ദുബായിൽ വീസ സേവനങ്ങൾ പരിചയപ്പെടുത്തുന്ന പ്രദർശനം തിങ്കളാഴ്ച വാഫി സെന്ററിൽ ആരംഭിക്കും

ദുബായ്: വീസ സേവനങ്ങളെക്കുറിച്ച് ഉപഭോക്താക്കളെ ബോധവത്കരിക്കുന്നതിനായി ജൂൺ 24 മുതൽ 28 വരെ ദുബായ് വാഫി മാളിൽ പ്രദർശനം സംഘടിപ്പിക്കുമെന്ന് ദുബായ് ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്സ് അഫയേഴ്സ് (ജിഡിആർഎഫ്എ) അറിയിച്ചു. "നിങ്ങൾക്കായി, ഞങ്ങൾ ഇവിടെയുണ്ട്" ( for you , we are here)എന്ന വകുപ്പിന്റെ പൊതുജന ബോധവൽക്കരണ ക്യാമ്പയിന്റെ ഭാഗമായാണ് പ്രദർശനം.

ഈ പ്രദർശനം വിവിധ തരത്തിലുള്ള വീസകളെക്കുറിച്ചും അവ എങ്ങനെ അപേക്ഷിക്കാമെന്നതിനെക്കുറിച്ചും വിവരങ്ങൾ നൽകും. രാവിലെ 10 മുതൽ രാത്രി 10 വരെയാണ് പ്രദർശനം നടക്കുന്നത്.ദുബായിലെ താമസക്കാരുടെയും സന്ദർശകരുടെയും ഉപഭോക്തൃ അവബോധം വർദ്ധിപ്പിക്കാനും മികച്ച സമ്പ്രദായങ്ങൾക്കും അന്താരാഷ്ട്ര നിലവാരത്തിനും അനുസൃതമായി ജിഡിആർഎഫ്എ നൽകുന്ന സേവനങ്ങളുടെ വിപുലമായ ശ്രേണി പരിചയപ്പെടുത്തുന്നതിന്റെ ഭാഗമായാണ് പരിപാടിയെന്ന് ഡയറക്ടറേറ്റ് അറിയിച്ചു.

ഉപഭോക്തൃ കമ്മ്യൂണിറ്റി നെറ്റ്‌വർക്ക്, ഗോൾഡൻ വിസ, എൻട്രി പെർമിറ്റ് സേവനങ്ങൾ, വീഡിയോ കോൾ, ഐഡന്റിറ്റി, പൗരത്വ മേഖലയുടെ കാര്യങ്ങൾ, റസിഡൻസി വിസ ഇഷ്യു ചെയ്യൽ നടപടിക്രമങ്ങൾ, താമസ- കുടിയേറ്റ നിയമ ഉപദേശ സർവീസ് എന്നിവയുൾപ്പെടെ നിരവധി സേവനങ്ങൾ ഇവിടെ പരിചയപ്പെടുത്തും. ഇവയുടെ വിശദമായ വിശദീകരണങ്ങളും അവ വേഗത്തിലും സുഗമമായും എങ്ങനെ അപേക്ഷിക്കാമെന്നും പൊതുജനങ്ങൾക്ക് അവബോധം നൽകും.

സമ്മാനങ്ങൾ നേടാനുള്ള മത്സരങ്ങൾ, കുട്ടികളുടെ ചിത്രരചനാ പ്രവർത്തനങ്ങൾക്കായി നീക്കിവച്ച പ്രത്യേക കോണ്‍, മറ്റ് ഇന്ററാക്ടീവ് പരിപാടികൾ എന്നിവ ക്യാമ്പയിന്റെ ഭാഗമായി നടക്കും. കാർട്ടൂൺ കഥാപാത്രങ്ങളായ സലേമിനെയും സലാമയെയും ആളുകളെ സ്വാഗതം ചെയ്യാൻ പരിപാടിയിൽ ഉണ്ടാകും. ഉപഭോക്താക്കളുടെ ആവശ്യങ്ങൾ നിറവേറ്റുന്നതിനായി രൂപകൽപ്പന ചെയ്ത വിവിധ ഗുണനിലവാര സേവനങ്ങളെക്കുറിച്ച് പൊതുജന അവബോധം വളർത്തുന്നതിനാണ് ജിഡിആർഎഫ്എ "നിങ്ങൾക്കായി, ഞങ്ങൾ ഇവിടെയുണ്ട്" എന്ന ബോധവൽക്കരണ ക്യാമ്പയിൻ ആരംഭിച്ചത്.