2026 നിയമസഭാ തിരഞ്ഞെടുപ്പ്: ഇന്ത്യൻ രാഷ്ട്രീയത്തിലെ പുതിയ അധികാര സമവാക്യങ്ങൾ

ന്യൂഡൽഹി : ഇന്ത്യൻ രാഷ്ട്രീയത്തിന്റെ ഗതിവിഗതികൾ നിർണയിക്കുന്ന അഞ്ച് നിയമസഭകളിലേക്ക് നടന്ന തിരഞ്ഞെടുപ്പ് ഫലങ്ങൾ പുറത്തുവരുമ്പോൾ അത് കേവലം ഭരണമാറ്റത്തിന്റെ കണക്കുകൾ മാത്രമല്ല മറിച്ച് ദേശീയ രാഷ്ട്രീയത്തിലെ വലിയൊരു ദിശാനിർണയത്തിന്റെ സൂചന കൂടിയാണ്. അസം, പശ്ചിമ ബംഗാൾ, തമിഴ്നാട്, കേരളം എന്നീ സംസ്ഥാനങ്ങളിൽ നിന്നുള്ള ഫലങ്ങൾ വ്യക്തമാക്കുന്നത് പ്രാദേശിക ക്ഷത്രപതിമാരുടെ അപ്രമാദിത്വം ചോദ്യം ചെയ്യപ്പെടുന്നതായും ദേശീയ പാർട്ടികൾ പുതിയ തന്ത്രങ്ങളുമായി കളം നിറയുന്നതുമാണ്.

നരേന്ദ്ര മോഡിയുടെ നേതൃത്വത്തിലുള്ള എൻ.ഡി.എ സഖ്യത്തിന്റെ കരുത്താർജിച്ച മുന്നേറ്റവും തമിഴ്നാട്ടിലെ അപ്രതീക്ഷിത രാഷ്ട്രീയ ഉദയവും കേരളത്തിലെ ഭരണമാറ്റവും ഇന്ത്യൻ ജനാധിപത്യത്തിലെ മാറ്റത്തിന്റെ കാറ്റായി വിലയിരുത്തപ്പെടുന്നു.

പശ്ചിമ ബംഗാളിൽ മമത ബാനർജിയുടെ പതനം രാഷ്ട്രീയ നിരീക്ഷകർ മുൻകൂട്ടി കണ്ടിരുന്നതാണെങ്കിലും തൃണമൂൽ കോൺഗ്രസിനെ പിഴുതെറിഞ്ഞുകൊണ്ടുള്ള ബിജെപിയുടെ വിജയം ചരിത്രപരമായ ഒന്നാണ്. ആകെ 294 സീറ്റുകളിൽ 175 ഓളം സീറ്റുകൾ നേടി ബിജെപി അധികാരം പിടിച്ചടക്കിയത് കേന്ദ്ര ആഭ്യന്തര മന്ത്രി അമിത് ഷായുടെ കൃത്യമായ ആസൂത്രണത്തിന്റെയും മൈക്രോ ലെവൽ തന്ത്രങ്ങളുടെയും വിജയമായാണ് കാണപ്പെടുന്നത്.

ബംഗാളിലെ ഭരണസിരാകേന്ദ്രം നഷ്ടപ്പെട്ട മമത ബാനർജി ഇനി ദേശീയ രാഷ്ട്രീയത്തിൽ കൂടുതൽ സജീവമാകുമെന്ന് പ്രഖ്യാപിച്ചത് പ്രതിപക്ഷ ചേരിയിൽ പുതിയൊരു അധികാര കേന്ദ്രത്തിന് വഴിയൊരുക്കും. ബിജെപി വിരുദ്ധ നിരയെ ഏകോപിപ്പിക്കാൻ ഇനി മമതയുടെ നേതൃത്വം എങ്ങനെയുണ്ടാകും എന്നതിനെ ആശ്രയിച്ചിരിക്കും ഇൻഡ്യാ മുന്നണിയുടെ ഭാവി.

തമിഴ് മണ്ണിൽ ഇത്തവണ സംഭവിച്ചത് ഒരു രാഷ്ട്രീയ മഹാത്ഭുതമാണ്. ദശകങ്ങളായി തമിഴ്നാട് ഭരിച്ച ദ്രാവിഡ കക്ഷികളായ ഡിഎം.കെ-യെയും അണ്ണാ ഡിഎംകെ-യെയും പിന്തള്ളി നടൻ വിജയ് നയിക്കുന്ന തമിഴക വെട്രി കഴകം നൂറിലധികം സീറ്റുകൾ നേടി മുന്നേറ്റം നടത്തിയത് പുതിയൊരു യുഗപ്പിറവിയാണ്.

യുവാക്കളുടെയും നിതകളുടെയും വോട്ടുകൾ കൂട്ടത്തോടെ ടിവികെ-യ്ക്ക് അനുകൂലമായി മാറിയത് എം.കെ. സ്റ്റാലിന്റെ പരാജയത്തിന് ആക്കം കൂട്ടി. കേവല ഭൂരിപക്ഷത്തിന് ആവശ്യമായ പിന്തുണ ഉറപ്പാക്കാൻ കോൺഗ്രസ്, പിഎംകെ എന്നീ പാർട്ടികളുമായി ചേർന്ന് വിജയ് സർക്കാർ രൂപീകരിക്കുമെന്നാണ് ലഭിക്കുന്ന സൂചനകൾ. തമിഴ്നാട് തിരഞ്ഞെടുപ്പ് ചരിത്രത്തിൽ ആദ്യമായാണ് ഒരു പുതിയ കക്ഷി ഇത്രയും വലിയ തോതിൽ ജനപിന്തുണ നേടുന്നത്.

കേരളത്തിൽ ഭരണവിരുദ്ധ വികാരം പ്രകടമല്ലെന്ന സർവ്വേ ഫലങ്ങളെ തിരുത്തിക്കൊണ്ട് യുഡിഎഫ് ഐതിഹാസിക വിജയം കരസ്ഥമാക്കി. 140 സീറ്റുകളിൽ 102 സീറ്റുകൾ നേടി യുഡിഎഫ് അധികാരം പിടിച്ചപ്പോൾ എൽഡിഎഫ് വെറും 35 സീറ്റുകളിലേക്ക് ഒതുങ്ങി. ബിജെപി നേതൃത്വത്തിലുള്ള എൻഡിഎ മൂന്ന് സീറ്റുകൾ നേടി സംസ്ഥാനത്ത് തങ്ങളുടെ സാന്നിധ്യം ശക്തമാക്കി.

സർക്കാരിന്റെ നയങ്ങളേക്കാളുപരി മുഖ്യമന്ത്രി പിണറായി വിജയൻ എന്ന വ്യക്തിയോടുള്ള വിയോജിപ്പും ഭരണശൈലിയോടുള്ള എതിർപ്പുമാണ് സിപിഎമ്മിന് കനത്ത തിരിച്ചടിയായത്. കേരളത്തിലെ ഈ തിരിച്ചുവരവ് ദേശീയ തലത്തിൽ രാഹുൽ ഗാന്ധിയുടെയും കോൺഗ്രസിന്റെയും ആത്മവീര്യം വൻതോതിൽ വർധിപ്പിച്ചിരിക്കുകയാണ്.

അസമിലും ഭരണത്തുടർച്ച ഉറപ്പാക്കാൻ മുഖ്യമന്ത്രി ഹിമന്ത ബിശ്വ ശർമ്മയുടെ തന്ത്രങ്ങൾക്കായി. 126 സീറ്റുകളിൽ 79 ലധികം സീറ്റുകൾ നേടി ബിജെപി അധികാരം നിലനിർത്തിയപ്പോൾ തിരഞ്ഞെടുപ്പ് പ്രക്രിയയിൽ എസ്ഐആർ അപാകതകൾ ആരോപിച്ച് പ്രതിപക്ഷം രംഗത്തെത്തി. ഈ വിജയങ്ങൾ ദേശീയ തലത്തിലെ ഇൻഡ്യാ മുന്നണിയുടെ ഭാവിയിൽ വലിയ ചലനങ്ങൾ സൃഷ്ടിക്കുമെന്ന് ഉറപ്പാണ്.

മമതയുടെയും സ്റ്റാലിന്റെയും തിരിച്ചടി മുന്നണിക്കുള്ളിൽ കോൺഗ്രസിന്റെ മേധാവിത്വം വർധിപ്പിച്ചേക്കാം. എന്നാൽ കോൺഗ്രസ് കരുത്താർജിക്കുന്നതിൽ ആശങ്കയുള്ള ഡിഎംകെ, ടിഎംസി, എഎപി, എസ്പി തുടങ്ങിയ പാർട്ടികൾ കോൺഗ്രസിനെ മാറ്റിനിർത്തി ഒരു 'മൂന്നാം മുന്നണി'ക്ക് ശ്രമിക്കാനുള്ള സാധ്യതയും തള്ളിക്കളയാനാവില്ല. ചുരുക്കത്തിൽ 2029 ലെ പൊതുതിരഞ്ഞെടുപ്പിലേക്കുള്ള ദൂരം ഈ നിയമസഭാ ഫലങ്ങൾ കൂടുതൽ സങ്കീർണമാക്കിയിരിക്കുകയാണ്.

ഈ തിരഞ്ഞെടുപ്പ് ഫലങ്ങൾ ദേശീയ തലത്തിലെ ഇൻഡ്യാ മുന്നണിയുടെ ഭാവിയിൽ വലിയ ചലനങ്ങൾ സൃഷ്ടിക്കുമെന്ന് ഉറപ്പാണ്. മമത ബാനർജിയും എം.കെ സ്റ്റാലിനും സ്വന്തം തട്ടകങ്ങളിൽ നേരിട്ട പരാജയം മുന്നണിക്കുള്ളിൽ കോൺഗ്രസിന്റെ മേധാവിത്വം വർധിപ്പിക്കാൻ കാരണമായേക്കാം.

കേരളത്തിലെ യു.ഡി.എഫിന്റെ ഐതിഹാസിക വിജയം കോൺഗ്രസിന് കരുത്തുപകരുമ്പോൾ തന്നെ, തമിഴ്‌നാട്ടിൽ രൂപപ്പെടുന്ന പുതിയ രാഷ്ട്രീയ സമവാക്യങ്ങൾ ശ്രദ്ധേയമാണ്. തമിഴ്‌നാട്ടിൽ വിജയ് നയിക്കുന്ന തമിഴക വെട്രി കഴകത്തിന് പിന്തുണ നൽകാനുള്ള നീക്കങ്ങളുമായി സംസ്ഥാന കോൺഗ്രസ് നേതൃത്വം ഇതിനോടകം രംഗത്തിറങ്ങിക്കഴിഞ്ഞു.

തമിഴ്‌നാട്ടിൽ സ്വീകരിക്കേണ്ട അടുത്ത നടപടികളെക്കുറിച്ച് ഗൗരവകരമായ ആലോചനകൾ നടക്കുകയാണെന്ന് കോൺഗ്രസിന്റെ തിരഞ്ഞെടുപ്പ് ചുമതലയുള്ള ഗിരീഷ് ചോടങ്കർ വ്യക്തമാക്കിയത് വലിയ രാഷ്ട്രീയ പ്രാധാന്യമർഹിക്കുന്നു. വനിതകളുടെയും യുവാക്കളുടെയും വലിയ തോതിലുള്ള പിന്തുണ ടിവികെ നേടിയത് കണ്ടില്ലെന്ന് നടിക്കാനാകില്ലെന്നും, ഇതു സംബന്ധിച്ച വിശദമായ റിപ്പോർട്ട് ഹൈക്കമാൻഡിന് ഉടൻ സമർപ്പിക്കുമെന്നും അദേഹം അറിയിച്ചു.

അതേസമയം കോൺഗ്രസ് കരുത്താർജ്ജിക്കുന്നതിൽ ആശങ്കയുള്ള ഡിഎംകെ, ടിഎംസി, എഎപി, എസ്പി തുടങ്ങിയ പ്രാദേശിക പാർട്ടികൾ തങ്ങളുടെ അസ്തിത്വം സംരക്ഷിക്കാൻ കോൺഗ്രസിനെ മാറ്റിനിർത്തി ഒരു 'മൂന്നാം മുന്നണി'ക്ക് ശ്രമിക്കാനുള്ള സാധ്യതയും രാഷ്ട്രീയ നിരീക്ഷകർ തള്ളിക്കളയുന്നില്ല.

ദേശീയ തലത്തിൽ ബിജെപിക്ക് ബദലാകാൻ കോൺഗ്രസിനെ തന്നെ ആശ്രയിക്കണോ അതോ പ്രാദേശിക പാർട്ടികൾ ഒന്നിച്ച് പുതിയൊരു നേതൃത്വം കണ്ടെത്തണോ എന്ന ഗൗരവകരമായ ചർച്ചകളിലേക്കായിരിക്കും വരും ദിവസങ്ങളിൽ ഇന്ത്യൻ രാഷ്ട്രീയം സാക്ഷ്യം വഹിക്കുക.

തമിഴ്‌നാട്ടിലെ ടിവികെ-കോൺഗ്രസ് അച്ചുതണ്ട് യാഥാർത്ഥ്യമായാൽ അത് ദക്ഷിണേന്ത്യൻ രാഷ്ട്രീയത്തിലെ പുതിയൊരു പരീക്ഷണശാലയായി മാറുകയും 2029-ലെ പൊതുതിരഞ്ഞെടുപ്പിലേക്കുള്ള പ്രതിപക്ഷത്തിന്റെ ഗതി നിർണയിക്കുകയും ചെയ്യും.