ഒരു പുതപ്പിൻ കീഴിൽ ഉറങ്ങുന്ന അങ്കിതും ഡാനിയും

ഒരു പുതപ്പിൻ കീഴിൽ കടത്തിണ്ണയിൽ കിടന്നുറങ്ങുന്ന അങ്കിത് എന്ന ബാലനും അവന്റെ വളർത്തുനായ ഡാനിയുമാണ് ഇപ്പോൾ ഇന്റർനെറ്റിൽ നിറഞ്ഞുനിൽക്കുന്നത്. ഒരു പ്രാദേശിക മാധ്യമ പ്രവർത്തകൻ എടുത്ത ഈ ചിത്രം പിന്നീട് സോഷ്യൽ മീഡിയയിൽ വൈറലാകുകയായിരുന്നു. പത്തുവയസുകാരനായ അങ്കിതിന്റെ പിതാവ് ജയിലിലാണ്. അമ്മ മകനെ ഉപേക്ഷിക്കുകയും ചെയ്തു. ഇതോടെ അനാഥനായ അങ്കിത് തെരുവിൽ ജീവിതമാരംഭിച്ചു. ഉത്തർപ്രദേശിലെ മുസാഫർനഗറിലാണ് അങ്കിതും ഡാനിയും താമസിക്കുന്നത്. ഉറ്റവരെല്ലാം ഉപേക്ഷിച്ച ഈ ബാലന് ഇന്ന് കൂട്ടായുള്ളത് ഡാനിയെന്ന ഈ നായ മാത്രമാണ്. മനുഷ്യൻ മനുഷ്യത്വം മറക്കുന്ന ഈ കാലഘട്ടത്തിൽ ഡാനി എന്ന നായ സമൂഹത്തിന് മാതൃകയാവുകയാണ്. ചായക്കടയിൽ ജോലിചെയ്തും ബലൂണുകൾ വിറ്റുമാണ് അങ്കിത് ജീവിക്കുന്നത്. ഡാനി ക്കുള്ള പാലു പോലും ആരിൽ നിന്നും സൗജന്യമായി ഈ ബാലൻ വാങ്ങാറില്ല. അങ്കിതിന്റെ കൂടെ എപ്പോഴും വളർത്തുനായ ഡാനി ഉണ്ടെന്ന് ചായക്കടക്കാരൻ പറഞ്ഞു. മുസാഫർ പോലീസിന്റെ സംരക്ഷണത്തിലാണ് ഇപ്പോൾ ഡാനിയും അങ്കിതും. കുട്ടിയുടെ രക്ഷിതാക്കളെ കണ്ടെത്താനുള്ള ശ്രമത്തിലാണ് പോലീസ്.

Photo credit :Social media