വിശുദ്ധ ഭൂമിയിൽ സമാധാനത്തിനായി ശ്രമിക്കണമെന്ന അഭ്യർത്ഥനയുമായി സഭാ നേതാക്കൾ

ജറുസലേം: 1948ൽ ഇസ്രയേൽ രാജ്യം നിലവിൽ വന്നതോടെ മാതൃ രാജ്യത്തു നിന്നും പാലയനം ചെയ്യപ്പെട്ട പലസ്തീൻ ജനതയെ അനുസ്മരിച്ചു കൊണ്ടുള്ള അൽ-നക്ബയുടെ 75ാം വാർഷികം മെയ് 15ന് നടന്നു. വിശുദ്ധ ഭൂമിയിൽ നീതിയും ശാശ്വതവുമായ സമാധാനത്തിനുമായി പരിശ്രമിക്കണമെന്ന് സഭകളോട് നേതാക്കൾ ആവശ്യപ്പെട്ടു.

പരസ്പര ബഹുമാനമാണ് സമാധാനം കൈവരിക്കാനുള്ള വഴി

മനുഷ്യത്വത്തിൽ നാമെല്ലാവരും സഹോദരി സഹോദരന്മാരാണെന്നും സമാധാനം, സഹിഷ്ണുത, നീതി എന്നിവ കൈവരിക്കാൻ ഒരുമിച്ച് പ്രവർത്തിക്കണമെന്നും നമ്മുടെ വിശ്വാസം നമ്മെ പഠിപ്പിക്കുന്നു. സ്നേഹം, അനുകമ്പ, പരസ്പര ബഹുമാനം എന്നിവ ലോകത്തിലെ സമാധാനം കൈവരിക്കുന്നതിനുള്ള പാതയാണെന്ന് ക്രിസ്തുമതം നമ്മെ പഠിപ്പിച്ചു, ഇത് നമ്മുടെ പ്രിയപ്പെട്ട വിശുദ്ധ ഭൂമിക്ക് പ്രത്യേകിച്ചും ബാധകമാണെന്ന് നേതാക്കൾ അറിയിച്ചു.

1948-ൽ തങ്ങളുടെ വീടുകളിൽ നിന്ന് പലായനം ചെയ്യപ്പെടുകയോ നിർബന്ധിതരായി പറഞ്ഞയക്കുകയോെ ചെയ്ത 700,000 പലസ്തീനികളെയാണ് നക്ബ അനുസ്മരിച്ചത്. ഈ അഭയാർത്ഥികളും അവരുടെ പിൻഗാമികളുമായി ഏകദേശം 5 ദശലക്ഷത്തിലധികം ആളുകളുണ്ടെന്ന് കണക്കാക്കപ്പെടുന്നു. ഇപ്പോൾ നടക്കുന്ന അറബ് - ഇസ്രായേൽ സംഘർഷത്തിൽ ഇതൊരു പ്രധാന തർക്കവിഷയമായി തുടരുന്നു. എന്നാൽ അഭയാർത്ഥികളെ കൂട്ടത്തോടെ തിരികെ കൊണ്ടുവരാനുള്ള ആവശ്യങ്ങൾ ഇസ്രായേൽ നിരസിച്ചു.

പുനരുജ്ജീവിപ്പിച്ച ഇസ്രായേൽ-പലസ്തീൻ അക്രമം

ജനുവരി മുതൽ 140-ലധികം പലസ്തീനികളെയും കുറഞ്ഞത് 19 ഇസ്രായേലികളെയും വിദേശികളെയും കൊന്നൊടുക്കിയ ഇസ്രായേൽ-പലസ്തീൻ അക്രമത്തിന്റെ പശ്ചാത്തലത്തിലാണ് ഈ വർഷത്തെ നക്ബ അനുസ്മരണം. ഇസ്രായേൽ ജയിലിൽ പലസ്തീൻ നിരാഹാര സമര നേതാവ് മരണപ്പെട്ടതിനെത്തുടർന്ന് പലസ്തീൻ ഇസ്ലാമിക് ജിഹാദും മറ്റ് ഗ്രൂപ്പുകളും ഇസ്രായേലിലേക്ക് 100 ലധികം റോക്കറ്റുകൾ തൊടുത്തുവിട്ടു. ആക്രമണത്തിന് പിന്നാലെ ഹമാസിനും ഇസ്ലാമിക് ജിഹാദ് ലക്ഷ്യങ്ങൾക്കും നേരെ ഇസ്രായേൽ വ്യോമാക്രമണം നടത്തി. 2022 ഓഗസ്റ്റിനു ശേഷം ഇസ്രായേൽ സേനയും പലസ്തീൻ തീവ്രവാദികളും തമ്മിലുള്ള ഏറ്റവും ശക്തമായ പോരാട്ടമാണ് കഴിഞ്ഞ ആഴ്ച കണ്ടത്.

മനുഷ്യാവകാശങ്ങളോടും അന്താരാഷ്ട്ര നിയമങ്ങളോടും ഉള്ള ബഹുമാനം

മെച്ചപ്പെട്ടതും കൂടുതൽ മാനുഷികവുമായ ഭാവി കെട്ടിപ്പടുക്കാൻ എല്ലാവരും ഒരുമിച്ച് പ്രവർത്തിക്കണം. മനുഷ്യാവകാശങ്ങളോടും അന്താരാഷ്ട്ര നിയമങ്ങളോടും നീതിയും ബഹുമാനവും ഉണ്ടെങ്കിൽ മാത്രമേ സമാധാനം കൈവരിക്കാൻ കഴിയൂയെന്ന് ജറുസലേമിലെ പാത്രിയർക്കീസ് ​​അവരുടെ പ്രസ്താവനയിലൂടെ പറഞ്ഞു. നീതിയും സമാധാനവുമാണ് മേഖലയിലെ സുസ്ഥിരതയുടെയും സമൃദ്ധിയുടെയും താക്കോലെന്ന് തങ്ങൾ വിശ്വസിക്കുന്നുവെന്നും ഈ മഹത്തായ ലക്ഷ്യങ്ങൾ കൈവരിക്കുന്നതിന് ബന്ധപ്പെട്ട എല്ലാ കക്ഷികളുമായും പ്രവർത്തിക്കാൻ തങ്ങൾ സന്നദ്ധതരാണെന്നും അവർ പ്രഖ്യാപിച്ചു.

പുണ്യ സ്ഥലങ്ങളോടുള്ള ബഹുമാനം

കമ്മ്യൂണിറ്റികളുടെ സംരക്ഷണത്തിലും പുണ്യസ്ഥലങ്ങൾ സംരക്ഷിക്കുന്നതിലും നിലവിലെ സ്റ്റാറ്റസ് ക്വോ നിയമങ്ങളിലും അന്താരാഷ്ട്ര സമൂഹം ഇടപടണം. പുണ്യഭൂമിയിലെ എല്ലാ ജനങ്ങൾക്കും സമാധാനത്തോടെയും അന്തസ്സോടെയും സമൃദ്ധിയോടെയും ജീവിക്കാനുള്ള അവകാശം നൽകണമെന്ന് നേതാക്കൾ ദൈവത്തോട് പ്രാർത്ഥിച്ചു.