യം വഹിക്കുകയും ചെയ്തു. അത് എന്റെ ഹൃദയത്തെ ആഴത്തിൽ സ്വാധീനിച്ചു, അതിന് ഞാന്‍ അദ്ദേഹത്തോട് നന്ദിയുള്ളവനാണ്. അദ്ദേഹം എനിക്ക് പിതാവിനെപ്പോലെയായിരുന്നു'.
ബെനഡിക്ട് പാപ്പയുടെ ദീര്‍ഘകാല പ്രൈവറ്റ് സെക്രട്ടറി ആര്‍ച്ച് ബിഷപ്പ് ജോര്‍ജ് ഗാന്‍സ്വീനിന് റോമില്‍ ഈ വര്‍ഷത്തെ അനുസ്മരണ ചടങ്ങില്‍ പങ്കെടുക്കാന്‍ കഴിഞ്ഞില്ല. ബാള്‍ട്ടിക് രാജ്യങ്ങളുടെ അപ്പസ്‌തോലിക് നുണ്‍ഷ്യോ ആണ് അദ്ദേഹം. എന്നിരുന്നാലും, ഈ പുതുവര്‍ഷ രാവില്‍ അദ്ദേഹത്തിന്റെ ചിന്തകള്‍ റോമിലായിരുന്നു.
'ഇത് രണ്ടാം വര്‍ഷമാണ് ബെനഡിക്ട് മാര്‍പാപ്പയില്ലാതെ ഞാന്‍ ക്രിസ്മസ് ആഘോഷിക്കുന്നത്' - ആര്‍ച്ച് ബിഷപ്പ് ഗാന്‍സ്വീന്‍ വത്തിക്കാന്‍ ന്യൂസിനോട് പറഞ്ഞു. 'ഭൂമിശാസ്ത്രപരമായി റോമില്‍ നിന്ന് അകലെയാണെങ്കിലും എന്റെ ആന്തരിക അടുപ്പം വര്‍ദ്ധിക്കുന്നു. തീര്‍ച്ചയായും എനിക്ക് ദുഖമുണ്ട്. പക്ഷേ, അദ്ദേഹത്തോടൊപ്പവും ചെലവഴിക്കാന്‍ കഴിഞ്ഞ എല്ലാ സമയത്തും എനിക്ക് ആന്തരികമായി പ്രത്യാശ അനുഭവപ്പെട്ടിരുന്നു.
പാപ്പയുടെ സഹായം എനിക്ക് എപ്പോഴും ലഭിച്ചിക്കുന്നു.
'സ്പെ സാല്‍വി” മനുഷ്യന്റെ പ്രത്യാശയെ പ്രാഥമികമായി ദൈവത്തിലേക്ക് നയിക്കുന്ന ഒരു വിജ്ഞാനകോശമാണ്. ആത്യന്തികമായി ദൈവം തന്നെയാണ് ഈ പ്രത്യാശ സ്ഥാപിക്കുന്നത്. അവനിലാണ് ഈ പ്രത്യാശയുടെ അടിസ്ഥാനവും ലക്ഷ്യവും. എന്നെ സംബന്ധിച്ചിടത്തോളം, പ്രത്യാശ എന്റെ സ്വന്തം ജീവിതത്തിന്റെ നങ്കൂരവും ലക്ഷ്യവും കൂടിയാണ്. പ്രയാസങ്ങള്‍ തരണം ചെയ്യാനും എന്റെ ലക്ഷ്യത്തിലേക്കും ദൈവത്തില്‍ സ്ഥാപിച്ചിരിക്കുന്ന പ്രത്യാശയിലേക്കും നോക്കാനും പാപ്പ പകർന്നു തന്ന പ്രത്യാശ എന്നെ സഹായിക്കുന്നു.' - ആര്‍ച്ച് ബിഷപ്പ് കൂട്ടിച്ചേര്‍ത്തു.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.