ടെഹ്റാൻ: ഇറാനിലെ കുപ്രസിദ്ധമായ എവിൻ ജയിലിൽ തടവിലാക്കപ്പെട്ട കത്തോലിക്കാ യുവതി ക്രൂരമായ ശാരീരിക-മാനസിക പീഡനങ്ങൾക്ക് ഇരയാകുന്നതായി റിപ്പോർട്ട്. തന്റെ ക്രിസ്തീയ വിശ്വാസം പരസ്യമാക്കിയതിനും രാജ്യത്തെ മതനിയമങ്ങൾ ലംഘിച്ചുവെന്നും ആരോപിച്ചാണ് മാസങ്ങൾക്ക് മുൻപ് അധികൃതർ ഇവരെ അറസ്റ്റ് ചെയ്തത്.
രാജ്യത്തെ കർശനമായ ഇസ്ലാമിക നിയമങ്ങൾ ലംഘിച്ചുവെന്നാരോപിച്ച് അറസ്റ്റിലായ യുവതിയെ രാഷ്ട്രീയ തടവുകാരെ പാർപ്പിക്കുന്ന ടെഹ്റാനിലെ എവിൻ ജയിലിലേക്കാണ് മാറ്റിയത്. ക്രിസ്തീയ വിശ്വാസം ഉപേക്ഷിക്കാനും ഭരണകൂടത്തിന് അനുകൂലമായി മൊഴി നൽകാനും ആവശ്യപ്പെട്ടാണ് ഇവർക്ക് നേരെ അതിക്രമങ്ങൾ അഴിച്ചുവിടുന്നതെന്ന് മനുഷ്യാവകാശ സംഘടനകളെ ഉദ്ധരിച്ചുള്ള റിപ്പോർട്ടുകൾ വ്യക്തമാക്കുന്നു. ശാരീരിക മർദനങ്ങൾക്ക് പുറമെ ലൈംഗികാതിക്രമങ്ങളും മാനസിക പീഡനങ്ങളും ഇവർ നേരിടുന്നുണ്ട്. ജയിലിൽ മെഡിക്കൽ സഹായം പോലും നിഷേധിക്കപ്പെടുന്ന അവസ്ഥയാണുള്ളത്.
ഇറാനിൽ ഇസ്ലാം മതത്തിൽ നിന്ന് മതം മാറുന്നത് കടുത്ത കുറ്റകൃത്യമായി കണക്കാക്കപ്പെടുന്നു. കത്തോലിക്കാ വിശ്വാസത്തിലേക്ക് മാറുന്നവർ ഇത്തരത്തിൽ ഭരണകൂടത്തിന്റെ കടുത്ത നിരീക്ഷണങ്ങൾക്കും പീഡനങ്ങൾക്കും ഇരയാകുന്നത് പതിവാണെന്ന് മനുഷ്യാവകാശ പ്രവർത്തകർ ചൂണ്ടിക്കാട്ടുന്നു. സംഭവം പുറത്തുവന്നതോടെ ആഗോളതലത്തിൽ ക്രൈസ്തവ കൂട്ടായ്മകളും മനുഷ്യാവകാശ സംഘടനകളും ശക്തമായ പ്രതിഷേധവുമായി രംഗത്തെത്തിയിട്ടുണ്ട്.
ജയിലിൽ കഴിയുന്ന മതന്യൂനപക്ഷങ്ങളുടെ സുരക്ഷ ഉറപ്പാക്കാൻ ഇറാൻ ഭരണകൂടം തയ്യാറാവണമെന്നും സ്വതന്ത്ര അന്താരാഷ്ട്ര നിരീക്ഷകർക്ക് ജയിൽ സന്ദർശിക്കാൻ അനുമതി നൽകണമെന്നും ആവശ്യമുയർന്നിട്ടുണ്ട്. യുവതിയുടെ മോചനത്തിനായി പാശ്ചാത്യ രാജ്യങ്ങൾ നയതന്ത്ര സമ്മർദം ശക്തമാക്കണമെന്നും സംഭവത്തിൽ സമഗ്രമായ അന്താരാഷ്ട്ര അന്വേഷണം വേണമെന്നും മനുഷ്യാവകാശ പ്രവർത്തകർ ആവശ്യപ്പെട്ടു.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള് സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്ളീല പദപ്രയോഗങ്ങളും ദയവായി ഒഴിവാക്കുക.