തിരുവനന്തപുരം: ആരോഗ്യ മന്ത്രി വീണ ജോര്ജിന്റെ സ്റ്റാഫിനെതിരെ കൈക്കൂലി ആരോപണവുമായി മലപ്പുറം സ്വദേശി. ഡോക്ടര് നിയമനത്തിനായി പേഴ്സണല് സ്റ്റാഫ് അഖില് മാത്യു ഒരു ലക്ഷം രൂപ കൈക്കൂലി വാങ്ങിയെന്നാണ് പരാതി.
ഇടനിലക്കാരനായ സി.ഐ.ടി.യു പത്തനംതിട്ട ജില്ലാ മുന് ഓഫീസ് സെക്രട്ടറി അഖില് സജീവും പണം വാങ്ങിയതായി പരാതിയിലുണ്ട്. മലപ്പുറം സ്വദേശി ഹരിദാസനാണ് പരാതി നല്കിയിരിക്കുന്നത്. പരാതി മന്ത്രിയുടെ ഓഫീസ് ഡിജിപിക്ക് കൈമാറിയിട്ടുണ്ട്.
മകന്റെ ഭാര്യക്ക് ആയുഷ് മിഷന് കീഴില് മലപ്പുറം മെഡിക്കല് ഓഫീസറായി ഹോമിയോ വിഭാഗത്തില് നിയമനം വാഗ്ദാനം ചെയ്താണ് ഇരുവരും പണം വാങ്ങിയതെന്നാണ് ആരോപണം.
താല്കാലിക നിയമനത്തിന് അഞ്ച് ലക്ഷവും സ്ഥിരപ്പെടുത്തുന്നതിന് 10 ലക്ഷവും ഉള്പ്പടെ 15 ലക്ഷമാണ് സംഘം ആവശ്യപ്പെട്ടത്. ഭരണം മാറും മുന്പ് നിയമനം സ്ഥിരപ്പെടുത്തുമെന്ന് ഉറപ്പു നല്കിയതായും പരാതിയില് പറയുന്നു.
തിരുവനന്തപുരത്തെ ആരോഗ്യ വകുപ്പ് ഓഫീസിന് സമീപത്തു വെച്ച് അഖില് മാത്യുവിന് ഒരു ലക്ഷം രൂപയും ഇടനിലക്കാരനായ അഖില് സജീവിന് 50, 000 രൂപ നേരിട്ടും 25000 രൂപ ബാങ്ക് മുഖേനയും നല്കി. നിയമനത്തിന് ആരോഗ്യ വകുപ്പില് അപേക്ഷ നല്കിയപ്പോള് അഖില് സജീവ് നിയമനം ഉറപ്പ് നല്കി തങ്ങളെ ഇങ്ങോട്ട് വന്ന് സമീപിക്കുകയായിരുന്നുവെന്നും പരാതിയില് വ്യക്തമാക്കുന്നു.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26