ഓൺലൈൻ ഭക്ഷണം വൈകി: ആദ്യം മർദിച്ചത് യുവതിയെന്ന് അറസ്റ്റിലായ സൊമാറ്റോ ഡെലിവറി ബോയ്

ബംഗളൂരു: യുവതിയെ സൊമാറ്റോ ഡെലിവറി ബോയ്​ മർദിച്ചെന്ന പരാതിയിൽ പുതിയ വെളിപ്പെടുത്തലുമായി അറസ്റ്റിലായ ഡെലിവറി ബോയ്​ കാമരാജ്. ഓൺലൈനിൽ ഓർഡർ ചെയ്ത ഭക്ഷണം എത്തിക്കാൻ വൈകിയതിനെതുടർന്നുണ്ടായ തർക്കത്തിൽ​ യുവതിയാണ്​ തന്നെ ആദ്യം മർദിച്ചതെന്നു കാമരാജ്​ മാധ്യമങ്ങളോട്​ പറഞ്ഞു. കാമരാജ്​ മൂക്ക് ഇടിച്ച്​ പരുക്കേൽപ്പിച്ചെന്നാണു കണ്ടൻ്റ് ക്രിയേറ്ററും മേക്കപ്പ് ആർട്ടിസ്​റ്റുമായ ഹിതേഷ ചന്ദ്രാനെ പരാതിപെട്ടത്. മൂക്കിൽനിന്ന്​ ചോരയൊഴുകുന്ന നിലയിൽ യുവതി സാമൂഹിക മാധ്യമങ്ങളിൽ വീഡിയോ പോസ്​റ്റ് ചെയ്തതോടെയാണ് ചൊവ്വാഴ്ച നടന്ന സംഭവം​ പിറ്റേന്ന് പുറത്തറിഞ്ഞത്. യുവതിയുടെ പരാതിയിൽ ഇലക്ട്രോണിക് സിറ്റി പൊലീസ് കേസെടുക്കുകയും കാമാരാജിനെ അറസ്റ്റ്​ ചെയ്യുകയും ചെയ്​തിരുന്നു. ജോലിയിൽനിന്നും​ പുറത്താക്കി.

എന്നാൽ, തന്നെ ചെരുപ്പൂരി അടിക്കുന്നതിനിടെ അവരുടെ തന്നെ മോതിരം മൂക്കിൽ തട്ടിയാണ്​ യുവതിക്ക്​ പരുക്കേറ്റതെന്ന്​ കാമരാജ്​ മൊഴി നൽകി. ഗതാഗതക്കുരുക്കു കാരണം ഭക്ഷണം എത്തിക്കാൻ വൈകി. ക്ഷമ ചോദിചാണ് ഭക്ഷണം കൈമാറിയത്. എന്നാൽ അവർ പണം തന്നില്ല. തന്റെ അക്കൗണ്ടിൽനിന്ന്​ പണം നഷ്ടപ്പെടുമെന്നു പറഞ്ഞപ്പോൾ യുവതി അധിക്ഷേപിക്കുകയും ചെയ്‌തു. അതിനിടെ ഓർഡർ റദ്ദായി. തുടർന്ന്​ ഭക്ഷണം തിരികെ ആവശ്യപ്പെട്ടെങ്കിലും നൽകിയില്ല. ഒടുവിൽ പോകാനൊരുങ്ങിയപ്പോൾ അപ്രതീക്ഷിതമായി ചെരിപ്പൂരി അടിക്കാൻ തുടങ്ങി. തടയാൻ ശ്രമിക്കുന്നതിനിടെ അവരുടെ മോതിരം അബദ്ധത്തിൽ മൂക്കിൽകൊണ്ടാണ്​ ചോര വന്നത്​ -കാമരാജ്​ കൂട്ടിച്ചേർത്തു. 

സൊമാറ്റോ ഡെലിവറി ബോയ്​ വീട്ടിൽ അതിക്രമിച്ച് കയറി പരുക്കേൽപ്പിച്ചെന്നായിരുന്നു ഹിതേഷ ചന്ദ്രാനിയുടെ ആരോപണം. വൈകിയതിനാൽ ഓർഡർ വേണ്ടെന്ന് അറിയിച്ചെങ്കിലും തിരിച്ചുപോകാതെ ബലമായി വാതിൽ തുറന്ന് അകത്ത് കയറാൻ ശ്രമിച്ചപ്പോൾ താൻ ചെരുപ്പുകൊണ്ട് അടിച്ചു​. അപ്പോൾ യുവാവ് മുഖത്ത് ഇടിക്കുകയായിരുന്നു എന്നായിരുന്നു ഹിതേഷയുടെ വെളിപ്പെടുത്തൽ.