ഇറ്റാവ: ഉത്തരേന്ത്യയിലെ മിഷന്‍ പ്രവര്‍ത്തനരംഗത്ത് മനോഹരമായ സുവര്‍ണ പുസ്തകം രചിച്ച് ഇറ്റാവാ മിഷന്‍ സുവര്‍ണ ജൂബിലി ആഘോഷം 2025 ഏപ്രില്‍ 27 ന് നടത്തപ്പെട്ടു. വിശുദ്ധ കുര്‍ബാനയോടു കൂടി ആരംഭിച്ച ജൂബിലി ആഘോഷത്തില്‍ ചങ്ങനാശേരി അതിരൂപതാ മെത്രാപ്പോലീത്ത മാര്‍ തോമസ് തറയില്‍ മുഖ്യകാര്‍മ്മികത്വം വഹിച്ചു.
വചന സന്ദേശം ആഗ്ര അതിരൂപതാ മെത്രാപ്പോലീത്ത ഡോ. റാഫി മഞ്ഞളി നല്‍കിയ. സഹകാര്‍മ്മികരായി ചങ്ങനാളേരി അതിരൂപതാ മുന്‍ അധ്യക്ഷന്‍ മാര്‍ ജോസഫ് പെരുന്തോട്ടം, ആഗ്ര അതിരൂപതയുടെ മുന്‍ അധ്യക്ഷന്‍ ഡോ. ആല്‍ബര്‍ട്ട് ഡിസൂസ, ഷംഷാബാദ് രൂപതാധ്യക്ഷന്‍ മാര്‍ പ്രിന്‍സ് പാണേങ്ങാടന്‍, ഷംഷാബാദ് സഹായ മെത്രാന്‍ മാര്‍ തോമസ് പാടിയത്ത്, ഗോരക്പൂര്‍ രൂപതാധ്യക്ഷന്‍ മാര്‍ മാത്യൂ നെല്ലിക്കുന്നേല്‍ സി.എസ്.ടി, ജഗദല്‍പൂര്‍ രൂപതാധ്യക്ഷന്‍ മാര്‍ ജോസഫ് കൊല്ലംപറമ്പില്‍ സിഎംഐ, ഉജ്ജയിന്‍ രൂപതാധ്യക്ഷന്‍ മാര്‍ സെബാസ്റ്റ്യന്‍ വടക്കേല്‍ എംഎസ്ടി, ഫരീദാബാദ് രൂപതാധ്യക്ഷന്‍ മാര്‍ കുര്യാക്കോസ് ഭരണികുളങ്ങര, ജയ്പൂര്‍ രൂപതാധ്യക്ഷന്‍ ഡോ. ജോസഫ് കല്ലറക്കല്‍, മീററ്റ് രൂപതാധ്യക്ഷന്‍ ഡോ. ഭാസ്‌കര്‍ യേസുരാജ്, ലക്‌നൗ രൂപതാധ്യക്ഷന്‍ ഡോ. ജെറാള്‍ഡ് ജോണ്‍ മത്തിയാസ്, ജാന്‍സി രൂപതാധ്യക്ഷന്‍ ഡോ. വില്‍ഫ്രഡ് മോറസും നൂറിലധികം വൈദികരും വിശുദ്ധ കുര്‍ബാനയില്‍ പങ്കുചേര്‍ന്നു. നൂറ്റമ്പതില്‍പരം സന്യസ്തരും ആയിരത്തില്‍പരം മിഷനിലെ വിശ്വാസികളും കൃതജ്ഞതയുടെ ബലിയില്‍ ഒന്നുചേര്‍ന്നു.
ജൂബിലിയുടെ ഭാഗമായി മിഷനിലുള്ള 13 കുട്ടികളുടെ ആഘോഷമായ പരിശുദ്ധ കുര്‍ബാന സ്വീകരണം നടത്തി. തുടര്‍ന്ന് വിടവാങ്ങിയ ഫ്രാന്‍സിസ് മാര്‍പാപ്പയുടെ ആത്മശാന്തിക്കായി മാര്‍ ജോസഫ് കൊല്ലംപറമ്പിലിന്റെ മുഖ്യ കാര്‍മ്മികത്വത്തില്‍ പ്രാര്‍ത്ഥനയും നടത്തപ്പെട്ടു.
ഷംഷാബാദ് രൂപതയുടെ സഹായമെത്രാനും ഇറ്റാവാ രാജസ്ഥാന്‍ റീജിയണിന്റെ പ്രത്യേക ചുമതലയുള്ള മാര്‍ തോമസ് പാടിയത്ത് സ്വാഗത സന്ദേശത്തോടുകൂടി ജൂബിലി സമാപന സമ്മേളന പരിപാടികള്‍ക്ക് തുടക്കമായി. സമ്മേളനത്തിന്റെ അധ്യക്ഷപദം അലങ്കരിച്ച ഷംഷാബാദ് രൂപതാധ്യക്ഷന്‍ മാര്‍ പ്രിന്‍സ് പാണേങ്ങാടന്‍ സദസിനെ അഭിസംബോധന ചെയ്ത് സംസാരിച്ചു.
ചങ്ങനാശേരി അതിരൂപതയുടെ മുന്‍ അധ്യക്ഷന്‍ മാര്‍ ജോസഫ് പെരുന്തോട്ടം സമ്മേളനത്തിന്റെ ഉദ്ഘാടനം നിര്‍വഹിച്ച് സംസാരിച്ചു. മാര്‍ തോമസ് തറയില്‍, മാര്‍ ജോസഫ് പെരുന്തോട്ടം, ഡോ. റാഫി മഞ്ഞളി, ഡോ. ആല്‍ബര്‍ട്ട് ഡിസൂസ, മാര്‍ സെബാസ്റ്റ്യന്‍ വടക്കേല്‍, മാര്‍ പ്രിന്‍സ് പാണേങ്ങാടന്‍, മാര്‍ തോമസ് പാടിയത്ത്, ബ്രഹ്മാനന്ദ് കട്ടേരിയ PCS (SDM), സി. പവിത്ര സിഎംസി, സി. റെജിസ് സിഎംസി, ലൗലി, റോമന്‍ എന്നിവര്‍ ചേര്‍ന്ന് തിരി തെളിയിച്ചാണ് സമ്മേളനം ഉദ്ഘാടനം ചെയ്തത്.
സീറോ മലബാര്‍ സഭയുടെ മേജര്‍ ആര്‍ച്ച് ബിഷപ്പ് മാര്‍ റാഫേല്‍ തട്ടില്‍ വീഡിയോ കോണ്‍ഫറന്‍സിലൂടെ സദസിനെ അഭിസംബോധന ചെയ്ത് സംസാരിക്കുകയും തുടര്‍ന്ന് ആഗ്ര അതിരൂപതയുടെ മുന്‍ അധ്യക്ഷന്‍ ഡോ. ആല്‍ബര്‍ട്ട് ഡിസൂസ, മാര്‍ സെബാസ്റ്റ്യന്‍ വടക്കേല്‍ എംഎസ്ടി, ബ്രഹ്മാനന്ദ് കട്ടേരിയ പിസിഎസ് (എസ്.ഡി.എം), സി. പവിത്ര സിഎംസി എന്നിവര്‍ ആശംസാ പ്രസംഗം നടത്തി.
പൗരോഹിത്യത്തിന്റെ സില്‍വര്‍ ജൂബിലി ആഘോഷിക്കുന്ന മിഷണറിമാരായ ഫാ. ജിജു കുളത്തിങ്കല്‍, ഫാ. ജിയോ ചേക്കാത്തടത്തില്‍, ഫാ. ബിനോയി പാറയ്ക്കല്‍ എന്നിവരെയും സന്യാസ സമര്‍പ്പണ ജീവിതത്തിന്റെ സില്‍വര്‍ ജൂബിലി ആഘോഷിക്കുന്ന സി. ജെസി വര്‍ഗീസ് എസ്.ജെ.എസ്.എം, സി. നവ്യ തോപ്പിലാന്‍ എസ്.ജെ.എസ്.എം, സി. ആന്‍സിന്‍ എസ്.എച്ച്, സി. ലിസ് എസ്.എച്ച്, സി. ജിന്‍സി സിഎംസിയെയും വിവാഹ ജീവിതത്തിന്റെ 25 വര്‍ഷം പൂര്‍ത്തിയാക്കിയ ദമ്പതികളെയും മെമെന്റോ നല്‍കി ആദരിച്ചു.
ഫത്തേഗഡ് ഇടവകാംഗങ്ങളുടെ മിഷന്‍ ചരിത്രത്തിന്റെ ദൃശ്യാവിഷ്‌കരണവും ഇറ്റാവാ ഇടവകാംഗങ്ങളുടെ നൃത്തച്ചുവടുകളും ഫ്രാന്‍സീസ് മീനത്തേരിയച്ചന്റെ നേതൃത്വത്തില്‍ നടന്ന സംഗീത വിരുന്നും ആഘോഷങ്ങള്‍ക്ക് ഹൃദ്യത പകര്‍ന്നു. പരിപാടിയുടെ അവസാനം മിഷന്‍ സുപ്പീരിയര്‍ ഫാ. തോമസ് എഴിക്കാട് എല്ലാവര്‍ക്കും നന്ദിയും അഭിനന്ദനങ്ങളും അര്‍പ്പിച്ചു.
1975-ല്‍ ചങ്ങനാശേരി അതിരൂപതയുടെ നേതൃത്വത്തില്‍ ആരംഭിച്ച ഈ മിഷന്‍, ഇന്ന് ഷംഷാബാദ് രൂപതയുടെ ഭാഗമായി ക്രിസ്തുവിന്റെ സുവിശേഷത്തിന് ശക്തമായ സാക്ഷ്യം നല്‍കികൊണ്ട് മുന്നേറുകയാണ്.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.