ന്യൂഡല്‍ഹി: കോടതി വളപ്പിനുള്ളില്‍ സുരക്ഷാ ഉദ്യോഗസ്ഥര്‍ തന്നോട് മോശമായി പെരുമാറിയെന്ന് ആരോപിച്ച് മനീഷ് സിസോദിയയുടെ അഭിഭാഷക സംഘം സമര്‍പ്പിച്ച അപേക്ഷയെ തുടര്‍ന്ന് മെയ് 23 ലെ കോടതി സമുച്ചയത്തിലെ സിസിടിവി ദൃശ്യങ്ങള്‍ സംരക്ഷിക്കാന്‍ ഡല്‍ഹി റോസ് അവന്യൂ കോടതി ഇന്ന് ഉത്തരവിട്ടു.
സിസോദിയയെ മര്‍ദിച്ചുവെന്ന ആരോപണത്തെ തുടര്‍ന്ന് വീഡിയോ കോണ്‍ഫറന്‍സിങ് വഴി മാത്രം ഹാജരാക്കാന്‍ അനുവദിക്കണമെന്ന് ആവശ്യപ്പെട്ട് ഡല്‍ഹി പൊലീസ് ഇന്ന് കോടതിയില്‍ അപേക്ഷ സമര്‍പ്പിച്ചു. അപേക്ഷയില്‍ തീരുമാനമാകാത്തത് വരെ വീഡിയോ കോണ്‍ഫറന്‍സിംഗിലൂടെ മാത്രമേ സിസോദിയയെ കോടതിയില്‍ ഹാജരാക്കൂവെന്നും കോടതിയില്‍ വ്യക്തിപരമായി ഹാജരാക്കേണ്ടതില്ലെന്നും പ്രത്യേക ജഡ്ജി എം.കെ നാഗ്പാല്‍ വ്യക്തമാക്കി.
കോടതി ലോക്കപ്പില്‍ നിന്ന് വീഡിയോ കോണ്‍ഫറന്‍സ് വഴിയാണ് സിസോദിയയെയും ഇന്ന് കോടതിയില്‍ ഹാജരാക്കിയത്. ഡല്‍ഹി എക്സൈസ് നയവുമായി ബന്ധപ്പെട്ട കള്ളപ്പണം വെളുപ്പിക്കല്‍ കേസില്‍ ഡല്‍ഹി മുന്‍ ഉപമുഖ്യമന്ത്രി സിസോദിയയ്ക്കെതിരെ സമര്‍പ്പിച്ച അനുബന്ധ കുറ്റപത്രം കോടതി നേരത്തെ പരിഗണിച്ചിരുന്നു.
നിലവിലെ പ്രതിയായ മനീഷ് സിസോദിയയുടെ പ്രവര്‍ത്തനങ്ങളിലൂടെ ഏകദേശം 622 കോടി രൂപയുടെ അഴിമതി ഉണ്ടായതായി ഇഡി സമര്‍പ്പിച്ച കുറ്റപത്രത്തില്‍ ആരോപിക്കുന്നു. സ്പെഷ്യല്‍ പബ്ലിക് പ്രോസിക്യൂട്ടര്‍ നവീന്‍ കുമാര്‍ മട്ടയാണ് അനുബന്ധ കുറ്റപത്രം സമര്‍പ്പിച്ചത്.
സപ്ലിമെന്ററി ചാര്‍ജിന് 2100-ലധികം പേജുകളുണ്ട്. പ്രവര്‍ത്തന ഭാഗത്തിന് 271 പേജുകളുണ്ട്. 60 ദിവസത്തിനുള്ളില്‍ കുറ്റപത്രം സമര്‍പ്പിച്ചിട്ടുണ്ട്. മാര്‍ച്ച് ഒന്‍പതിന് ഈ കേസില്‍ സിസോദിയയെ ഇ.ഡി അറസ്റ്റ് ചെയ്തിരുന്നു. നേരത്തെ ഫെബ്രുവരി 26 ന് സിബിഐ അദ്ദേഹത്തെ അറസ്റ്റ് ചെയ്തിരുന്നു. ഈ കേസില്‍ അറസ്റ്റിലായ 29-ാം പ്രതിയാണ് അദ്ദേഹം.
കേസില്‍ സിബിഐ നേരത്തെ തന്നെ കുറ്റപത്രം സമര്‍പ്പിച്ചിരുന്നു. സിബിഐ കേസില്‍ ഇയാളുടെ ജാമ്യാപേക്ഷ കഴിഞ്ഞയാഴ്ച ഹൈക്കോടതി തള്ളിയിരുന്നു. കള്ളപ്പണം വെളുപ്പിക്കല്‍ കേസില്‍ ഇയാളുടെ ജാമ്യാപേക്ഷ ഹൈക്കോടതിയുടെ പരിഗണനയിലാണ്.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26