തിരുവനന്തപുരം: കേന്ദ്ര വാണിജ്യ മന്ത്രാലയവും സ്റ്റാര്ട്ടപ്പ് ഇന്ത്യയും സംയുക്തമായി ഏര്പ്പെടുത്തിയ ദേശീയ സ്റ്റാര്ട്ടപ്പ് റാങ്കിങില് ബെസ്റ്റ് പെര്ഫോര്മര് പുരസ്കാരം കേരളത്തിന് ലഭിച്ചു. ദേശീയ സ്റ്റാര്ട്ടപ്പ് ദിനത്തോടനുബന്ധിച്ച് ന്യൂഡല്ഹിയില് നടന്ന ചടങ്ങില് കേന്ദ്ര വാണിജ്യ മന്ത്രി പീയൂഷ് ഗോയലാണ് പുരസ്കാരങ്ങള് പ്രഖ്യാപിച്ചത്. കഴിഞ്ഞ മൂന്ന് തവണയായി ടോപ് പെര്ഫോമര് പുരസ്കാരം കരസ്ഥമാക്കി വരുന്ന സംസ്ഥാനത്തിന് ഇതാദ്യമായാണ് ദേശീയ സ്റ്റാര്ട്ടപ്പ് രംഗത്തെ പരമോന്നത പുരസ്കാരം കേരളം സ്വന്തമാക്കുന്നത്.
സ്റ്റാര്ട്ടപ്പുകള്, വിദ്യാര്ഥികള്, വനിതാ സംരംഭകര് എന്നിവര്ക്ക് നല്കി വരുന്ന സ്ഥാപിതമായ പിന്തുണയും സ്റ്റാര്ട്ടപ്പുകള്ക്ക് നിക്ഷേപകരുമായി നേരിട്ട് ബന്ധപ്പെടാനുള്ള അവസരമൊരുക്കുന്ന ഇഗ്നൈറ്റ് കാലിക്കട്ട് പോലുള്ള പരിപാടികളും ഗ്രാമീണ മേഖലകളില് ആശാവഹമായ മാറ്റം കൊണ്ട് വരാന് ശ്രമിക്കുന്ന സ്റ്റാര്ട്ടപ്പുകള്ക്കുള്ള പ്രോല്സാഹനത്തിനും കൂടിയാണ് പുരസ്കാരം.
വിഭവ ശേഷി വികസനം, നിക്ഷേപ-സംഭരണ നേതൃത്വം, സുസ്ഥിര വികസനം, ഇന്കുബേഷന്, മെന്ര്ഷിപ്പ് സേവനങ്ങള്, നൂതനത്വം, മികച്ച സ്ഥാപനം എന്നീ മേഖലകളിലാണ് കേരളത്തിന്റെ മികവ് അംഗീകരിക്കപ്പെട്ടത്.
5000 ലധികം സ്റ്റാര്ട്ടപ്പുകള് കേരള സ്റ്റേറ്റ് സ്റ്റാര്ട്ടപ്പ് മിഷനില് രജിസ്റ്റര് ചെയ്തിട്ടുള്ളതില് നൂറിലധികം സ്റ്റാര്ട്ടപ്പുകള് വനിതാ സംരംഭകരുടേതാണ്. 14 ജില്ലകളിലുമായി 50 ലധികം ഇന്കുബേറ്ററുകളും പ്രവര്ത്തിക്കുന്നു.
അതോടൊപ്പം സംസ്ഥാന സര്ക്കാര് ജീവനക്കാര്ക്കായി അഞ്ചിലേറെ അവബോധന പരിപാടികളും നിക്ഷേപ സമാഹരണത്തിനായി 15 ലേറെ പദ്ധതികളും കൂടാതെ പുനരുപയോഗ ഊര്ജത്തിനും സുസ്ഥിരതയ്ക്കും കാലാവസ്ഥാ വ്യതിയാനത്തിലും ഊന്നല് നല്കുന്ന 40 ല്പരം സ്റ്റാര്ട്ടപ്പുകളുള്പ്പെടെ ഗ്രാമീണ വികസനത്തിലൂന്നിയ 40 ല്പരം സ്റ്റാര്ട്ടപ്പുകളുമുണ്ട് കേരള സ്റ്റാര്ട്ടപ്പ് മിഷനില്.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26