അവയവദാനം ചെയ്യുന്ന കേന്ദ്ര സർക്കാർ ജീവനക്കാർക്ക് 42 ദിവസം വരെ ശമ്പളത്തോടുകൂടിയ അവധി

ന്യൂഡൽഹി: അവയവദാനം ചെയ്യുന്ന ജീവനക്കാർക്ക് ശമ്പളത്തോടുകൂടിയുള്ള 42 ദിവസത്തെ പ്രത്യേക ലീവ് നൽകാൻ കേന്ദ്ര സർക്കാർ തീരുമാനം. പ്രധാന ശസ്ത്രക്രിയയ്ക്ക് ശേഷം ആരോ​ഗ്യം വീണ്ടെടുക്കാൻ എടുക്കുന്ന സമയം പരിഗണിച്ചാണിത്. നിലവിൽ 30 ദിവസത്തേക്കാണ് ഇത്തരം സ്‌പെഷ്യൽ ലീവിന് വ്യവസ്ഥയുള്ളത്.

ഒരു ദാതാവിൽ നിന്ന് അവയവം നീക്കം ചെയ്യുന്നത് ഒരു പ്രധാന ശസ്ത്രക്രിയയാണ്. മറ്റൊരു മനുഷ്യനെ സഹായിക്കുന്നതിനും കേന്ദ്ര സർക്കാർ ജീവനക്കാർക്കിടയിൽ അവയവദാനം പ്രോത്സാഹിപ്പിക്കുന്നതിനുമുള്ള മഹത്തായ പ്രവർത്തനം കണക്കിലെടുത്ത്, ഒരു കേന്ദ്ര സർക്കാർ ഉദ്യോഗസ്ഥന് അവരുടെ അവയവങ്ങൾ ദാനം ചെയ്യുന്നതിന് പരമാവധി 42 ദിവസത്തെ പ്രത്യേക കാഷ്വൽ ലീവ് അനുവദിക്കാൻ ഇപ്പോൾ തീരുമാനിച്ചെന്നും ഉത്തരവിൽ പറയുന്നു.

ദാതാവിന്റെ അവയവം നീക്കം ചെയ്യുന്നതിനുള്ള ശസ്ത്രക്രിയ ഏത് തരത്തിലുള്ളതാണെങ്കിലും, പ്രത്യേക കാഷ്വൽ അവധിയുടെ കാലാവധി പരമാവധി 42 ദിവസമായിരിക്കും. സർക്കാർ രജിസ്റ്റർ ചെയ്ത മെഡിക്കൽ പ്രാക്ടീഷണർ ദാനത്തിന് യഥാവിധി അംഗീകാരം നൽകിയിട്ടുണ്ടെങ്കിൽ എല്ലാത്തരം ദാതാക്കൾക്കും അവധി അനുവദിക്കും. മനുഷ്യ അവയവങ്ങൾ മാറ്റിവയ്ക്കൽ നിയമം 1994 അനുസരിച്ചാണിത്.