തിരുവനന്തപുരം: കേരള സര്ക്കാരിന്റെ നേട്ടങ്ങള് പ്രചരിപ്പിക്കാന് മുഖ്യമന്ത്രിയും മന്ത്രിമാരും കെ.എസ്.ആര്.ടി.സി ബസില് മണ്ഡല പര്യടനം നടത്തുന്നതിനെ പരിഹസിച്ച് പ്രതിപക്ഷ നേതാവ് വി.ഡി സതീശന്. ബസില് കയറുന്നതിന് മുന്പ് ഡ്രൈവര്ക്കും കണ്ടക്ടര്ക്കും ശമ്പളം കിട്ടിയിട്ട് എത്ര നാളായെന്ന് ചോദിക്കുന്നത് നന്നായിരിക്കുമെന്ന് വി.ഡി സതീശന് ഫെയ്സ്ബുക്കില് കുറിച്ചു.
പ്രതിപക്ഷ നേതാവിന്റെ ഫെയ്സ്ബുക്ക് പോസ്റ്റിന്റെ പൂര്ണരൂപമിങ്ങനെ
കേരള സര്ക്കാരിന്റെ നേട്ടങ്ങള് പ്രചരിപ്പിക്കാന് മുഖ്യമന്ത്രിയും മന്ത്രിമാരും എല്ലാ മണ്ഡലങ്ങളിലും പര്യടനം നടത്തുന്നുണ്ട്. പ്രത്യേകം തയാറാക്കിയ #KSRTC ബസിലാണത്രേ യാത്ര! ബസില് കയറുന്നതിന് മുന്പ് ഡ്രൈവര്ക്കും കണ്ടക്ടര്ക്കും ശമ്പളം കിട്ടിയിട്ട് എത്ര നാളായെന്ന് ചോദിക്കുന്നത് നന്നായിരിക്കും. ഇല്ലെങ്കില് അവര് ചിലപ്പോള് നിങ്ങളെ വഴിയിലിട്ട് പോയാലോ!
സംസ്ഥാനത്ത് കടുത്ത സാമ്പത്തിക പ്രതിസന്ധി നിലനില്ക്കുമ്പോള് സംഘടിപ്പിക്കുന്ന മണ്ഡല സദസ് ധൂര്ത്താണെന്നാണ് പ്രതിപക്ഷം ആരോപിക്കുന്നത്.
മണ്ഡല പര്യടനത്തില് മുഖ്യമന്ത്രിക്കും മന്ത്രിമാര്ക്കുമടക്കം 25 പേര്ക്ക് സഞ്ചരിക്കാനുള്ള കെഎസ്ആര്ടിസി ബസ് സജ്ജമാക്കുന്ന ചുമതല ഗതാഗത മന്ത്രി ആന്റണി രാജുവിനാണ്. മണ്ഡല പര്യടന പരിപാടിയുടെ ചിലവ് സര്ക്കാര് വഹിക്കാത്തതിനാല് സംഘാടക സമിതി കണ്ടെത്തണമെന്നാണ് മുഖ്യമന്ത്രി നിര്ദേശം നല്കിയിരിക്കുന്നത്. പ്രതിപക്ഷം ഈ പരിപാടിയില് സഹകരിക്കില്ലെന്ന് നേരത്തെ തന്നെ അറിയിച്ചിട്ടുണ്ട്.
ലോക്സഭാ തിരഞ്ഞെടുപ്പിന് മുന്നോടിയായി നടത്തുന്ന മണ്ഡല പര്യടനത്തില് സര്ക്കാരിന്റെ വികസനങ്ങള് ജനങ്ങളിലേക്ക് എത്തിക്കുന്നതിനൊപ്പം വീണ്ടുമൊരു തുടര്ഭരണം കൂടി ലക്ഷ്യം വയ്ക്കുകയാണ്.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26