ഡ്രൈവര്‍മാര്‍ ജാഗ്രത! നാളെ മുതല്‍ ഫാസ്ടാഗ് നിയമങ്ങള്‍ അടിമുടി മാറും

ന്യൂഡല്‍ഹി: രാജ്യത്തെ ഫാസ്ടാഗ് നിയമങ്ങള്‍ നാളെ മുതല്‍ അടിമുടി മാറും. നാഷണല്‍ പേയ്മെന്റ്‌സ് കോര്‍പ്പറേഷന്‍ ഓഫ് ഇന്ത്യ അടുത്തിടെ ഒരു സര്‍ക്കുലര്‍ പുറത്തിറക്കിയിരുന്നു. അതില്‍ പുതിയ ഫാസ്ടാഗ് നിയമത്തെക്കുറിച്ചുള്ള വിവരങ്ങള്‍ നല്‍കിയിട്ടുണ്ട്. നാഷണല്‍ പേയ്മെന്റ്‌സ് കോര്‍പ്പറേഷന്‍ ഓഫ് ഇന്ത്യ പുറപ്പെടുവിച്ച സര്‍ക്കുലര്‍ അനുസരിച്ച്, ഫാസ്ടാഗുമായി ബന്ധപ്പെട്ട പുതിയ നിയമം 2025 ഫെബ്രുവരി 17 മുതല്‍ പ്രാബല്യത്തില്‍ വരും.

ഫാസ്ടാഗ് ബാലന്‍സ് വാലിഡേഷന്‍ നിയമങ്ങളില്‍ എന്‍പിസിഐ വലിയ മാറ്റം വരുത്തി. ഈ മാറ്റം ഫാസ്ടാഗ് ഇന്‍സ്റ്റാള്‍ ചെയ്തിട്ടുള്ള എല്ലാ ഉപയോക്താക്കളെയും ബാധിക്കും. പുതിയ നിയമം നിങ്ങളെ എങ്ങനെ ബാധിക്കുമെന്ന് അറിയാം.

ഫാസ്ടാഗുമായി ബന്ധപ്പെട്ട പുതിയ നിയമങ്ങള്‍ നിങ്ങള്‍ അവഗണിക്കുകയാണെങ്കില്‍, നിങ്ങള്‍ക്ക് 176 എന്ന കോഡ് നേരിടേണ്ടി വന്നേക്കാം. ലളിതമായ ഭാഷയില്‍ കോഡ് 176 എന്നാല്‍ ഫാസ്ടാഗ് വഴിയുള്ള പണമടയ്ക്കല്‍ നിരസിക്കല്‍ അല്ലെങ്കില്‍ പിശക് എന്നാണ് അര്‍ത്ഥമാക്കുന്നത്.

പുതിയ ഫാസ്ടാഗ് നിയമം

ഫാസ്ടാഗ് സ്‌കാന്‍ ചെയ്യുന്നതിന് 60 മിനിറ്റ് മുമ്പ് ഫാസ്ടാഗ് ബ്ലാക്ക്ലിസ്റ്റ് ചെയ്യുകയോ, ഹോട്ട്ലിസ്റ്റില്‍ വെക്കുകയോ അല്ലെങ്കില്‍ ടോള്‍ ബൂത്തില്‍ എത്തുന്നതിന് ഒരു മണിക്കൂറില്‍ കൂടുതല്‍ കുറഞ്ഞ ബാലന്‍സ് ഉണ്ടാവുകയോ ചെയ്താല്‍ ഇടപാട് നിരസിക്കപ്പെടും.

അതുപോലെ ഫാസ്ടാഗ് സ്‌കാന്‍ ചെയ്ത് 10 മിനിറ്റിന് ശേഷം ടാഗ് ബ്ലാക്ക്ലിസ്റ്റ് ചെയ്യുകയോ പ്രവര്‍ത്തന രഹിതമാവുകയോ ചെയ്താല്‍, ഇടപാട് വീണ്ടും നിരസിക്കപ്പെടും. ഈ രണ്ട് ഘട്ടങ്ങളിലും ഫാസ്ടാഗ് ഉടമകളില്‍ നിന്ന് പിഴയായി ഇരട്ടി ടോള്‍ ഈടാക്കും.

ടോള്‍ നികുതി ഇരട്ടിയാക്കും

ടോള്‍ പ്ലാസയില്‍ പണമടയ്ക്കല്‍ നിരസിക്കപ്പെട്ടാല്‍ നിങ്ങള്‍ ഇരട്ടി ടോള്‍ നല്‍കേണ്ടിവരും. ഇരട്ടി ടോള്‍ നല്‍കുന്നത് ഒഴിവാക്കാന്‍ വീട്ടില്‍ നിന്ന് പുറപ്പെടുന്നതിന് മുമ്പ് നിങ്ങളുടെ ഫാസ്ടാഗ് റീചാര്‍ജ് ചെയ്യുക, കൂടാതെ നിങ്ങളുടെ ഫാസ്ടാഗ് കരിമ്പട്ടികയില്‍ പെടുത്തിയിട്ടില്ലെന്ന് ഉറപ്പാക്കുകയും വേണം.

എന്താണ് ഫാസ്ടാഗ് ബ്ലാക്ക്ലിസ്റ്റ് ?

ഫാസ്ടാഗിനെ ബ്ലാക്ക്ലിസ്റ്റ് ചെയ്യുക എന്നാല്‍ നിങ്ങളുടെ കാര്‍ഡ് സസ്‌പെന്‍ഡ് ചെയ്യുകയോ നിര്‍ജ്ജീവമാക്കുകയോ ചെയ്യുക എന്നതാണ്. ഫാസ്ടാഗ് കരിമ്പട്ടികയില്‍ പെടുത്തുന്നതിന് നിരവധി കാരണങ്ങളുണ്ടാകാം. ഇതില്‍ ഏറ്റവും വലുതും പ്രധാനവുമായ കാരണം കുറഞ്ഞ ബാലന്‍സ് ആണ്. ഒപ്പം കെ.വൈ.സി (KYC) വെരിഫിക്കേഷന്‍ പൂര്‍ത്തിയാക്കാതിരിക്കുക, വാഹനവുമായി ബന്ധപ്പെട്ട പരിഹരിക്കപ്പെടാത്ത നിയമപരമായ പ്രശ്‌നങ്ങള്‍ തുടങ്ങിയ കാരണങ്ങളും ബ്ലാക്ക് ലിസ്റ്റിലേക്ക് നയിച്ചേക്കാം. ഈ പ്രശ്‌നങ്ങള്‍ പരിഹരിക്കുന്നത് വരെ ബ്ലാക്ക്ലിസ്റ്റ് ചെയ്ത ടാഗ് ടോള്‍ ബൂത്തുകളില്‍ ഉപയോഗിക്കാന്‍ കഴിയില്ല.

ശ്രദ്ധിക്കേണ്ട പ്രധാന കാര്യങ്ങള്‍

ഫാസ്ടാഗ് ബ്ലാക്ക്ലിസ്റ്റ് ചെയ്തിട്ടുണ്ടെങ്കില്‍, അവസാന നിമിഷത്തെ റീചാര്‍ജുകള്‍ നടക്കില്ല. ടോള്‍ പ്ലാസയില്‍ എത്തുന്നതിന് 60 മിനിറ്റ് മുന്‍പ് ഫാസ്ടാഗ് മോശം അവസ്ഥയില്‍ (ബ്ലാക്ക്ലിസ്റ്റ്/കുറഞ്ഞ ബാലന്‍സ്) ആയിരിക്കുകയും 10 മിനിറ്റിന് ശേഷവും അതേ അവസ്ഥയില്‍ തുടരുകയുമാണെങ്കില്‍ ടോള്‍ ഈടാക്കില്ല.
മുമ്പ്, ടോള്‍ ബൂത്തില്‍ ഫാസ്ടാഗ് റീചാര്‍ജ് ചെയ്ത് കടന്നുപോകാമായിരുന്നു. എന്നാല്‍ ഇനി മുതല്‍, ഫാസ്ടാഗ് ഉടമകള്‍ അവരുടെ ഫാസ്ടാഗിന്റെ സ്റ്റാറ്റസ് മുന്‍കൂട്ടി പരിശോധിക്കണം.

ആവശ്യത്തിന് ബാലന്‍സ് നിലനിര്‍ത്തുകയും കെ.വൈ.സി വിവരങ്ങള്‍ കൃത്യമായി നല്‍കിയിട്ടുണ്ടെന്ന് ഉറപ്പാക്കുകയും ചെയ്യണം. യാത്ര ചെയ്യുമ്പോള്‍ ഉണ്ടാകാവുന്ന ബുദ്ധിമുട്ടുകള്‍ ഒഴിവാക്കാന്‍ ഇത് സഹായിക്കും.

ഫാസ്ടാഗ് നില എങ്ങനെ പരിശോധിക്കാം

യാത്ര തുടങ്ങുന്നതിന് മുമ്പ് നിങ്ങളുടെ ഫാസ്ടാഗ് സജീവമാണെന്ന് ഉറപ്പാക്കുക. അതിന്റെ നില നിരീക്ഷിക്കാന്‍ ഫാസ്ടാഗ് കസ്റ്റമര്‍ പോര്‍ട്ടല്‍ ഉപയോഗിക്കാം.
നിങ്ങളുടെ ടാഗ് സജീവമാണോ, പ്രവര്‍ത്തനരഹിതമാണോ, തടസപ്പെടുത്തിയിരിക്കുകയാണോ എന്നറിയാന്‍, ഔദ്യോഗിക പോര്‍ട്ടലില്‍ (https://www.npci.org.in/what-we-do/netc-fastag/check-your-netc-fastag-status) ലോഗിന്‍ ചെയ്യുക.

എസ്എംഎസ് അലര്‍ട്ടുകള്‍: ബാലന്‍സ് കുറവാണെങ്കില്‍ അല്ലെങ്കില്‍ നെഗറ്റീവ് ആണെങ്കില്‍ എസ്എംഎസ് അയയ്ക്കും.

കരിമ്പട്ടിക എങ്ങനെ അറിയാം?

ഗതാഗത വകുപ്പിന്റെ ഔദ്യോഗിക വെബ്‌സൈറ്റ് സന്ദര്‍ശിക്കുക. ഇവിടെ നിങ്ങള്‍ 'ഇ-ചലാന്‍ സ്റ്റാറ്റസ് പരിശോധിക്കുക' അല്ലെങ്കില്‍ സമാനമായ ഓപ്ഷന്‍ തിരഞ്ഞെടുക്കണം. തുടര്‍ന്ന് നിങ്ങളുടെ വാഹന രജിസ്‌ട്രേഷന്‍ നമ്പര്‍ നല്‍കുക. ഇതുവഴി നിങ്ങളുടെ വാഹനം കരിമ്പട്ടികയില്‍ പെടുത്തിയിട്ടുണ്ടോ ഇല്ലയോ എന്ന് അറിയാന്‍ കഴിയും.

ഫാസ്ടാഗ് അണ്‍ബ്ലോക്ക് ചെയ്യാന്‍, ആദ്യം ഫാസ്ടാഗ് റീചാര്‍ജ് ചെയ്യുക. ഇതിന് ശേഷം മിനിമം ബാലന്‍സ് നിലനിര്‍ത്തുക. തുടര്‍ന്ന് പേയ്മെന്റ് സ്ഥിരീകരിക്കുക. ഇതിന് ശേഷം ഫാസ്ടാഗിന്റെ നില അറിയാം. കുറച്ച് സമയത്തിനുള്ളില്‍ ഫാസ്ടാഗ് സജീവമാകും.

ബ്ലാക്ക്ലിസ്റ്റ് ചെയ്ത ഫാസ്ടാഗ് എങ്ങനെ അണ്‍ബ്ലോക്ക് ചെയ്യാം?

ഫാസ്ടാഗ് അണ്‍ബ്ലോക്ക് ചെയ്യാന്‍ ആദ്യം ഫാസ്ടാഗ് അക്കൗണ്ടില്‍ കുറഞ്ഞ തുകയെങ്കിലും റീചാര്‍ജ് ചെയ്യുക. പണം ചേര്‍ത്തു കഴിഞ്ഞാല്‍ ഫാസ്ടാഗിന്റെ സ്റ്റാറ്റസ് എന്താണെന്ന് ഒന്ന് പരിശോധിക്കുക. പെയ്മെന്റ് ശരിയായിട്ടുണ്ടോ എന്നും ഉറപ്പ് വരുത്തുക.

റീചാര്‍ജ് ചെയ്തു കഴിഞ്ഞാല്‍ ചിലപ്പോള്‍ ഫാസ്ടാഗ് ശരിയായി പ്രവര്‍ത്തിക്കാന്‍ കുറച്ചു സമയം എടുത്തേക്കാം. അതുവരെ കാത്തിരിക്കുക. ഒരു വാഹനത്തില്‍ ഫാസ്ടാഗ് ഇന്‍സ്റ്റാള്‍ ചെയ്തു കഴിഞ്ഞാല്‍, അത് മറ്റൊരു വാഹനത്തിലേക്ക് മാറ്റാന്‍ കഴിയില്ല. ഏത് ബാങ്കില്‍ നിന്നും ടാഗ് വാങ്ങാം. ഇത് നാഷണല്‍ ഇലക്ട്രോണിക് ടോള്‍ കളക്ഷന്‍ (NETC) സിസ്റ്റത്തിന്റെ ഭാഗമാണ്.

ഫാസ്ടാഗ് ഒരു പ്രീപെയ്ഡ് അക്കൗണ്ടുമായി ലിങ്ക് ചെയ്തിട്ടുണ്ടെങ്കില്‍ ബാക്കി തുക തീര്‍ന്ന് കഴിഞ്ഞാല്‍ ഡ്രൈവര്‍ അക്കൗണ്ട് റീചാര്‍ജ് ചെയ്യേണ്ടി വരും. ഏത് ടോള്‍ പ്ലാസയിലും ഡ്രൈവര്‍മാര്‍ക്ക് അവരുടെ ഫാസ്റ്റ് ടാഗ് ഉപയോഗിക്കാന്‍ കഴിയുന്ന തരത്തിലാണ് ഫാസ്റ്റ് ടാഗ് രൂപകല്‍പന ചെയ്തിരിക്കുന്നത്.