തിരുവനന്തപുരം: സംസ്ഥാനത്തെ ആരോഗ്യ പ്രവര്ത്തകരുടേയും രോഗികളുടേയും ആശുപത്രികളുടേയും സുരക്ഷിതത്വം ഉറപ്പാക്കാനുള്ള കോഡ് ഗ്രേ പ്രോട്ടോകോള് ആരോഗ്യ വകുപ്പ് മന്ത്രി വീണാ ജോര്ജ് പുറത്തിറക്കി. വികസിത രാജ്യങ്ങളിലുള്ള പ്രോട്ടോകോളുകളുടെ മാതൃകയിലാണ് സംസ്ഥാനത്തിന് അനുയോജ്യമായ രീതിയില് കോഡ് ഗ്രേ പ്രോട്ടോകോള് ആവിഷ്കരിച്ചതെന്നും എല്ലാ സര്ക്കാര് ആശുപത്രികളിലും നിര്ബന്ധമായും കോഡ് ഗ്രേ പ്രോട്ടോകോള് പാലിക്കണമെന്നും മന്ത്രി വ്യക്തമാക്കി.
ആരോഗ്യ പ്രവര്ത്തകര്ക്ക് നേരെയുള്ള അതിക്രമങ്ങള് തടയുന്നതിന്റെ ഭാഗമായി 2012 ലെ ആശുപത്രി സംരക്ഷണ നിയമം 2023ല് കാതലായ പരിഷ്കാരങ്ങളോടെ ഭേദഗതി വരുത്തി നിയമമാക്കി. ഇതുകൂടാതെയാണ് ആരോഗ്യ പ്രവര്ത്തകര്ക്കും രോഗികള്ക്കും നേരെയുള്ള അതിക്രമങ്ങള് തടയാനും അതിക്രമമുണ്ടായാല് പാലിക്കേണ്ടതുമായ നടപടിക്രമങ്ങള് ഉള്ക്കൊള്ളിച്ച് കോഡ് ഗ്രേ പ്രോട്ടോകോള് തയാറാക്കിയത്.
ആശുപത്രി, ജീവനക്കാര്, രോഗികള് എന്നിവരുടെ സുരക്ഷ ഉറപ്പാക്കാന് മുന്കൂട്ടി ചെയ്യേണ്ട പ്രവര്ത്തനങ്ങള്, അതിക്രമം ഉണ്ടായാല് സുരക്ഷ ഉറപ്പാക്കാനായുള്ള നടപടിക്രമങ്ങള്, റിപ്പോര്ട്ടിങ്,
തുടര് പ്രവര്ത്തനങ്ങള് എന്നിവ വിശദമായി പ്രതിപാദിക്കുന്നതാണ് കോഡ് ഗ്രേ പ്രോട്ടോകോള്. ഇതോടൊപ്പം ജീവനക്കാര്ക്ക് മാനസിക പിന്തുണ ഉറപ്പാക്കാനും നിയമ പരിരക്ഷ ഉറപ്പാക്കാനുമുള്ള നിര്ദേശങ്ങളും പ്രോട്ടോകോളിലുണ്ട്.
ഉന്നത പൊലീസ് ഉദ്യോഗസ്ഥരുടെയും ആരോഗ്യ വകുപ്പ് ഉന്നത ഉദ്യോഗസ്ഥരുടെയും നേതൃത്വത്തില് ശില്പശാല സംഘടിപ്പിച്ചാണ് കോഡ് ഗ്രേ പ്രോട്ടോകോളിന് രൂപം നല്കിയത്.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26