പരിശുദ്ധ ദൈവമാതാവിന്റെ വണക്കമാസം | മെയ് 7 | ഏഴാം ദിവസം

“ദൂതൻ മറുപടി പറഞ്ഞു: പരിശുദ്ധാത്മാവ് നിന്റെ മേൽ വരും; അത്യുന്നതന്റെ ശക്തി നിന്റെ മേൽ ആവസിക്കും. ആകയാൽ, ജനിക്കുവാൻ പോകുന്ന ശിശു പരിശുദ്ധൻ, ദൈവപുത്രൻ എന്നു വിളിക്കപ്പെടും.”
(ലൂക്കാ 1:35)

പരിശുദ്ധ കന്യകയുടെ വരപ്രസാദ യോഗ്യത 
ദൈവം ഒരാളെ പ്രത്യേക ദൗത്യത്തിനായി തിരഞ്ഞെടുക്കുമ്പോൾ, അതിനാവശ്യമായ ആത്മീയവും മാനസികവും ശാരീരികവുമായ അനുഗ്രഹങ്ങളാൽ അവനെ/അവളെ സമ്പുഷ്ടമാക്കുന്നു എന്നു വിശുദ്ധ തോമസ് അക്വിനാസ് പഠിപ്പിക്കുന്നു. അതുപോലെ തന്നെ, ദൈവമാതാവെന്ന മഹത്തായ സ്ഥാനത്തേക്ക് തെരഞ്ഞെടുത്ത പരിശുദ്ധ കന്യകാമറിയത്തിന് ദൈവം അനവധി അപൂർവ്വ കൃപകൾ നല്കി.
അമലോത്ഭവയായ പരിശുദ്ധ കന്യകയ്ക്ക്, എല്ലാ വിശുദ്ധരെയും മാലാഖമാരെയും അതിലംഘിക്കുന്ന മഹത്തായ യോഗ്യത ലഭിച്ചു. പ്രകൃത്യാതീതവും ദൈവികവുമായ എല്ലാ ദാനങ്ങളും അവളിൽ സമ്പൂർണ്ണമായി പ്രകാശിച്ചു. അവൾ സകല സ്ത്രീകളിലും ഏറ്റവും അനുഗ്രഹീതയായിത്തീർന്നു.
ഈ ലോകത്തിൽ ജനിക്കുന്ന ഒരാൾക്കും സ്വന്തം മാതാവിനെ തെരഞ്ഞെടുക്കാനുള്ള സ്വാതന്ത്ര്യം ഇല്ല. എന്നാൽ, ഈശോമിശിഹാ തന്റെ മാതാവിനെ സ്വയം തെരഞ്ഞെടുത്തു. മറിയത്തെ തെരഞ്ഞെടുത്തതിലൂടെ അവൾ സകല സ്ത്രീകളിലും അനുഗ്രഹീതയായി.
വിശുദ്ധ ബൊനവന്തുര പറയുന്നതുപോലെ, ദൈവത്തിന് അനേകം ലോകങ്ങൾ സൃഷ്ടിക്കാം; എന്നാൽ പരിശുദ്ധ കന്യകയെക്കാൾ പരിപൂർണ്ണയായ മാതാവിനെ സൃഷ്ടിക്കാനാവില്ല. ദൈവം എല്ലാ ഗുണങ്ങളും നൽകി അനുഗ്രഹിച്ച നാമമാണ് “മേരി”. നാം ക്രിസ്തീയ സുകൃതങ്ങൾ ജീവിതത്തിൽ അനുഷ്ഠിച്ച് അനുഗ്രഹീതരാകാൻ പരിശ്രമിക്കണം. അതിനായി പരിശുദ്ധ അമ്മയുടെ മദ്ധ്യസ്ഥം നമുക്ക് അഭയം ആക്കാം.

സംഭവം
ഒരിക്കൽ ചിലർ ഒരു മൃതശരീരം വി. അൽഫോൻസ് ലിഗോരിയുടെ അടുക്കൽ കൊണ്ടുവന്നു. ആ മനുഷ്യനെ ജീവിപ്പിക്കണമെന്നാവശ്യപ്പെട്ടു. വിശുദ്ധൻ പരിശുദ്ധ കന്യകയിലുള്ള തന്റെ അചഞ്ചല വിശ്വാസത്തോടെ ദൈവത്തോട് പ്രാർത്ഥിച്ചു. പലരും സാക്ഷിയായി നിൽക്കുമ്പോൾ അത്ഭുതം നടന്നു — മരിച്ചെന്ന് കരുതിയ മനുഷ്യൻ കണ്ണുതുറന്നു, ശ്വാസം വീണ്ടെടുത്തു. ഈ അനുഭവം വിശുദ്ധൻ തന്റെ ജീവിതചരിത്രത്തിൽ രേഖപ്പെടുത്തിയിട്ടുണ്ട്.

പ്രാർത്ഥന 
ദൈവമേ, സകല വിശുദ്ധരുടെയും വിശുദ്ധിയെ അതിലംഘിക്കുന്ന മഹത്വത്തോടെ പരിശുദ്ധ കന്യകയെ അലങ്കരിച്ചവനേ,
ഞങ്ങൾക്കും ലഭിച്ച കൃപയെ കളങ്കപ്പെടുത്താതെ നിർമലമായ ജീവിതം നയിക്കാനുള്ള അനുഗ്രഹം നല്കണമേ.
ഞങ്ങളുടെ ദിനചര്യകളിൽ വിശ്വാസത്തോടെ ജീവിച്ച്, വിശുദ്ധിയിൽ വളരുവാൻ ഞങ്ങളെ സഹായിക്കണമേ.
അങ്ങനെ നിന്റെ ദിവ്യജനനിയെ അനുസരിച്ചുകൊണ്ട് ഞങ്ങൾ ജീവിക്കട്ടെ.
ആമ്മേൻ.

ജപം 
എത്രയും ദയയുള്ള മാതാവേ!
നിന്റെ സങ്കേതത്തിൽ അഭയം തേടിയവർ ആരും ഉപേക്ഷിക്കപ്പെട്ടിട്ടില്ലെന്ന് ഞങ്ങൾ വിശ്വസിക്കുന്നു.
കന്യാവ്രതക്കാരുടെ രാജ്ഞിയായ കന്യകേ,
ഞങ്ങൾ നിന്റെ ശരണത്തിൽ വരുന്നു.
പാപികളായ ഞങ്ങൾ നിന്റെ കരുണയെ ആശ്രയിച്ച്
നിന്റെ തിരുമുമ്പിൽ നില്ക്കുന്നു.
അവതരിച്ച വചനത്തിന്റെ മാതാവേ,
ഞങ്ങളുടെ അപേക്ഷ ദയയോടെ കേട്ടരുളണമേ.
ആമ്മേനീശോ.

ജപം:
ജന്മപാപമില്ലാതെ ഉത്ഭവിച്ച ശുദ്ധ മറിയമേ,
പാപികളുടെ സങ്കേതമേ,
ഞങ്ങൾ നിന്റെ ശരണത്തിൽ വന്നിരിക്കുന്നു.
ഞങ്ങൾക്കായി നിന്റെ തിരുക്കുമാരനോടു പ്രാർത്ഥിക്കണമേ.
1 സ്വർഗ്ഗം | 1 നന്മ | 1 ത്രിത്വം