മുംബൈ: രാജ്യത്ത് കോവിഡിന്‍റെ ഒമിക്രോണ്‍ വകഭേദം വ്യാപിക്കുന്നതിനിടെ ലോക്ഡൗണിനെ കുറിച്ച്‌ സൂചനകള്‍ നല്‍കി മഹാരാഷ്ട്ര മന്ത്രി. മെഡിക്കല്‍ ഓക്സിജന്‍റെ പ്രതിദിന ആവശ്യകത 800 മെട്രിക് ടണില്‍ കൂടിയാല്‍ ലോക്ഡൗണ്‍ ഏര്‍പ്പെടുത്തുന്നത് പരിഗണിക്കുമെന്ന് ആരോഗ്യമന്ത്രി രാജേഷ് തോപെ പറഞ്ഞു.
ജനങ്ങള്‍ കോവിഡ് നിയന്ത്രണങ്ങള്‍ കര്‍ശനമായി പാലിക്കണമെന്നും അദ്ദേഹം അഭ്യര്‍ഥിച്ചു. മഹാരാഷ്ട്രയില്‍ മാത്രം 108 പേര്‍ക്കാണ് ഇതുവരെ ഒമിക്രോണ്‍ സ്ഥിരീകരിച്ചത്. ഏറ്റവും കൂടുതല്‍ ഒമിക്രോണ്‍ ബാധിതരുള്ളതും മഹാരാഷ്ട്രയിലാണ്. രാജ്യത്ത് ഇതുവരെ 415 പേര്‍ക്ക് ഒമിക്രോണ്‍ സ്ഥിരീകരിച്ചിട്ടുണ്ട്.
ഒമിക്രോണ്‍ സ്ഥിരീകരിക്കുന്നവരില്‍ രോഗം ഗുരുതരമാവുന്നവരുടെ എണ്ണം താരതമ്യേന കുറവാണ്. ഐ.സി.യുവില്‍ പ്രവേശിക്കപ്പെടുന്നവരുടെ എണ്ണവും കുറവാണ്. ഒമിക്രോണിനെ പ്രതിരോധിക്കാന്‍ മാസ്ക് ധരിക്കുകയെന്നത് പ്രാധാന്യമര്‍ഹിക്കുന്ന ഒന്നാണെന്നും ആരോഗ്യമന്ത്രി കൂട്ടിച്ചേര്‍ത്തു.
മുംബൈയില്‍ കഴിഞ്ഞ ദിവസം മാത്രം 757 പേര്‍ക്ക് കോവിഡ് സ്ഥിരീകരിച്ചിരുന്നു. രോഗബാധ ഉയരുന്നതിന്‍റെ സൂചനയായാണ് വിദഗ്ധര്‍ ഇതിനെ വിലയിരുത്തുന്നത്. ഒമിക്രോണിനെ തുടര്‍ന്ന് ചില നിയന്ത്രണങ്ങള്‍ മഹാരാഷ്ട്ര ഏര്‍പ്പെടുത്തിയിരുന്നു. രാത്രി ഒമ്പത് മുതല്‍ ആറ് വരെ അഞ്ച് പേരില്‍ കൂടുതല്‍ കൂട്ടം കൂടുന്നതിന് സംസ്ഥാനത്ത് വിലക്കേര്‍പ്പെടുത്തിയിരുന്നു.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.