കൊളംബസ്: ആധുനിക ലോകത്ത് യുവജനങ്ങളെ വിശുദ്ധിയിലേക്കും ക്രിസ്തു വിശ്വാസത്തിലേക്കും നയിക്കുക എന്ന ലക്ഷ്യത്തോടെ 'സീക്ക് 2026' (SEEK 2026) കോൺഫറൻസിന് തുടക്കമായി. അമേരിക്കൻ കത്തോലിക്കാ യുവജന സംഘടനയായ ഫോക്കസിന്റെ നേതൃത്വത്തിൽ നടക്കുന്ന ഈ വാർഷിക സമ്മേളനത്തിൽ 26,000 ത്തിലധികം വിദ്യാർത്ഥികളാണ് പങ്കെടുക്കുന്നത്.
അമേരിക്കയിലെ കൊളംബസ്, ഫോർട്ട് വർത്ത്, ഡെൻവർ എന്നീ മൂന്ന് പ്രധാന നഗരങ്ങളിലായാണ് ഒരേസമയം സമ്മേളനം നടക്കുന്നത്. "ഉയരങ്ങളിലേക്ക്" എന്നതാണ് ഇത്തവണത്തെ പ്രമേയം. കഴിഞ്ഞ സെപ്റ്റംബറിൽ വിശുദ്ധനായി പ്രഖ്യാപിക്കപ്പെട്ട ഇറ്റാലിയൻ യുവാവ് പിയർ ജോർജിയോ ഫ്രസാത്തിയുടെ ജീവിതത്തെ ആസ്പദമാക്കിയാണ് ഈ സന്ദേശം തിരഞ്ഞെടുത്തിരിക്കുന്നത്. ജീവിതത്തെ വിശുദ്ധിയോടെ സമീപിക്കാനും ക്രിസ്തുവുമായുള്ള ബന്ധം ആഴപ്പെടുത്താനും യുവജനങ്ങളെ പ്രചോദിപ്പിക്കുകയാണ് കോൺഫറൻസിന്റെ ലക്ഷ്യം.
ജനുവരി ഒന്നിന് ആരംഭിച്ച സമ്മേളനത്തിൽ വചനപ്രഘോഷണങ്ങൾ, വിശുദ്ധ കുർബാന, ആരാധന, കുമ്പസാരം എന്നിവയ്ക്ക് പുറമെ ആത്മീയ വിഷയങ്ങളിൽ സെഷനുകളും നടക്കുന്നുണ്ട്. ലോകപ്രശസ്ത വചനപ്രഘോഷകരായ ഫാ. മൈക്ക് ഷ്മിറ്റ്സ്, ഡോ. എഡ്വേർഡ് ശ്രീ, മാറ്റ് ഫ്രാഡ്, സിസ്റ്റർ ജോസഫിൻ ഗാരറ്റ് എന്നിവരടക്കമുള്ള പ്രമുഖർ വിവിധ ക്ലാസുകൾക്ക് നേതൃത്വം നൽകുന്നു.
ദരിദ്രരോടുള്ള കരുതലും ദിവ്യകാരുണ്യത്തോടുള്ള ഭക്തിയും ജീവിതത്തിൽ കാത്തുസൂക്ഷിച്ച ഫ്രസാത്തിയുടെ മാതൃക പിന്തുടരാൻ സമ്മേളനം യുവജനങ്ങളെ ആഹ്വാനം ചെയ്യുന്നു. കോൺഫറൻസിന്റെ ഉദ്ഘാടന രാത്രിയിൽ, ഒരു കത്തോലിക്കാ യുവാവ് എപ്രകാരമായിരിക്കണം എന്നതിനെക്കുറിച്ച് പ്രഭാഷകർ സംസാരിച്ചു.
അമേരിക്കയിലെ ഏറ്റവും വലിയ കത്തോലിക്കാ യുവജന സംഗമങ്ങളിലൊന്നായ 'സീക്ക്', ഓരോ വർഷവും ആയിരക്കണക്കിന് യുവാക്കളെ വിശ്വാസവഴിയിലേക്ക് മടക്കിക്കൊണ്ടുവരുന്നതിൽ നിർണായക പങ്കുവഹിക്കുന്നു.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള് സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്ളീല പദപ്രയോഗങ്ങളും ദയവായി ഒഴിവാക്കുക.