വിവേചനപരമായാണ് ജഡ്ജി പെരുമാറിയത്. ദിലീപിനെ കുറ്റവിമുക്തമാക്കാന് തയ്യാറാക്കിയതാണ് ഈ വിധിയെന്നും നിയമോപദേശത്തില് പ്രോസിക്യൂഷന് ഡയറക്ടര് ജനറല്.
കൊച്ചി: നടിയെ ആക്രമിച്ച കേസില് വിചാരണ കോടതി ജഡ്ജിക്കെതിരെ ഗുരുതര പരാമര്ശങ്ങളുമായി പ്രോസിക്യൂഷന് ഡയറക്ടര് ജനറലിന്റെ നിയമോപദേശം. സ്പെഷ്യല് പ്രോസിക്യൂട്ടറുടെ വിശദമായ കുറിപ്പും നിയമോപദേശത്തിലുണ്ട്. മെമ്മറി കാര്ഡ് ചോര്ന്ന കേസില് സംശയ നിഴലിലാണ് വിചാരണ കോടതി ജഡ്ജിയെന്നും അതിനാല് ജഡ്ജിക്ക് വിധി പറയാന് അവകാശമില്ലെന്നുമാണ് നിയമോപദേശം.
ദിലീപിനെതിരെ ഗൗരവമേറിയ നിരവധി തെളിവുകള് സമര്പ്പിച്ചിട്ടും എല്ലാം പക്ഷപാതത്തോടെ കോടതി തള്ളിയെന്നും നടനെ കുറ്റവിമുക്തമാക്കാന് തയ്യാറാക്കിയതാണ് ഈ വിധിയെന്നും നിയമോപദേശത്തില് പറയുന്നു. വിവേചനപരമായാണ് ജഡ്ജി പെരുമാറിയത്.
തെളിവുകള് പരിശോധിക്കാന് കോടതി സ്വീകരിച്ചത് രണ്ട് തരം സമീപനമാണ്. ഒന്ന് മുതല് ആറ് വരെ പ്രതികള്ക്ക് എതിരെ അംഗീകരിച്ച തെളിവുകള് പോലും ദിലീപിനെതിരെ അംഗീകരിച്ചില്ല. തെളിവ് നശിപ്പിക്കാന് കൂട്ടുനിന്നെന്ന് തെളിഞ്ഞ ദിലീപിന്റെ അഭിഭാഷകരെ തുടരാന് അനുവദിച്ചു.
അവരുടെ പ്രവൃത്തിയെ അനുമോദിക്കുന്ന തരത്തിലാണ് വിധിയിലെ പരാമര്ശങ്ങള് എന്നും നിയമോപദേശത്തില് പറയുന്നു. അടുത്ത ആഴ്ച്ച സര്ക്കാര് അപ്പീല് നല്കും.
കേസില് പള്സര് സുനി ഉള്പ്പെടെയുള്ള ആറ് പ്രതികള്ക്ക് 20 വര്ഷം കഠിന തടവ് വിധിച്ചെങ്കിലും, ഗൂഢാലോചന കുറ്റം തെളിയിക്കാന് പ്രോസിക്യൂഷന് കഴിഞ്ഞില്ലെന്ന് ചൂണ്ടിക്കാട്ടിയാണ് ദിലീപിനെ വിചാരണ കോടതി വെറുതെ വിട്ടത്. എറണാകുളം പ്രിന്സിപ്പല് സെഷന്സ് ജഡ്ജി ഹണി എം. വര്ഗീസാണ് കേസില് ശിക്ഷ വിധിച്ചത്.
എന്നാല് കേസിലെ ഗൂഢാലോചനയുമായി ബന്ധപ്പെട്ട് ശക്തമായ തെളിവുകള് തങ്ങളുടെ പക്കലുണ്ടെന്നും ഉയര്ന്ന കോടതിയില് ഇത് തെളിയിക്കാന് കഴിയുമെന്നുമാണ് പ്രോസിക്യൂഷന്റെയും അന്വേഷണ സംഘത്തിന്റെയും നിലപാട്. വിധിയിലെ സാങ്കേതികവും നിയമപരവുമായ പിഴവുകള് അപ്പീലില് ചൂണ്ടിക്കാട്ടും.
ദിലീപും പള്സര് സുനിയും തമ്മിലുള്ള ബന്ധം തെളിയിക്കുന്ന ഡിജിറ്റല് തെളിവുകളും സാക്ഷി മൊഴികളും വിചാരണ കോടതി പരിഗണിച്ചില്ലെന്നാണ് സര്ക്കാരിന്റെ വാദം. മെമ്മറി കാര്ഡിന്റെ ഹാഷ് വാല്യൂ മാറിയത് ഉള്പ്പെടെയുള്ള സാങ്കേതിക വിവരങ്ങളും സംവിധായകന് ബാലചന്ദ്രകുമാര് ഹാജരാക്കിയ ശബ്ദ രേഖകളും പുനപരിശോധിക്കണമെന്ന ആവശ്യവും പ്രോസിക്യൂഷന് ഉന്നയിച്ചേക്കും.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള് സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്ളീല പദപ്രയോഗങ്ങളും ദയവായി ഒഴിവാക്കുക.