ലോക ലഹരിവിരുദ്ധ ദിനം: തലമുറകളെ വിഴുങ്ങുന്ന ലഹരിക്കെതിരെ വിട്ടുവീഴ്ചയില്ലാത്ത പ്രതിരോധം

ജീവിതം എന്നത് വലിയ ലക്ഷ്യങ്ങളിലേക്കും മനോഹരമായ സ്വപ്നങ്ങളിലേക്കും എത്തിച്ചേരേണ്ട ഒരു മഹാവിസ്മയമാണ്. എന്നാൽ, ആ മനോഹരമായ യാത്രയെ പാതിവഴിയിൽ തകർത്തെറിയാൻ ഇന്ന് നമ്മുടെ ചുറ്റും ലഹരിയുടെ കറുത്ത കരങ്ങൾ നീളുന്നുണ്ട്. ജൂൺ 26 അന്താരാഷ്ട്ര ലഹരിവിരുദ്ധ ദിനമായി ലോകം ആചരിക്കുമ്പോൾ അതൊരു കേവല ചടങ്ങായി മാറരുത്, മറിച്ച് ലഹരിക്കെതിരെ വിട്ടുവീഴ്ചയില്ലാത്ത ഒരു പ്രതിരോധ മതിൽ തീർക്കാനുള്ള കർക്കശമായ ആഹ്വനമാകണം അത്.

ലഹരിയോട് പൂർണ്ണമായി 'NO' എന്ന് ഉറപ്പിച്ചു പറയാനും നമ്മുടെ യുവത്വത്തെയും കുടുംബങ്ങളെയും ഈ മഹാവിപത്തിൽ നിന്ന് കാത്തുസൂക്ഷിക്കാനും നാം ഓരോരുത്തരും വ്യക്തിപരമായി പ്രതിജ്ഞാബദ്ധരാകേണ്ട സമയം അതിക്രമിച്ചിരിക്കുന്നു.
നമുക്ക് സ്വയം വഞ്ചിതരാകാതിരിക്കാം, നിമിഷ നേരത്തെ കൃത്രിമമായ ആശ്വാസമോ താൽക്കാലിക ആനന്ദമോ വാഗ്ദാനം ചെയ്ത് ജീവിതത്തിലേക്ക് കടന്നുവരുന്ന മയക്കുമരുന്നുകൾ യഥാർത്ഥത്തിൽ ഒരു മരണക്കെണിയാണ്.

ലഹരി ഒരിക്കലും നിങ്ങളുടെ പ്രശ്നങ്ങൾക്കോ മാനസിക വിഷമങ്ങൾക്കോ ഉള്ള പരിഹാരമല്ല, മറിച്ച് അത് നിങ്ങളെയും നിങ്ങളുടെ മാതാപിതാക്കളുടെ കണ്ണീരിനെയും കുടുംബത്തിന്റെ തകർച്ചയെയും ആഴത്തിലുള്ള ഇരുട്ടിലേക്ക് തള്ളിവിടുകയേ ഉള്ളൂ. യഥാർത്ഥ സന്തോഷവും ആത്മവിശ്വാസവും കണ്ടെത്തേണ്ടത് കെമിക്കലുകളുടെ കപടലോകത്തിലല്ല, നമ്മുടെ സ്വന്തം കഴിവുകളിലും കഠിനാധ്വാനത്തിലുമാണ്. കായികരംഗത്തും കലാരംഗത്തും പഠനത്തിലും സ്വന്തം കരിയറിലും മികച്ച വിജയം നേടിയെടുക്കുമ്പോൾ ഉണ്ടാകുന്ന ആത്മസംതൃപ്തിയാണ് ഒരു മനുഷ്യനെ യഥാർത്ഥ ഉയരങ്ങളിലെത്തിക്കുന്നത്.

ഇന്ന് ലഹരി മാഫിയകൾ ഏറ്റവും കൂടുതൽ വലവീശുന്നത് നമ്മുടെ സ്കൂളുകളിലും കോളേജുകളിലും യുവതലമുറയ്ക്കു നേരെയാണ്. സൗഹൃദത്തിന്റെ ഭാവത്തിലോ പരീക്ഷണ കൗതുകത്തിന്റെ രൂപത്തിലോ ആര് വച്ചുനീട്ടിയാലും ആദ്യത്തെ തവണ തന്നെ അത് നിരസിക്കാനുള്ള ആർജ്ജവവും ധൈര്യവും നമ്മൾ കാണിക്കണം. ലഹരിയുടെ സാന്നിധ്യം നമ്മുടെ ചുറ്റുവട്ടങ്ങളിൽ കണ്ടാൽ ഭയപ്പെടാതെ പ്രതികരിക്കാനും അധികൃതരെ അറിയിക്കാനും മടിക്കരുത്.

രക്ഷിതാക്കളും അധ്യാപകരും സുഹൃത്തുക്കളും പരസ്പരം കണ്ണും കാതും തുറന്നിരിക്കുകയും, കുട്ടികളുടെ പെരുമാറ്റത്തിലുണ്ടാകുന്ന ചെറിയ മാറ്റങ്ങൾ പോലും സ്നേഹത്തോടെയും ജാഗ്രതയോടെയും നിരീക്ഷിക്കുകയും ചെയ്യുമ്പോൾ മാത്രമേ ഈ മാഫിയകളുടെ വലക്കണ്ണികൾ നമുക്ക് തകർക്കാൻ കഴിയൂ.

അതേസമയം ഇതിന്റെ കെണിയിൽ ഇതിനകം വീണുപോയവരോട് ക്രൂരമായ സമീപനമല്ല, മറിച്ച് അവരെ സ്നേഹത്തോടെയും കരുതലോടും കൂടി ജീവിതത്തിലേക്ക് തിരികെ കൊണ്ടുവരാനുള്ള വലിയ മനസ്സ് സമൂഹം കാണിക്കണം. ലഹരി വിൽക്കുന്നവരോട് നിയമത്തിന്റെ എല്ലാവിധ കർക്കശതയും കാട്ടുമ്പോൾ തന്നെ ഇരകളായവരെ കൃത്യമായ കൗൺസിലിംഗിലൂടെയും ചികിത്സയിലൂടെയും പുനരധിവസിപ്പിക്കാൻ ഒരു നല്ല സുഹൃത്തായി നമുക്ക് കൈത്താങ്ങാകാം.

ഇരുട്ട് എത്ര ശക്തമായാലും ഒരൊറ്റ ചെറിയ വെളിച്ചത്തിന് അതിനെ തോൽപ്പിക്കാനാകും എന്നതുപോലെ, ലഹരിയുടെ കറുത്ത നിഴലിനെ മാറ്റാൻ നമ്മുടെ ഉറച്ച തീരുമാനത്തിന് സാധിക്കും. അതിനാൽ ലഹരിയോട് വിട്ടുവീഴ്ചയില്ലാതെ 'വേണ്ട' എന്നും നമ്മുടെ മനോഹരമായ ജീവിതത്തോട് ഉറക്കെ 'വേണം' എന്നും നമുക്ക് ഒന്നിച്ച് പ്രഖ്യാപിക്കാം.