പുതിയ സഭാധ്യക്ഷനെ തേടി സീറോ മലബാര്‍ സഭ: മേജര്‍ ആര്‍ച്ച് ബിഷപ് തെരഞ്ഞെടുപ്പും അധികാരങ്ങളും

'മേജര്‍ ആര്‍ച്ചുബിഷപ്പ്' എന്ന സ്ഥാനപ്പേര് സഭയുടെ ആദ്യകാലം മുതലേ മെത്രാപ്പോലീത്തമാരുടെമേല്‍ അധികാരമുണ്ടായിരുന്ന മെത്രാപ്പോലീത്തായ്ക്കായി ഉപയോഗിച്ചു പോന്നിട്ടുള്ളതാണ്. ആരംഭകാലങ്ങളില്‍ പാത്രിയര്‍ക്കീസിനു പകരമായുള്ള പേരായി ഇത് ഉപയോഗിക്കപ്പെട്ടു പോന്നിരുന്നു.

എന്നാല്‍ 'പാത്രിയര്‍ക്കീസ്' എന്ന സ്ഥാനികനാമത്തിന് കൂടുതല്‍ പ്രാധാന്യം ലഭിച്ചു തുടങ്ങിയതോടെ 'മേജര്‍ ആര്‍ച്ചുബിഷപ്പ്' എന്ന പേര് കാര്യമായി ഉപയോഗത്തിലില്ലാതെ വന്നു. പൗരസ്ത്യ സഭകള്‍ക്കായി 1957-ല്‍ വിളംബരം ചെയ്യപ്പെട്ട പുരോഹിത ശുശ്രൂഷികളെപ്പറ്റിയുള്ള അപ്പസ്‌തോലിക തിരുവെഴുത്തില്‍ (Cleri Santitati) 324-334 കാനോനകളില്‍ ഈ നാമം മെത്രാപ്പോലീത്താമാരുടെ മേല്‍ അധികാരമുള്ള മെത്രാപ്പോലീത്താമാരെ തിരിച്ചറിയുന്നതിനായി ആദ്യമായി സഭാനിയമത്തില്‍ ഉപയോഗിച്ചു.

'പൗരസ്ത്യസഭകളുടെ കാനോനസംഹിത' (CCEO)യിലും ഇതേ നാമം പാത്രിയാര്‍ക്കല്‍ സഭകള്‍ക്കു തുല്യമായ സ്ഥാനമുള്ള സ്വയാധികാര സഭകളെയും അവയുടെ തലവന്മാരെയും സൂചിപ്പിക്കാനായി ഉപയോഗിച്ചിരിക്കുന്നു.

പൗരസ്ത്യ കത്തോലിക്കാ സഭകളില്‍, മേജര്‍ ആര്‍ച്ച് ബിഷപ്പ് (ചിലപ്പോള്‍ ആര്‍ക്കിപ്പാര്‍ക്ക് എന്നും അറിയപ്പെടുന്നു) എന്നത് സ്വയംഭരണാധികാരമുള്ള സഭയുടെ തലവന് നല്‍കുന്ന സ്ഥാനപ്പേരാണ്. മേജര്‍ ആര്‍ച്ച് ബിഷപ്പുമാര്‍ക്ക് പൊതുവെ പൗരസ്ത്യ കത്തോലിക്കാ പാത്രിയര്‍ക്കീസുമാര്‍ക്കുള്ള അതേ അവകാശങ്ങളും പദവികളും അധികാരപരിധിയും ഉണ്ട്. മറ്റുവിധത്തില്‍ പ്രകടമായി നല്‍കിയിട്ടുള്ളവയൊഴികെ, ബഹുമാനത്തിനും ആദരവിനും മുന്‍ഗണനയില്‍ അവര്‍ക്ക് തൊട്ടുപിന്നാലെയുള്ള പദവിയാണ്.

സ്വയം ഭരണാധികാരമുള്ള പൗരസ്ത്യ കത്തോലിക്കാ സഭകളുടെ തലവന്മാര്‍ക്ക് ലഭ്യമായ മറ്റ് സ്ഥാനപ്പേരുകളുമായി താരതമ്യപ്പെടുത്തുമ്പോള്‍, 'മേജര്‍ ആര്‍ച്ച് ബിഷപ്പ്' എന്ന പദവി 'പാത്രിയര്‍ക്കീസ്' എന്നതിന് തൊട്ടു താഴെയും 'മെട്രോപൊളിറ്റന്‍ ആര്‍ച്ച് ബിഷപ്പ്' എന്നതിന് മുകളിലുമാണ്.

കാനന്‍ നിയമം, പ്രത്യേകമായി നല്‍കിയിട്ടുള്ളവ ഒഴികെ, പൊതുവെ മേജര്‍ ആര്‍ച്ച് ബിഷപ്പുമാരെ പാത്രിയര്‍ക്കീസുമാരായി തുല്യമായി കണക്കാക്കുന്നു. രണ്ട് ഓഫീസുകളും തമ്മിലുള്ള വ്യത്യാസങ്ങള്‍ പ്രധാനമായും ചടങ്ങിന്റെയോ ബഹുമാനത്തിന്റെയോ വ്യത്യാസങ്ങളാണ്.

കത്തോലിക്കാ സഭയുടെ മുന്‍ഗണനാ ക്രമത്തില്‍ പാത്രിയര്‍ക്കീസുമാരുടെ തൊട്ടുതാഴെയാണ് മേജര്‍ ആര്‍ച്ച് ബിഷപ്പുമാരുടെ സ്ഥാനം. കര്‍ദ്ദിനാള്‍മാരുടെ കോളേജില്‍ അംഗങ്ങളാക്കിയാല്‍, മേജര്‍ ആര്‍ച്ച് ബിഷപ്പുമാര്‍ കര്‍ദ്ദിനാള്‍-പുരോഹിതന്മാരുടെ ക്രമത്തില്‍ ചേരും.

ഒരു പ്രത്യേക സഭയെ ഭരിക്കുന്നതിന് പുറമേ, പൗരസ്ത്യ കത്തോലിക്കാ പാത്രിയാര്‍ക്കീസുമാരെപ്പോലെ പ്രധാന ആര്‍ച്ച് ബിഷപ്പുമാരും റോമന്‍ കൂരിയയിലെ പൗരസ്ത്യ സഭകള്‍ക്കായുള്ള കോണ്‍ഗ്രിഗേഷന്റെ എക്‌സ് ഒഫീഷ്യോ അംഗങ്ങളാണിവര്‍.

അവര്‍ കത്തോലിക്കാ സഭയുടെ വാര്‍ഷിക പൊതുയോഗത്തിലും മറ്റ് സെഷനുകളിലും റോം സന്ദര്‍ശിക്കുകയാണെങ്കിലോ മറ്റെന്തെങ്കിലും പരിപാടികളില്‍ ആണെങ്കിലോ പങ്കെടുക്കേണ്ടതുണ്ട്.

സഭയുടെ പരമാധികാരത്താല്‍ നിശ്ചയിക്കപ്പെട്ടതോ അംഗീകരിക്കപ്പെട്ടതോ ആയ മെത്രാപ്പോലീത്തന്‍ സിംഹാസനത്തിലെ മെത്രാപ്പോലീത്തായാണ് മേജര്‍ ആര്‍ച്ചുബിഷപ്പ്. പാത്രിയാര്‍ക്കല്‍ സ്ഥാനപ്പേരില്ലാത്ത അദ്ദേഹം ഒരു പൗരസ്ത്യ സ്വയാധികാരസഭ മുഴുവന്റെയും അധ്യക്ഷസ്ഥാനം വഹിക്കുന്നു.

അധികാരത്തിലും ഭരണസംവിധാനങ്ങളിലും പാത്രിയാര്‍ക്കല്‍ സഭയോട് തുല്യതയുള്ളവയാണ് മേജര്‍ ആര്‍ക്കി എപ്പിസ്‌കോപ്പല്‍ സഭകള്‍. പദവിയില്‍ പാത്രിയര്‍ക്കീസിനും മേജര്‍ ആര്‍ച്ചുബിഷപ്പിനും ഏകദേശം ഒരുപോലെയാണ്.

മെത്രാപ്പോലീത്തന്‍ സ്ഥാനത്തോട് ചേര്‍ത്തു മാത്രമേ മേജര്‍ ആര്‍ക്കി എപ്പിസ്‌കോപ്പല്‍ സിംഹാസനം സ്ഥാപിക്കുവാന്‍ പാടുള്ളൂ. ഇത് സ്ഥാപിക്കുവാനുള്ള അധികാരം മാര്‍പാപ്പയ്ക്കാണ്.

പൗരസ്ത്യസഭകളുടെ ഭരണസംവിധാനത്തിന്റെ പൂര്‍ണത പാത്രിയാര്‍ക്കല്‍ ഭരണ സംവിധാനമാണെങ്കിലും ഇന്നു പുതിയതായി അവ സ്ഥാപിക്കപ്പെടുന്നത് മേജര്‍ ആര്‍ക്കി എപ്പിസ്‌കോപ്പല്‍ സഭകളായിട്ടാണ്.

1963-ല്‍ ഉക്രേനിയന്‍ ഗ്രീക്ക് കത്തോലിക്കാ സഭയുടെ തലവനാണ് 'മേജര്‍ ആര്‍ച്ച് ബിഷപ്പ്' എന്ന പദവി ആദ്യമായി ലഭിച്ചത്. 1992-ല്‍ സീറോ മലബാര്‍ സഭ മേജര്‍ ആര്‍ക്കി എപ്പിസ്‌കോപ്പലായി, തുടര്‍ന്ന് സീറോ-മലങ്കര കത്തോലിക്കാ സഭയും പിന്നീട് 2005-ല്‍ റൊമാനിയന്‍ ഗ്രീക്ക് കത്തോലിക്കാ സഭയ്ക്കും ആ പദവി ലഭിച്ചു.

മേജര്‍ ആര്‍ച്ച് ബിഷപ്പിന്റെ തെരെഞ്ഞെടുപ്പ്

കാനോന 153:1, 63 മുതല്‍ 74 വരെയുള്ള കാനോനകളിലെ നിബന്ധനകളനുസരിച്ചാണ് മേജര്‍ ആര്‍ച്ച് ബിഷപ്പിനെ തിരഞ്ഞെടുക്കുന്നത്.

തിരഞ്ഞെടുക്കപ്പെടുന്ന വ്യക്തി തിരഞ്ഞെടുപ്പ് സ്വീകരിച്ച് കഴിഞ്ഞാല്‍ മേജര്‍ ആര്‍ക്കി എപ്പിസ്‌കോപ്പല്‍ സഭയിലെ മെത്രാന്മാരുടെ സിനഡ്, കാനോനികമായി നടന്ന തിരഞ്ഞെടുപ്പിനെപ്പറ്റി സിനഡില്‍ എഴുത്തുവഴി മാര്‍പാപ്പയെ അറിയിക്കുകയും തിരഞ്ഞെടുക്കപ്പെട്ട ആള്‍ സ്വന്തം കൈയ്യൊപ്പോടുകൂടിയ എഴുത്തുവഴി മാര്‍പാപ്പയില്‍നിന്ന് തിരഞ്ഞെടുപ്പിന്റെ സ്ഥിരീകരണം ആവശ്യപ്പെടുകയും ചെയ്യണം.

സ്ഥിരീകരണം ലഭിച്ചുകഴിഞ്ഞാല്‍ തിരഞ്ഞെടുക്കപ്പെട്ട ആള്‍ മേജര്‍ ആര്‍ക്കി എപ്പിസ്‌കോപ്പല്‍ സഭയിലെ മെത്രാന്മാരുടെ സിനഡിന്റെ മുമ്പാകെ വിശ്വാസപ്രഖ്യാപനവും തന്റെ ഉദ്യോഗം വിശ്വസ്തതയോടെ നിറവേറ്റിക്കൊള്ളാമെന്നുള്ള വാഗ്ദാനവും നടത്തണം.

അതിനുശേഷം അദ്ദേഹത്തിന്റെ സ്ഥാനപ്രഖ്യാപനവും സ്ഥാനാരോഹണവും നടക്കുന്നു. എന്നാല്‍ തിരഞ്ഞെടുക്കപ്പെട്ടയാള്‍ മെത്രാഭിഷേകം സ്വീകരിക്കാത്ത വ്യക്തിയാണെങ്കില്‍, മെത്രാഭിഷേകം സ്വീകരിക്കുന്നതിനുമുമ്പ് സാധുവായി സ്ഥാനാരോഹണം നടത്താന്‍ പാടില്ല.

എന്നാല്‍ സ്ഥിരീകരണം നിഷേധിക്കപ്പെട്ടാല്‍, റോമാ മാര്‍പാപ്പ നിശ്ചയിക്കുന്ന സമയത്തിനുള്ളില്‍ പുതിയ തിരഞ്ഞെടുപ്പ് നടത്തണം. പാത്രിയര്‍ക്കീസിന്റെ തിരഞ്ഞെടുപ്പിനുള്ള നടപടിക്രമങ്ങള്‍ (Cf.cc. 63-74) തന്നെയാണ് മേജര്‍ ആര്‍ച്ചുബിഷപ്പിന്റെയും തിരഞ്ഞെടുപ്പിനുള്ളത്.

എന്നാല്‍ പാത്രിയര്‍ക്കീസിന്റെ കാര്യത്തില്‍നിന്നും വ്യത്യസ്തമായി, തിരഞ്ഞെടുക്കപ്പെടുന്ന വ്യക്തി തിരഞ്ഞെടുപ്പു സ്വീകരിച്ചു കഴിഞ്ഞാല്‍ മെത്രാന്മാരുടെ സിനഡ്, സിനഡില്‍ എഴുത്തുവഴി തിരഞ്ഞെടുപ്പിനെ സംബന്ധിച്ച് മാര്‍പാപ്പയെ അറിയിക്കണം.

മാര്‍പാപ്പ ഈ തിരഞ്ഞെടുപ്പ് അംഗീകരിച്ചുറപ്പിക്കുന്നില്ലെങ്കില്‍ അദ്ദേഹം നിശ്ചയിക്കുന്ന സമയത്തിനുള്ളില്‍ പുതിയ വ്യക്തിയെ തിരഞ്ഞെടുക്കണം.

കാനോന 154: തങ്ങള്‍ അധ്യക്ഷ്യം വഹിക്കുന്ന സഭ മേജര്‍ ആര്‍ക്കി എപ്പിസ്‌കോപ്പല്‍ സഭയായി സ്ഥാപിക്കപ്പെട്ട ക്രമമനുസരിച്ച്, മേജര്‍ ആര്‍ച്ച്ബിഷപ്പുമാര്‍ക്ക് പാത്രിയര്‍ക്കീസിനു തൊട്ടടുത്ത ബഹുമതി മുന്‍ഗണന ലഭിക്കുന്നു.

പാത്രിയര്‍ക്കീസുമാര്‍ കഴിഞ്ഞാല്‍ മുന്‍ഗണന മേജര്‍ ആര്‍ച്ച് ബിഷപ്പിനായിരിക്കും. മേജര്‍ ആര്‍ക്കിഎപ്പിസ്‌കോപ്പല്‍ സഭയായി ഉയര്‍ത്തിയതിന്റെ അടിസ്ഥാനത്തിലായിരിക്കും മേജര്‍ ആര്‍ച്ച് ബിഷപ്പുമാര്‍ തമ്മിലുള്ള മുന്‍ഗണന നിശ്ചയിക്കുന്നത്.

സീറോ മലബാര്‍ കത്തോലിക്കാ സഭയിലെ മേജര്‍ ആര്‍ച്ച് ബിഷപ്പുമാരുടെ പട്ടിക

1. മാര്‍ ആന്റണി പടിയറ, സീറോ മലബാര്‍ കത്തോലിക്കാ സഭയുടെ പ്രഥമ മേജര്‍ ആര്‍ച്ച് ബിഷപ്പ്, 23 ഏപ്രില്‍ 1985 - 11 നവംബര്‍ 1999.

2. മാര്‍ വര്‍ക്കി വിതയത്തില്‍, സീറോ മലബാര്‍ കത്തോലിക്കാ സഭയുടെ മേജര്‍ ആര്‍ച്ച് ബിഷപ്പ്, 23 ഡിസംബര്‍ 1999 - 1 ഏപ്രില്‍ 2011.

3. മാര്‍ ജോര്‍ജ് ആലഞ്ചേരി, സീറോ മലബാര്‍ കത്തോലിക്കാ സഭയുടെ മേജര്‍ ആര്‍ച്ച് ബിഷപ്പ്, 25 മെയ് 2011 - 7 ഡിസംബര്‍ 2023.